Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Оцените содержание статьи?
БӘКИ БЫВОТЫМ ЫШТӘ ДАРДИ?
Амјәзо
-Зә, куләтоныж!
-Бәле, хосә Амјәзо!
-Бәле бә шәкә! Пијејдәме гыләј чиј быпарсым ыштыку, чич вотејдәш?
-Һа быпарсәни, чич бәвотем?
-Ымруж ијун манги 21-је, жәгоје?
-Жәгоје ки һесте. Чич быбу ки?
-Есә бәвотем, чич быбу! Һәни чич быәнине ки? Ты зынејдәниш ки, ымруж кон руже?
-Бочи зынејдәним? Ымруж Толыши Республикә елон кардә быә руже!
-Номхыдо, хәјли бә нав омәш, Амјәзо! Афәрин!
-Бочи хәбә сәјдәш ки? Чымы јоди дәвиндә кардејдәш?
-Зә, неје, не! Бәчымы чичи гәрәке ышты јод? Чымы дардым һесте.
-Зә, кәхәлизи зоә, дарды һесте, бывот ыштә дарди, быдә азән бызным, ышты коврә дәжејдә, һәни аләми бәјәнды бочи жәјдәш?
-Ыми рост вотејдәш, сыханым ни бәты! Бәмы зангыш кардә чәмә Толышыстони сәдо рәдио бардәкәси, манги 20-дә. Вотејдә ки, маштә чәмә иде, ды-се кәлимә бывот, быдә быросным бә толышон! Вотејдәм бәј ки, шинә Биләм, ыштән чок зынејдәш, аз һежо һозым ыштынән, ыштә хәлғијән хыдмәтәдә. Интаси гыләј чиј һесте ки, ијунә манги 21-дә аз быәним Ланконәдә. Әве тикәј чок бенибәше. Шык бә Хыдо Республикә елон кардәкәсон һәммәј сәғин, әвон бывотон, чок бәбе. Беәјән бә нијони-бә ошко чандә кәсон ијо-әјо бә вот-вожин ки, һичмәсә, аз һежо бә чәш дәфырсынејдәм ыштәни, бә һар мәсәлә горәнә мысоһибон дојдәм, мәғалон нывыштејдәм, тәшвиғ кардејдәм ыштәни. Есә ын мысоһибән бәдом бәты, һежо ым маштә чандә кәсон лыв пебәчокнен ки, бочи чә Республикә Президент, ја әв елон быә ружи әјо быә ҹо шәхсон манде-манде, ым ыштәни бә мәјдон шодојдә бәнә әнәшыштә чамчә? Әве, бәвон овардош, мәслоһате!
Ҹәвобәдә чич бывото бәмы, чоке?
-Бывот, быдә азән бызнымәни...
-Зә, бәвотеме, әмма тарсејдәм ки, бовә нибәкардеш!
-Зә, һәлә ты бывот, чәјо бәзнемон, аз бовә кардыме ја не?
-Фәғырә боә вотејдә ки, сәросәр и һафтә бәнав нывыштәме бәчәвон һәммәј ки, бәс навәдә чәмә ид омејдә, ки пијејдәше кәлимәј бывоты бә рәдио? Сығику сәдо бешә, чәвон һичкику бешәни! Әве мәҹбур мандәм, ижән овардејдәм бәты.
Чич вотејдәш, бовә кардәнине ым сыхан?
-Һа, ым тикәј гонә суале, быми синәдәфтәр ҹәвоб дој әбыни! Имкон быдә, тикәј бәштә бом...
-Чич бе, пәшјә биш?
-Зә, пәшјә ныбум, чич быкәм чән? Жыго сыхан вотејдәш ки, зоәм бәпије, әј мәсеәдә, сәпо манде бызны! Чокнә јәне һички ыштә сәдо бекардејдәни, кәлимәј вотејдәни? Жыгоән рысвојәти бәбе?
-Аз нывотыме ки, тынән ыштә рангинә сыханон бәмы бывоти! Чымы гыно чиче ки? Чокнә бәмы вотәшбе, жәгоән вотыме бәты!
-Зә, детым ко није, сәрәсәјм тыни! Мәсәлә бымәдәј ки, чымынән ыштә дардым һесте.
-Һәлә бывот, бәшты дарди һејран!
-Зә, азән ды-се руже быми-бәј вотејдәм ки, ды се кәлимә тәбрик бынывыштын бо Иди, бәмынән һички ҹәвоб дојдәни. Мандәм ды дынјо мијонәдә аварә-сәргәрдон, ыштәнән зынејдәним ки, чич быкәм? Һәни ә одәмон бочи елон кардејдәбин ын Республикә? Чәмә планон һәлә хәјли гешбин, вотејдәбимон, китоб вадәмон бо Иди. Кыве, һәлә вејни одәмон бәчәмә бә ҹывонә зоә парсон ҹәвобән дојдәнин. Ым чы руже әмә мандәмон, хосә Хыдо?
-Һа, винде? Ладинәку де пыт-пытиш демы! Есә зынәј чымы дард?
-Зә, мәвотбән, чәмә дыкәсијән дард һежо игләјебән! Чы әҹәбы карде, воте бәмы, аз ыштән-бәштә һежо бә фикир-фикирбим ки, бәки бывотым ыштә дарди, тәј быкәм ыштә дыли?