МОРИ МАМБУРЫШ ЭПИНИ, ЭВЭН БОМЕ БЕБЭШЕ ЛАП ЧЭJ ЛОНЭ ГЭВИСЭ

МОРИ МАМБУРЫШ ӘПИНИ, ӘВӘН БОМЕ БЕБӘШЕ ЛАП ЧӘЈ ЛОНӘ ГӘВИСӘ

-Јалла, хосә Амјәзо!

-Јалла, хосә Болим! Һәши чыконҹо бешә? Ышты сәдо мәсе һәвәси! Чы әҹәб ыштыку, парсејдәш чәмә кефи? Сәдоән машалла лап незику омејдә, чиче чәмә мәһоләдәш?

-Һа, шинә Амјәзо, омәм, ијом!

-Ым ҹо мәсәлә! Омәш, веј хәш омәш, чәшонсә вырә һесте!

-Зә, кефику омәниме! Дарди пегәтәше мы, омәм.

-Зә, Хыдо ныкә, дарды быбу! Чич быә, һәлә бывот, дылым тәкәј!

-Наһанде ымруж  taleshi.irib.ir  сајтәдә бешә материал?

-Һандәмни, чы материале?

-Зә, лап мәтәл мандәм чәмә ироныжә амјәзон дастәдә! Һич шәјтонән сә бекарде әзыни ки, әвон чич кардејдән, чы сијосәт бардејдән? Әмәнән ки, пәшимоним гыләј сыхан бывотәмон, тәнғыд быкәмон чәвон сијосәти, әлбәһол чәмә “моминон” ыштә шулон елошкынејдән, дијәни тырш кардејдән, жыбызын, әмә дышменимон!

-Зә, ты һәлә бывот, чичышон нывыштә әјо, чәјо гәп бәжемон!

-Чич бәнывыштен ки? Материали ном жыгоје: “Озорбојҹони Республикәдә быә Ирони сәфири нывыштә китоб”.

-Ты вотеј пијејдә ки, Ирони Бокујәдә быә сәфир китоб нывыште әзыни? Чич һесте ки бымәдә, анә һај-ку еғандә, сә пегәтә чә мәһоло бешәш омәш бәчәмә мәһол? Сини бы вахтәдә ко-сәнәты мандәни һәни?

-Зә, нәнәмардәј зоә, хәбә ныстәнәјхо, чичи һәхәдә нывыштәше бә “вәјә кәлә” мандә сәфир Пак Ајини!

-Һа, чокы воте, чич һәхәдәј китоб?

-Тарсејдәм, бәвотем, бәжеш барыштеш ыштә компјутеријән!

-Мәтарс, бывот, нибарыштем!

-Чок, быдә ышты вотәј быбу! Сыфтә ыми бывотым ки, Ислами инғылоби 35-нә сорогардә ружи чә китоби едаштемонә мәросим быә. Бы сајтәдә нывыштә быә толыши зывони вејән чок сәрәсе бејдәни, әмма аз жыго дәрәсәјм ки, китоби ном жыгоје: “Озорбојҹони де Ирони даими дустәтијәдә Һејдәр Әлијеви хыдмәт”. Чокоје?

-Вај пыәм вај, вај моәм вај! Кешкә ты ыми һич вотәнәбәј бәмы! Ым чо јолә рысвојәтије, омәј бәчәмә сә? Зә, рост вотејдәш?

-Ышты том, деты зәрфәти быкәм? Чокнә һесте, жәгоән вотымејәни! Есә сәрәсәјш, бочи дарди дасто сәм пегәтә омәм бәшмә мәһол! Әјо мандәбәјм, вәш әгәти ә мәһол әвәши! Роәдә оме-оме, ғатәри һар ды тәрәфо отәш рост бејдәбе, чымы сәј тәпәо бешә отәш!

-Зә, ә Һејдәр Әлијеви сывој ыштә тојфә бә һички пуши ғәдәрәдән чокиш быәни. Бә әтрофәдән чан гылә довләт һестебу, чәвон дыләдә ән јолә бевәҹијонышән кардә бә Ирони! Ым сәфири ки, нывыштәше жәго гыләј китоб, әв ја камсәре, ја әвоме, һичи сәрәсејдәни бы дынјо сијосәтәдә! Һ. Әлијеви бә Ирони кардә бевәҹијон, лап дырыст бывотом, бә Ирони жә доғ һәни ки жәше? Бә вахти Ирони рәһбәроныш бә шинә зывон гәте, әвонән дастәк ныбин бәштә толышә боон. Һежо чокнә ғојмыш карде ыштә вырә, гыләј ҹыфтәш жәј бә Ирони ки, тосә есә чә ҹыфтә риз мандә че Рәфсәнҹани сәдә, чәј доғән мандә ҹәми ироныжон дыләдә! Валлаһ, ым ироныжә сијосәткорон ијән дипломатон бәштә ангыштә пепуштәшоне ыштә һәмвәтәнон!

-Һа, чичбе бәс? Машәнәку бәмы бә сә-сыханбиш ки, ко-сәнәти тумым песијә! Чокој боты?

-Зә, кәхәлизи зоә, аз чыбызным, чы китобе? Вотем һәлбәт зәрфәт кардејдәш! Зә, Һ. Әлијев ыштән дәҹҹолбе, чәј дустән шәјтонбе. Ыми бы дынјоәдә чәј зынәкәсон һәммәј жыго зынејдән! Есә жыго бешејдә ки, иглә ироныжон әј дуст зынејдән боштә?

- Һәлә ироныжон бынәмон бә и кәно. Ым Ирони Толыши рәдиоәдә ко кардәкәсон һежо чәмәку бә но-гырәјин ки, бочи толышон гуш дојдәнин бәчәмә рәдио? Зә, бәболәжә толышон чокнә гуш быдән бә жыго хәбон! Воте, мори мамбурыш әпини, әвән боме бебәше лап чәј лонә гәвисә! Толыши иминә дышмен быә Һ. Әлијев, чәмә ироныжә толышә быјонән де фәхарәти нывыштејдән чәј һәхәдә ыштә сајтәдә, ым мәлумотијән жәгоән һандејдән ыштә рәдиоәдә, һәлә тәләбән кардејдән ки, әмә быныштәмон шин-шини гуш быдәмон бы хәбә! Бә одәми дымжон быдон, бәсә бымисә чок бәбе! Мәшәди Ибади вотәјнә, бәмә мәјмун вотешон каме, һәлә гыләј сәломән дојдән!

-Есә әмә чич быкәмон, ыштә дарди бәки бывотәмон?

-Бәки бәвотеш, быши бәштә куләтоныжә моминә быјон бывот, мәвужи әвон сәбәрәсен ышты дарди, чәј дамонијән бәвотен бәты!