ТОЛЫШОН, FЫБОНЭ ИДОН БУД БЫБУ!

ТОЛЫШОН, ҒЫБОНӘ ИДОН БУД БЫБУ!

Мирфәјаз Ликмәкани

Ижән омәј рәсәј ымсорнә Ғыбон,

Дәвонедә ым ружи һа мысылмон!

Јамән шојвоәдәј пәсәвон-гәләвон

Чумчыко бәстен чәвонку мол-һәјвон!

Ләзи ым сыханон бынәм бә кәно,

Быкәм бошмәро тарыхику бино!

 

Һесте бы Ғыбонә ружи веј дәлил,

Хыдо роәдә бырнијәнинбе Исмојил.

Бәчәј горә ки, чәј пыә Ибраһим

Ружон и руж мандә де Хыдо вәдим.

Бә дывобе, Хыдо быдә зоә бәј,

Чәј роәдә ғыбон быдә әвән әј!

 

Әһди мәно веј гышоте, веј нығыл,

Гирәм Һәҹәр мандедәбу бә әғыл.

Бә дынјо омәј Исмојил, ном сәше,

Ә Исмојил бә Хыдо ғыбон бәше!

Чан сорон шин, Исмојил нуперәсе,

Ибраһими виндыше һәни вәсе!

Чәј ды чәши рушнәје, әғыл шине,

Әмма әһди бә вырә роснәнине!

 

Һол-ғәзијә әј гәп жәше бо зоә,

Дынјо номәј бә Хыдо ғыбон доә.

Исмојил дамә бе, вотше: -“Шинә пы!

Мадәм әһыдбастәбу де Хыдо ты,

Сәһе кардәш, мыни ғыбон быредәш,

Мәбәм, аз бывиндым тыни сыредәш!”

 

Илаһи, ым чы меҹузәбе охо?!

Ибраһими пегәтше тижә чәху,

Һа чәхуш дәсујәј, чәху ныбыре,

Ше бә думот сыре-сыре: - “Чы сыре?”

Һа ыштәку кардыше әкә-гырә,

Росне зындәни ым әһди бә вырә!

 

Исмојли тов варде нызнәше, воте:

Пы, чымы чәшон сәпе дәбаст, оже!

Әве дасты омдәни бо обыре,

Чәху ныбырје зындәныбе - сыре!

Ибраһими бы гәпон әмәл каше,

Чәшоныш епуште, чәхуш бекаше.

Ижән пијәше Исмајили обыро,

Ижән бо бырне Хыдо ныдоше ро!

 

Һежо бы әрәфәдә Хыдо гыләј

Ғочыш ғәјбо варде, доше әнә вәј!

Дастон, чәшон окардыше чы зоә,

Сә дәше ки, Хыдо ғәрор ғоч доә!

 

Чә ружнәку Ғыбон кыште бе адәт,

Пебәгәте сә дәшәкәс веј ибрәт!

Есән ә адәт кардә бедә дәвом,

Әмма веј чијоныш дәгиш бә тәмом!

Чоко омедә Ғыбонә руж һәни,

Һички бепул “ғочи” есәт дојдәни!

Әрбобонән ше-ше гырд чынығ быән,

Косиби јод вардәнин, сығдыл быән!

______***______***_______

Аз ағылдәрәс бејку жимонәдә

Виндыме толышон Толышыстонәдә

Ғыбонә ружи де јолә тәнтәнә

Дәвонедән ым азизә әнәнә!

Ибраһими зоә Исмојли хото

Ғыбон бырнедә ғоч, мол-мәлә һа со.

Бә һар кәси роснедән тикә-тикә,

Хыдо һәмә ғыбонон ғәбул быкә!

Һар кәсиро һәзо гылә ид быбу,

Толышон, Ғыбонә идон буд быбу!