ЛЫНГОНЫШ БЭ ДжЭhЭННЫМ, ЕСЭ ДжИГЭРЫШ ДЭЖЕJДЭ

ЛЫНГОНЫШ БӘ ҸӘҺӘННЫМ, ЕСӘ ҸИГӘРЫШ ДӘЖЕЈДӘ

Амјәзо

-Зә, Амјәзо, кәхәлизи зоә, һафтәдә, мангәдә һич ныбо и кәрә чәмә кефи быпарс, чәмә канә кәј бәј быкујәни, мәһол хәробә бәбе бәгәм?

-Чич быә ижән, мәһолы пегәтә бәштә сә, бә јаһуш? Һа, чич быбу, кујәме ышты канә коләфә мәнзыли бә, “Сәломәлејкум!”

-Вәәлејкумәссәлом! Сәломон хыванди быкән тыни! Әнҹәх давем нывоте ки! Дыли пијәше, зывони вотыше, чы хәтом карде ки, отәшбәгәв биш бомы?

-Зә, вәсе, сәкә ыштә ын “нумрон”! Бывот ыштә дыли сыхани, быдә азән бышум ыштә кој-сәнәти думо!

-Ты гәдәј шинә зывон нишо быдә, азән бывотомәни. Тыни жыго виндејдәм, бәштә вотејән пәшимон быәм.

-Зә, чок, димым сырәј, зывонымән шин карде. Есә бывот.

-Һа, ым ҹо мәсәлә. Бә јоде, бы незони парсәбим ыштыку ки, ышты зынәјку, конҹон ә “озорбојҹоныжә” толышон ки, хәјли чыми бәнав һајышон дәғандәбе бә мәһол ки, чиче, чиче, һичмәсә “Озорбојҹонәдә уникал гыләј шанс бә мәјдон бешә бо толышон, кали “нопоконән” имкон дојдәнин бәвон ки, бахтәвәр быкән чәмә хәлғи”?

-Ты воте, азән номе бә сајт, һандәкәсонән һандышоне, һәни чич кардәниним ки?

-Зә, нәјнорәти мәкә, гуш быдә бә сыхани думој. Аз бәвәдә нороһатбим ки, чы ғәдо-бәло быә ки, һәмон ә “уникал шанс” нывыштәкәсон сәдо һәни бешејдәни. Росте?

-Һа, росте.

-Һа, мәвотбән, мәсәлә һәнијән ғәлизејбән, чәмән һич хәбәмон ни!

-Бочи?

-Зә, “сәдо беныше” һәлә быманды бә и тәрәф, ым одәмон ыштән ни быәнбән!

-Чокнә јәне “ни быән”! Хыдо ныкардә, мардән јәне?

-Зә, неје, не! Тынән окарде ыштә вылә гәв! Ты шиш мандиш чәмә Валидә додо вырәдә...

-Әв кије жәго? Әј чичыш кардә?

-Ружи кинон парсәјн Валидә додоку ки, ышты моә лынгон дәжејдәбин, есә чокнән әвон? Әв чич бывото, чоке?

-Һа!

-Валидә додо: “Кинә, че инә лынгон бә ҹәһәнным, есә чәј сијо ҹигәр дәжејдә”! Тынән бәнә бәј, вотеј пијејдә ки, сәдо еше быманды бә и тәрәф, мәвужи мардән! Не, шык бә Хыдо, мардәнин! Интаси ә шәхсон сәшон пегәтә, витән Озорбојҹоно бә хариҹ!

-Вај нәнә! Бәс конҹо манде чәвон вотә “уникал шанс”?

-Зә, азән һежо әј вотејдәм ки, чымон вотә “уникалә шанси” мәно мәвужи ымејбән ки, бә толышон вотешон пијә ки, “фырсәте, бывитән бышән, перохнән ыштә ҹони, не гирәм бымандошон, ым һукмәт бебәше бәшмә охој”! Рост сәрәсәм?

-Һәни жәго бешејдәәни! Чыми ҹо номыш ни ки! Ым чокнә “уникал шансе” ки, чәј “сәдә” ныштәкәсон ыштән витән мәмләкәто?

-Есә зынәј, бочи нороһатым карде ты? Вотем, бәлкәм ты изоһ быкәј бомы ын сыри. Тынән ки, номхыдо, жәј лап бә кәлләчәхи, бәнә чәмә Валидә додо кыште ә фәғырон!

-Розиме деты, һа хосә Амјәзо! Әмма жәләвони жимон карде чы мәнош һесте ки, чәј витеј сәмәрәш чич быбу? Чымы зынәј ыме ки, жәләвони ахмәхә зывон һежо бәло бәбе бочәј тәјә сәј!

-Һа Хыдо рози быбу ыштыку!