hА ВЭЛИША!

ҺА ВӘЛИША!

Деғыж

V

Алјәбоди рост биш, пијо Гырдәсәј,

Кали ахмәх вотедә әв “Кырдә сәј”,

Нишо быдә бә һәкими әчәј сәј!

Кырдон чәмә амјәзон, сыханим ни,

Кырдисән јол бо толыши ғәним ни!

 

Банди сәдә Ләмон, жијо Кырәву,

Сор дырози егәтәше һыры-ду,

Выл-вәнәшәј гырдо, омдә вәшти бу!

Нәнәш халә чокә бозбаш әпати,

Чилә кырне чәмә шынги әвати!

 

Ардәвилә, Ордаһал, чәјо Ныҹу,

Вамәзғони чәј арәдә гыләј ҹу,

Шынгәдулон, чәјо омдә Аләру!

Аләружон чәмә хәлғин, толышин,

Чәвон поәј Мығонәдә быныштин!

 

Аләрујо дәвард, быши бә Оранд,

Жинтонәдә мандә диј ном Шинәбанд,

Нијәвуте, Лујәконе, Быләбанд! 

Чы мәһоли сәбәсон орандыжин,

Орандыжон ән ғәдимә мәдожин!

 

Быләбанди жијо Хәлифәкужәј,

Ҹангәмијон ијән Оснәғәкужәј,

Пијо Амбу, лап бә пе Перзәкужәј!

Оныгынош, петатиш бә Барзәву,

Чәјо сару бомеш бәнә авәву!

 

Было һајме Нилнәбәрә дәвардиш,

Было һони ови һукман пешомиш,

Чәјо дәгәвәдә һындыл бычыниш!

Былоһајми гандым бә даст әвони,

Ә гандыми быһор, бәһә чәј нуни!

 

Рујәдылә жинтони ном Гогово,

Сори һар вахт гындә әјо дыјо во,

Әјо моәку бә Баләддин Вешо!

Чымы Инә дечәј Моә амкинә,

Ханымнисә - гыләј ханымә кинә!

 

Осјо рујо оваштиш, Мондигоје,

Жинди, Пенди ижән Мијондигоје,

Выл-вәнәшәј һар тәрәф, чимәнгоје!

Гыләј Хыдо бәлон мондиговыжон,

Бә һар кәси әвон гыләј ном бәнон!

 

Бандәкужә, Андурмә, чәјо Чајру,

Банди бә дим бәвиндеш ты Рывару,

Жәго шәним, бәним һич вахт чәтонру!

Чы мәһоли ном Пирон – пири-Шыхон,

Шых Заһиди Вәтәне Толышыстон! 

 

Һыледә коч Бобоки дасти ризәј,

Чәј пенсәдә пемандә “Ғәлә Бызәј”,

Кочи дылә дәше кам мерди һынәј!

Дәшәкәси сәј мујон биз-биз бедән,

Чәмә бобон руфон әјо чамедән!