ЖЭЛЭВОНОН ЫШТЭНБЭСЭ ВАДОШ, КЭФЭН БЭДЫРНЕН!

Амјәзо

жәләвонон ыштәнбәсә вадош, кәфән бәдырнен!

Занг омәј бә Скајп. Бәнем Амјәзоје! Де шојво ҹәвобым дој. Әмма кам манде пәшимон быбум бәштә ҹәвоб дојән! Амјәзо ранг сијосәмутәбе! Сыфтә ыштән-бәштә фикым карде ки, мәвужи, бә Һәшиш доә ыштән, әве рангыш жыго сијо быә. Әмма чокнә ки дамә-диним карде, бәнем, не, ым “һәши ко” ни, Амјәзо хун гырд сијоје, әве жәше бешә бәчәј дим!

Сәлом, кәлом, чәјо вотем, зә, ышты нәнә ышты хәј бывинды, чиче, рангы бочи жыго сијо быә?

-Ныштәш кәдә, мәһоли хәбә ни, жыго бәвотешәни!

-Зә, тикәј шини бынә ыштә зывони жијәдә, чәјо гәп быжән, һа зәһә һымбә! Гәви окарденҹән выл војдә ышты гәво! Чиче ижән бахтәвәрәти һандејдәш бәмы? Дам һардә, им доәни бәты? Веј пәхыләти омејдә бәчымы кәдә ныште, ышты вәј гәтәкәс ни ки, бој, тынән езук бој чымы тоно! Ыштә сыхани бывот, вәрсәғе мәвот!

-Чы сыхани бывотым ки? Иглә-дыгләје бәгәм?

-Бино быкә лап чәј јолә гыләо!

-Зә, хәбә һесте ки, јамән сәмандән чәмә кути Шәбәкәдә?

-Дышменебу, огәт боштә, чәмәкијонбун, бывот быдә бо!

-Дышмен быәбәј, һәни ышты бәј бочи кујејдәбим? Ыштән әдәјмәни чәвон ҹәвоби! Дард бымәдәј ки, һежо чәмәкијон есә дышменисән јавә быән! Ыштәнән зынејдәним, чич ҹәвоб быдәм бәвон?

-Һа, чокы воте, ышты һынә ни бә “толышон” ҹәвоб дој! Ты “бәштә” тыркон чокә ҹәвобон дојдәш! Толышон вадә бәчымы еһдә. Бывот һәлә, чич быә?

-Есә бәвотеш, ғыјбәт кардејдәм, јаанки һәнијән јавә, һичмәсә хәбәрчинәти кардејдәм!

-Һәлә бывот, чымы һовсәлә гырд танг бе! Чәјо бәвотем ғыјбәте ја хәбәрчинәти! Ышты кој ном һежо “хәбәрчинәти” ни бәгәм? Информасијә ҹанги сәдә шејдәш, мәһоли чы сәо бә сә хәбонән һәммәј бәпе ты быросни бәмәәни! Әмә бәпе чокнә хәбәдо быбәмон чән чич һесте, чич ни Шәбәкәдә? Чымы вахтым ја һәвәсым һесте, дәшум бә Шәбәкә? Ыштә ҹигә ғојм быкә, тәјкә ыштә дыли! Чич вотејдән ижән, чичон нывыштејдән?

-Шәфаәти зынејдәш? Чокнә һырдәне?

-Зә, һырдән бочи бејдә, номхыдо, јолә мерд быәнине есә! Аз бә вахти әј виндеәдә һәлә һырдәнбе, воте пијејдә ки, һәлә јол быәни?

-Зә, быбује, лап мерд быбу, чымы деми ком ни! Чокнә одәмехо? Охо аз һич виндәмнијән әв!

-Одәмејәни, чич бывотым? Бывотым, али тәһсилине, чокә әғрәноме, чокә коммерсанте, чокә хыјзонхыванде, зоәсојбе, кинәсојбе, коми бывотым охо?

-Ышты кәјнәныбо, хугә Деғыж! Һич нызнәме тыни сәросне! Зә, бәчымы чичи лозиме, бызным чәј сәвод чиче, сәнәтыш чиче, ја чан гылә әғылсојбе? Бәмы лозиме, умутым ки, әв чокнә толыше?

-Жыго бывот, һа бахтәвәри зоә, азән бызным, чичы пијејдә чымы ҹони! Лап толыши лестыје! Вәс кардејдә боты жыго ҹәвоб?

-Дард бымәдәј ки, вәс кардејдәни!

-Бочи?

-Зә, “толыши лестыән” жыго сыханон бәнывыште Шәбәкәдә?

-Мәсәлән?

-Һәлә әј вотејдәним ки, шәв-руж ышты пәли кујејдә, гәвомәј вотејдә ышты думо...

-Тикәјән нез бој бә мәғсәди.

-Вотејдә ки, мәвотбән, ышты һич хәбән нијејбән сијосәтику, елмику, чыбызным, һәни чичон ијән чичон!

