Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Оцените содержание статьи?
БОЧИ ЖЫГО НОМЕРДИШ, ДЫНЈО?!
Хыдо комәг быбу бә Мирфәјази! Пәјнә шанго вардәшбе ыштә ноутбук, нохәшхонәо зангыш карде бәмы, 2-3 саат һәмсыхан бимон де чымы Шинә Дај Мәһәррәмәли Нәҹәфови! Хәјли вахтбе дылыш дәжејдәбе, инфаркт быәбе. Воте Әләкрәми бә Јереван ше хәбәм мәсәј, чәјоән һандыме ышты мысоһибә, окыријәј чымы дыли дож! Анә шој-шој кардыше, лап бәнә корпә әғылибе! Хәјли вотыше ыштә дыли дожику. Вотем, зә, кәхәлизи балә, чымы дајон дыләдә гыләј фәрә гылә ты мандәш! Нығо быдә ыштәни бо Толыши озоди ружи! Әмә һәммәј, иншаллаһ, Ланкони мијонәдә бә тәнтәнә гырдә беәдә, Ты ныбош әјо, ләзәтыш әбыни жәго Озоди!
...Толыши озоди роәдә бә мыборизә иминә мердон сәпо әштә ружику чымы ә фәғырә Дај дејәвон и рестәбә быәбе. Бы охонә 25 сори дыләдә конҹо быбујән, де кон кој мышғол быбујән, хәјәдән, шәрәдән, һежо Чәј дыл де Толыши быә! Һежо чәмә хәлғи тәблиғотыш бардә, һежо бә толышә ҹывонон танә жәше ки, гәп быжәнән ыштә Нәнә зывонәдә! Нәфәсыш һежо де Толыши шә-омә! Иглә чокә кошән ым быә ки, һич вахти хәјонәт кардәшни бә Толыши! Лап кали вахтон, ҹурбәҹурә сәбәбон һыҹубәто һәрәкотику тикәј дијәро егыноән, һәватәшни Толыш, овыш лил кардәни!
...Жыго де һәвәси, сыре-сыре гәп жәјдәбе, одәм ыштәнән бә һәвәс омејдәбе! Ки әзни воте ки, ружи бәпештә тәрг бәка әмәни! Гыләјән чијыш воте бәмы. Воте, асбардәме бә әғылон ки, мыни Бинәдә дәныкандын, быбән бәчәмә дијәдә дәкандын! Ым гәпон әв жәјәдә, һарки быәбәј, сырә әвој бәј! Охо ки бовә карде әзни ки, ыштә вәсјәти кардејдә Мәһәррәмәли Дај?
Ымышән воте: Кинәм омәбе чымы тоно, виндыше мы, дәманде бо бәме! Вотем, һа чымы балә, мардәнимки һәлә, нохәшимәни, бочи бәмејдәш?
Аз огардим вотыме Бәј: Шинә Дај, ә кинә балә чок кардәше! Чумчыко чәмә толышон пемужијән ки, одәм дасто ше бәбештә быбәмын боәј! Әмә һежо ыштә јолә мердон ғәдымон зынә әвон марде бәпештә! Әмма марде бәпештә бәме чы фојдәш һесте бо одәми? Бо одәми бәпе чәј бәјжијәтијәдә быбәми, Шинә Дај! Әһсән бәшты кинә!
Ај номердә дынјо! Һәлә чан гылә доғ жәј фикәдәш бә Толыши? Һәлә чан гылә зоон чәмә дасто сәј фикәдәш? Ләнәт быбу бәты, номердә дынјо, камфырсәтә дынјо! Ләнәт быбу бәты ки, сәјдәш чәмә дасто жәго мердон! Кон сыхани бывотым, коврәј гәпи быжәным, чичи огәтым, чичи бывотым? Әв кон сыхане ки, аз есә бынывыштым әј, лојиғ бәбе бо Мәһәррәмәли Нәҹәфови мыборәкә шәхсијәти? Ни жәго гыләј сыхан! Һәјф! Һәјф жәго мерди!
Ышты сә сәломәт быбу, Толыш! Охон ғәмы быбу, чәмә хәлғ! Охон јасы быбу, Толыши Озоди һәрәкот! Хыдо рәһмәт быкә Нәҹәфов Мәһәррәмәли Киши зоә – Толыши јолә мерди! Амин, ја Рәббил-Аләмин!
Толыши Овҹи һәрәкот, Толышпресс
ҺА ДЫНЈО!
Һәзо сорон һа гардедәш, ро кардәш,
Мердон ехроҹ, номердонсә шо кардәш,
Гужи чокнә нангырику ҹо кардәш,
Шәлә кардәш бәмә гонә дарди бо,
Бочи жыго номердиш ты, һа дынјо!
Вотедәмон, рәһми быкә Хыдо бәј,
Ноҹәш ве беј, жимоныш рә орәхәј,
Мәһрәмәли маму чәмә дасто сәј,
Бә жәго мердијән ныкарде бәфо,
Бочи жыго номердиш ты, һа дынјо!
Золым дынјо, ымы чокнә пеғанде,
Хәлғы чокнә ијәндыку еғанде,
Ширә зоны ыштә кәо беғанде,
Шәғол, рывос мәјдон карде боштәро,
Бочи жыго номердиш ты, һа дынјо!
Һежо ангыл ты бәчәмә тоғи жәј,
Сарды карде чәмә боғчә, боғы жәј,
Вәсе һәни бә Толыши доғы жәј!
Дард нез бедә, шојә ружон дијәро,
Бочи жыго номердиш ты, һа дынјо!
Һытә Толыш, зындәни ым чы дарде,
Хәзри омәј чы бандонку дәварде,
Доон һышк бән, вылон ливә екарде,
Бочи номәј, конҹо манде Гиләво?
Бочи жыго номердиш ты, һа дынјо!
Дардон мыни һа быштедән дыләдә,
И кәсым ни уму әдә, дыл әдә,
Ризвани веј ноҹон мандин дыләдә,
Дучо карде бә вијәвони, дард-бәло,
Бочи жыго номердиш ты, һа дынјо!
Ризван Шыхизодә