РУЖЭМО ДЫВО

 

РУЖӘМО ДЫВО

Деғыж

Ружәмоә манг омәј,

Хыдоку ә ванг омәј!

Нозил бе “әл-Бәгәрә”,

Ғырони покә Сурә!

Оварде бә инсонон,

Бә ҹәми мысылмонон:

-Һа имон вардәкәсон,

Воҹиб бе бәшмә ружә!

Бәруж ружә быгәтән,

Һард-һәши јодо бекән!

Јонзә манг боштә жијәјн,

И манг Бомы быжијән!

Руж дәварды де дыво,

Дывон әмәсе Хыдо!

Париз быкән де чәши,

Париз һәмән бо гуши!

Јавә сыхан мәвотән,

Имони дасто мәдән!

Ғыјбәт әбыни карде,

“Мардә бој гужди һарде!”

Незкәт мәкән де жени,

Гуш мәдән бә шәјтони!

Шодән нәфси, дывокән,

Бә Хыдо шукур быкән!

Чок ебән бә ијәнды,

Сәлом быдән бәјәнды:

“Ружә ныможы ғәбул,

Бә һәмдигә, һәм ғәбул!”

Һички дыли марыштән,

Ҹон бывотән, бымәсән!

Бәд бәкәсон дуст быбун,

Дылон обун, шо быбун!

Осә быкән пи-пышкон,

Беварисон, шыкәстон!

Омәгәтән чәшбәро

Ов-авлоди, пыә-мо!

Быкән чокә әмәлон,

Һар ружи ибодәтон!

Имконсојб еһсан быдә,

Бә косибон бахш быкә!

Ружәмо покә манге,

Ғырони омә манге!

Ғырон чәмә Китобе,

Бәшмә парсон ҹәвобе!

Ғырон нојдә ро-ријә,

Ыме че ружә мәнә:

Чәсәј бәһә чәсонә,

Ифтор боты шангонә!

Окә ыштә ифтори,

Быкә ыштә шукури:

“Һа чымы шинә Хыдо,

Ружә гәтыме бото!

Окардәм ыштә ружә

Дешты доә рузијон!

Нијәт гәтедәм һәмән

Аз бо вәомә ружон!

Быбахш чымы һар гынон,

Дәвардә, омә гынон!”

“Биссимиллаһ!” бывотән,

Бә сурфә даст дырозкән!

Ғурти ови пешомән,

Ыштә ифтори окән!

Бәһән, быдән, пешомән,

Бә Хыдо шукур быкән:

“Һа Хыдо, шинә Хыдо,

Һардымоне, си бимон,

Шукур Бәшты јолјәти!

Си быкә Ты һар кәси,

Косиби, һәм бечизи!

Бымәс Ты чәмә дывон,

Озод быкә толышон!

 “Перохын Ты әмәни!” –

Толыш Бәты бә ванге!

Рәһым быкә Ты бәмә,

Әмәни Ты шомәдә!

Быбахш Ты чәмә гынон,

Мәјус быкә номердон!

Ја Хыдо, Пәрвәрдигор,

Дәвитәме мы Бәты:

Толыш - мысылмонә хәлғ,

Озоды Ка әмә хәлғ!

Вәсе әсир мандимон,

Чан соре бә ҹангимон!

Һәзо-һәзо толышон

Батилику дијәрон!

Ружә гәтедән Боты,

Шәв-руж бә дывон Бәты:

 “Озоди бәон Окә,

Толыши озод быкә!”