hА ВЭЛИША!

 

 

 

 

ҺА ВӘЛИША!

Деғыж

II

Һа Вәлиша, есән гуш быдә бәмы,

Гуш дој зыне јол бәкарде одәми,

Јолә мердиш, Хыдо јол быкә тыни!

Хыдо быкә ышты ҹони сәломәт,

Жыго быжи, мәзын чиче мәломәт!

 

Чымы сыхан һәлә нимә рәсәни,

Дылым пуре, нороһат кардәм тыни,

Тыны Хыдо, чок-чоки бымәс мыни!

Гәп быжәным ыштә умри сыфтәку,

Хыдо шојде, песохтәним ыштәку! 

 

Сәғбу чәмә билә - Рәззағ Хансыво,

Бекардыше ын мәлумот архиво,

Дывомандим, шәв-руж кардәм бәј дыво!

Доше бәмы чәмә тобјә шәҹәрә,

Аз бывотым, тынән бызын, чы ҹур бә!

 

Аз бә дынјо омәјм Быләбандәдә,

“Быләбанд” не, әслән “Было бандәдә”,

“Было” ки бе, зынәкәс ни бандәдә!

Һар кијәнбу, Хыдо рәһмәт быкә әј,

Вырәш вәјште, ғысмәтышән дыво чәј!

 

Сеглә кужә һесте Быләбандәдә:

Әғәмали, Алимәмәд, Ләләванд,

Есә һәммәј бән дејәнды хышәванд!

Чан соронин бә иврә маш кардедән,

Иҹо бә кон, бә иҹоән һардедән!

 

Чәмә бобој Әғәмали, чәј зоон -

Әбос, Һејдәр, ижән быә Меһрәли,

Әбоси зој Алијәбос, Әмрәли!

Певатәшоне һар гылә чанд әғыл,

Вахт ки дамә, огардән быән нәғыл.

 

Чәјо омдә Мәли - Фазил чәј зоә,

Фазилијән ды кинәш бә, чо зоә,

Кәвонышән Ланконыжә Мәдинә!

Чандә сорон де шојвошон жи кардә,

Зәһмәткәш бән, һәлолә нуншон һардә!

 

Дәдә Фазил гыләј пәтјорә мердбе,

Диарәдә бәј зу омәкәс ныбе,

Ном-сандинә һампо, һежо бә номбе!

Хәј-шәрәдә даст әгәти бә һәммәј,

Кәхыванди нәштә кијон әв сәнәј!

 

Ком һамсијә кә ејәжи, ко әкәј, 

Фазил дәдә лап сыфтә сәдо әкәј,

Бебәј һички һич кој навәжә нәкәј!

Кәсојбисән бәнав әвој әрәси,

Дардәзынбе, һәммәј дарди сәрәси!

 

Зу әжәни лап бәнә пәһливони,

Һәвәс әдәј бә коәкон, кәвони,

Ыштә ружи диво сәпе дәвони!

Есән вотдән рәһмәтманд бәчәј гури,

Һәммәј вотдән чәј чоки дылипури!