hА ВЭЛИША!

 

 

 

 

 

 

 

 

 

ҺА ВӘЛИША!

Деғыж

III

Дәдәмон кә рој сәпеје, һәварде,

Һички һынә ныбе чәјо дәварде,

Дәдә де зуј дәвәт әкәј бо һарде!

Симәварыш әгыли де фыш-фыши,

Һынә һесте, чај пемәшом ты, быши!

 

Ныможбывот, хәјмандә мерд, нунәдә,

Мердон һәммәј данә әби һынәдә,

Одәми дыл һовуж бәбе чанәдә!

Бо дустијән, бо һампоән дыложбе,

Сәдәш һежо “Бухара кыло” һестбе!

 

Мәдинә нәнә - гләј речинә женбе,

Номнозыкбе, тындә миҹозыш һестбе,

Әмма әчәј патә локу бә номбе!

Бырзә локу жәго әпат әбыни,

Чәј ләзәтән чымы гәво әшыни!

 

Фәрмон, Рәмәзон, Әслан һәм Ғәһрәмон,

Се быјәшон мардә, мандә Ғәһрәмон,

Әзәмәт, Азадә - ханымә мојнон!

Ҹон әвотин, ҹон әмәсин дејәнды,

Выли намтә сыхан нәкәјн бәјәнды!

 

Јолә фәрзәнд чымы пыәбе – Фәрмон,

Софә дылбе, әмма хосијәтыш гон,

Рангыш гарде, чоке, мәгард бәчәј тон!

Рукә гылон һәммәј “Гәгә” әвотин,

Һич чәј тоно јавә сыхан нәвотин!

 

Чымы моә пыә - Билал рә мардә,

Чоглә сәғыр бә Нәнә уму мандә:

Бәгимәғә, Шамил, Нәнәш, Фәрхәндә!

Һич Хыдо бәндә ныманды бепыә,

Һич нәнән ныбу бешујә, дастбырјә!

 

Һавдә синдә вәју омәбе Инә,

Фәрзәндоныш - пенҹ зоә, шәшән кинә,

Јонзә әғыл перосне јолә һынә!

Ымон һәлә бәјжи мандә әғлонин,

Мардә әғлон һич бә һисоб омдәнин!

 

Чымы һовон: Һејран, Һәдјә, Ајбәниз,

Гулбәниз, Зумруд ијән Баләбәгим,

Хыдо быбу бәчәвон һәммәј рәһим!

Се гит һовән, һәммәј јәндысә речин,

Ајбәниз де Гулбәнизи икизин!

 

Јолә быјәм Меһиббәте, чәјо аз,

Фикрәт, Акиф, охонәвәчә Араз.

Хыдо быкә чәвон коон тумотаз!

Шәһид быјәм Акиф, Хыдо рәһмәткә,

Чәј игләли – Фатимә бахтәвәркә!

 

Һа Вәлиша, бој огәтым ымони,

Оваштым аз бәштә ыштә дастони,

Ошко быкәм боты ыштә нијони!

Бызын кије Әбосзодә Фәхрәддин,

Бочи омә әв бы фани дынјо дим!