-Һежо ымони огәтош, чоке! Һар одәми ыштә нәзәрыш һесте, фикирыш һесте, жәго зынејдә, жәгоән вотејдә! Бә нәзәри горәнә одәми нибәкыштен ки! Есә аз мәҹбур кардәниним әј ки, чымы сијосәткорәти, алимәти әв чок-чоки умуты?

-Бәс вотејдә, 25 соре тыни зынејдә!

-Не, анә әбыни. Чумчыко, ҹури бенышу, 25 сор бәнав әв һәлә ја ыштә моә болоәдә әзни бе, јаанки Ләмони кәфшәно чилә әзни кырније боштә нәнә! 21 сор чыми бәнав таныш быәмон. Әмма ымијән бынәмон бә и кәно. Ыштә сыхани бывот.

-Зә, чандә вахтонин егынијә толышон сәпе ки, мәвотбән, Деғәдә жијәкәсон һәммәј кырдинбән! Әштејдә, ныштејдә, һежо вотејдә ки, “Гырдәсә” че кырдон дије! Толышонән сәдо кардејдә ки, чиче, чиче, дуст бе гәрәке де кырдон!

-Һа, ым гонә мәсәләј! Жыгошә тикәј де еһмоли бывот ыштә сыхани думој, азән бунум, бочи жыгоје. Аз зынејдәм ки, әв веј вахтику жыго ашығе бә кырдон, ыштәни шәһид кардејдә чәвон роәдә! Әмма һәни бы јоли рысвојәти һич бәчымы ағылән нәвој!

-Охо әв Гырдәсә вотејдәни, “Күрдәсәр” нывыштејдә, быми чич вотејдәш?

-Чич бәвотем ки, дыглә изоһыш бәбе чы парси: Ја ахмәхәтику бәзне воте ым сыхани, ја де гыләј хысуси мәғсәди! Ахмәхәтику вотејдәбу, һич ајбыш ни. Ахмәхи вотәј, нывыштәј чич бәбе ки! Әмма де мәғсәди, зыне-зыне вотејдәбу, чыми ном дышменәтије! Јәне әв анә дышмен быә бәштә хәлғи? Һич бовә карде зынејдәним! Охо әв чымы әј зынә вахтонәдә чокә толышбе! Әв ки чок зынәнине, Ликәдә “Күрдәсәр” номәдә ди ни! Бәболыш бәштә гиј, бәс чә диј ҹәмати бочи тәһғир кардејдәбу?

-Зә, нывыштејдә ки, мәвотбән, сыпә сорәдә кырдонышон овоштынијәјбән бы вырон, Лики Деғи мәһоләдә жијә толышонән гуја чәвон орығ-торығонинбән! Жыго чијон быән ки тарыхәдә? Јәне әв анә чок зынејдә ым тарыхон?

-Зә, әғрәном де тарыхи мышғол беәдә жыго бәбејәни! Ым тарыхон һәммәј мәлумин: ки, кејнә, чан гылә кырдә тојфоныш овоштынијә бә есәтнә Озорбојҹони зәминон. Интаси чәвон һич гыләјни муј намтән аидијотыш ни бә Толыши! Толыши ыштә “кырдоныш” һесте. Әмә бәштә голышон кырд бәвотемон. Бәлкәм ымоныш мәсәбу?

-Чыбызным, чичоныш мәсә? Әмма шәв-руж мәхлоғи сәј хәроб кардејдә! Әмә бә һәрәкәтимон ки, де тәһәри бытожнәмон Толышо тожә әјо овоштынијә быә кырдон, ым гыләј ғыјәҹулә быә, даст кәшејдәни чәмә ҹонику, һежо “кырд, кырд” ҹар кәшејдә бә дынјо!

-Валлаһ, аз чич бывотым? Чымы тоно ни ки, умутым, чиче чәј ләвә дож, бочи жыго гәвомәјон нывыштејдә, мәғсәдыш чиче, бәлкәм мәҹбур кардәкәс һестебу әј? Дастым рәсејдә ки бәј? Чымы дасто омәј ыме, нывыштыме ијо ки, быдә һандәкәсонән бызнын ки, вәзәријәтин жәләвонон нывыштәјон! Чымы ком није, бәки меһиббәтыш һестебу, бәки ашығ-мәшуғебу, быбу, ыштән бәзне, әмма ыштә ғәмиши окырны толышонку!

Гыләј зәһмәтән быкәш, бывғанд бомы чәј нывыштәјон, быдә ыштән де дығғәти баһандым, бәлкәм осәмәјм чәј мәғсәди. Ым гәпи һәлә ки ијо огәтәмон, вотејдәм, бәлкәм һандыше, ағылыш бә сә омәј. Боме, боме, нибоме, ҹоныш быбу сәғ, омә сәфә жыго бәнывыштем, зиккәш бә осмон рост бәбе! Чумчыко жәләвонон ыштәнбәсә вадош, кәфән бәдырнен!