КИJЭ СЭНОЭКЭСИ ПЭJДО БЫКЭ

КИЈӘ СӘНОӘКӘСИ ПӘЈДО БЫКӘ

Амјәзо

-Зә, Амјәзо, нәнәмардәј зоә, мәвужи роһате ышты ныштә вырә, әве һич сәдоән бешејдәни. И кәрә рост быкә ыштә сәј, одјәс бә гырдо-кәној, хәробә бејдәхо мәһол!

-Зә, кам нәјнорәти быкә, гушоным ешин, тикәј ашиш гәп быжән, быдә азән бызным, чич быә, коврә хәробә мандә ки, чымынән хәбәм ни? 

-Зә, һәни чокнә бывотым ки, тыни пекәм һытә вырәо? Дәнырәсәјш? Вотејдәм, мәһол хәробә бејдә, аләм гынијә бәјәнды, дастәј толыш бешә бә мәјдон, һај дастәдән гыләј тижә шымши, бә тарс-ларзин ки, бәжемон бәчәмә вә бешәкәси гиј!

-Һежо ым?

-Зә, неје, не! Вотејдән, толыш һежо әмәнимон ки һестимон, ҹо толыш әзынимон! Һичкијән гәп ныжәны толыши номо! Гыләј дырозә сијоһишонән нывыштә, ноәшоне бә Facebook ки, чиче, чиче, чы одәмон һич гыләјни һынәшән ни, һәхышән ни, сыхани бывоты толыши номо!

-Һежо ым?

-Зә, кәхәлизи хугә деғыж, һәни чич манде ки? Пијејдә, чәвон номијән бывотым бәты...

-Һа, ијоән огәт! Ном-фылон лозим ни бәмы. Дәрәсәјм тыни. Есән ты гуш быдә бәмы.

-Бывот һәлә, бәшты сә чамом!

-Һәлә бунум, чокнә бывотым ки, сәросне бызным тыни...

-Чиче, вотеј пијејдә ки, мыни сәросне жәго чәтинә које јәне?

-Зә, имкон быдә, ыштә фики гырдә быкәм бә иврә! Һәлбәттә чәтине! Аз чич быкәм ки, Гырдәсәо бешәш омәш бә Куләтон, әјо пешомә чоли ов, чәјоән жә шәш бә Сәлјон, архи лилә ови пешомејку лузы пандәмә! Һостоне жыләвони сәросне?

-Вај ышты кәјнәныбу! Һәни һичи оныгәте ки бомы!

-Емард ыштә ныштә вырәдә, гуш быдә, чич вотејдәм бәты! “Кијә” зынејдәш чиче?

-Һм! Ымән чәмә ағылманд! Аз вотејдәм бәј осмон, әв вотејдә рисмон! Зә, аз вотејдәм бәты ки, мәһол хәробә бејдә, ты кијә парсејдәш чымыку. Һич вырәше? Зынејдәм, һа, чич быбу чән?

-Һежо әв быбу ки, аз бывотым, тынән гуш быдә бәмы. Гыләј вырәдә ки винде кијә дујәвул дојдә, ты бәчәј паснәсути фик мәдә, бәј сә-сыхан мәкә. Чә паснәсути гыно чиче? Чәј ағыл һесте бәгәм? Езымејәни! Ты әлбәһол фик быкә ки, чы кијә сәноәкәс кије! Сәноәкәс устоә одәмбу, амохтәбу ыштә коәдә, машәкәбу, бәвәдә дујәвул әкәни чәј сәноә кијә. Чумчыко әв һич вахти тарә шонибәдо бә кијә. Жијәдә бәно һышкә, чәј сәпе дәбәчыне тарә. Әве вотејдән ки, тарән суте бә һышки офә! Дәрәсәјш?

-Һәлә бывот, бә охој быросын ыштә сыхани, бәвәдә бәвотем, жычиј сәрәсәјм ја не.

-Һа, гуш быдә. Вај бә ружи ки, кијә сәноәкәс ноши быбу! Бәвәдә әсыл вај-шивәне! Ношијә вәју тарә бәно жијәдә, һышкијән сәпе, һа бәпијеше кијә зәһримор бывәшы, әвәшни ки әвәшни!

-Һа чич быбу чән?

-Тангһовсәлә мәби, гуш быдә. Ты ки пијәј бәмы бывоти чә одәмон номи, әвон паснәсутин, “хәробә ној әзынин мәһоли”. Әвон һа ыштәни лу-пуст быкән, сыркә бәбен, ыштәни бәтыпнен! Ты ки ағылмандә мердиш, сыфтә быши умут, кијә сәноәкәс кије? Әвы ки умуте, һа, бәвәдә бәзнеш ки, кије ә паснәсутон бә кијә шодоәкәс, мәғсәдыш чиче, чич бәпате бә кијә сәпе, чә хорәки ном чич бәбе, тәм чич бәбе, чәј һардәкәс ки бәбе? Дәрәсәјш, хосә Амјәзо?

-Мәвужи, ошко бе бомы чә хонәхон мәтләб!

-Һа бәшты ағыли ғыбон, јаһу мәжән, ыштә ејнијән дәгиш мәкә, ә паснәсутон һа быдә дујәвул быдән боштә. Чәвон дујәвул чәвон ыштәни ку бәка, иншаллаһ! Ты ки хомә әғыл ниш, чандә соронин кындә шодојдәш бә ҹәһәнными чәшмә! Анә жәго паснон сутәне чәмә чәшон вәдә, ымән быбу чәвон гыләјни. Тикәј ыштә нәфәси быстән, быдә ә паснәсутон тикәјән дујәвул быдән, чәј хывандән пештыпур быбу ки, сәноәше гыләј јолә кијанду, вәш бәно мәһоли! Быдә жәгоән бызны! Әмәнән ыштә коәдә быбәмон, әмә тарә вјорә езым нимон ки, бысутәмон бә ҹо кәси офә! Быши, ыштә сәј бынә, шин-шини быһыт! Шинә һаны быбу! Кејнә умуте, кије кијә сәноәкәс, бәвәдә бој, чәшонсә вырә һесте!

-Һа Хыдо рәһмәт быкә ышты пыә! Хәјли ашиш бим! Әнҹәх ты һич хәбән ныгәтехо, чиче чәвон пијәј?

-Бымијоны рәһмәт! Есә бызын деғыжи де сәлјоныжи фәрғи. Жыго зынејдәм, кијә сәноәкәси ки бејән мәлум бе бәты...