РУЖЭМОЭ МАНГОН МЫБОРЭК БЫБУ!

РУЖӘМОӘ МАНГОН МЫБОРӘК БЫБУ!

            Хосә толышон! Чәмә хосә хәлғ! Азизә мысылмонон! Ымшанго Нијәтә шәве. Хыдованди, маштәнәку бино бејдә Ружәмо. Әмә чәмә хәлғи, че дынјо ҹәми мысылмонон тәбрик кардејдәмон де ын мыносибәти, орзу кардејдәмон ки, де хәшәҹони, хәј-сәломәти дәвонәмон ын мыборәкә манги! Хыдо ғәбул быкә чәмә һәмә ибодәтон, Бымәсы чәмә дывон!

            Сорымон донзә манге. Чәвон јонзә гылә һар гылә мысылмон жимон кардејдә боштә ыштәни. Чымы мәно ым ни ки, ғәјмәнә бы јонзә манги әмә “ҹо” бејдәмон Хәлләғи-Аләмику! Не!  Һар гылә мысылмон һар вырәдә, һежо дештә Хыдо быәнине! Әмә ыштә һар гылә кој, әмәли, һәрәкәти бино кардејдәмон де Хыдо номи! Хыдо ном ныбә кардә быә һар гылә әмәл, һәрәкәт бемәно бәбе, бебәрәкәт бәбе! Интаси јонзә манг әмә һар ибодәти быкомонән, дывон быкомонән, әвони де Хыдо номи кардејдәмон боштә ыштәни. Әмма Ружәмоә манги чәмә кардә һар гылә әмәл, ибодәт, дыво де Хыдо номије, һәмән бо Хыдо ыштәније! Бы мәноәдә, әмә һасор јонзә манг жијејдәмон де Ружәмо һәсрәти! Ыштәни һозы кардејдәмон, пок кардејдәмон чы манги һәсрәтәдә! Һәмон ә әмәлон ки кардәнинимон һа руж, бә вырә роснијәнинимон Шәриәти ҹәми тәләбон, Ружәмоәдә чәвон һар гыләјни бејдәше хысуси гыләј мәноијән мәнтығ. Бы мангәдә әмә ыштәни пок карде-карде, ыштәни дәрк карде-карде һәнијән нез бејдәмон бәштә Офәјевони!

            Ружәмоә манги салеһә, сәвобә әмәлон вејин. Бы мангәдә әмә иглә дештә нәфси огәте ыштә вәзифә бә сә роснејдәнимон. Чәсонәку тосә тојки даршијәј вәши-тәши манде, ыштә нәфси етосније, һар ҹурә мымкунә гыноку ыштәни бә кәно окырније – чымон һәммәј быманды бә и тәрәф. Ружәмоә манг – Ғырони нозил быә манге. Һар гылә ружә гәтә мысылмон де һәсрәти ијән јолә меһиббәти чәш кардејдә Әһја шәвон, мыборәкә Ғәдри шәви ки, тосә ружобәј һәммәј бә иҹо быныштын бә дыво ијән ибодәт! Бы мангәдә чәмә чандә кәс јолә Имомон бә дынјо омән. Дынјо һар вырәдә мысылмонон бы манги дырози һа шәв Ифтор дојдән, еһсан дојдән, һәмән чәмә Имомон мовлуди ғејд кардејдән.

            Сывој чымон һәммәј, Ружәмоә манги гыләј јолә салеһә әмәлышән һесте ки, хысусән бочәмә толышон чәј јолә әһмијәтыш һесте. Мәлуме ки, Имом Хомејни (ә) вәсјәтыш кардә ки, Ружәмоә манги 27-нә руж че дынјо һәмә мысылмонон Вәһдәти ружи, де ҹо сыхани бывотомон, “Гудси ружи”  ғејд быкән. Чы ружи мәно әве ки, һәмон ружи мысылмонон һәммәј мыдофиә кардәнинин чәмә зылми жијәдә быә мысылмонә хәлғон, хысусән Фәләстини хәлғи ијән Ислами мыборәкә појтахт Гудси (Јерусәлими) һәхон. Һар гылә толыш зынәнине ки, чәмә хәлғән зылми ијән мәһв бе тәһлукә жијәдә быә гыләј хәлғе. Әве һар гылә толыш һәмонә ружи һәмән бочәмә хәлғи дыво кардәнине. Һәмән иглә һәмон ружи не, Ружәмоә манги һаруж – һар гылә ныможисә, ифтори јаанки чәсонә сурфә окардеәдә дыво кардәнине бочәмә хәлғи, ловәманд быәнине бә Хыдо ки, иншаллаһ Әв озод быкә чәмә толышә хәлғи! Чумчыко Ружәмоә мангәдә дывон һәммәј мыстәҹәб бејдән, рәјрә рәсејдән бә Хыдо дәрго!

            Әве, әмә чәшрушни дојдәмон бәштә хәлғи, һәмән бә ҹәми мысылмонон де Ружәмоә манги даме мыносибәти, һәмән орзу кардејдәмон ки, һар гылә толыш лојиғ быбу бә Хыдо номи! Дыво быкән бә Хыдо, хосә толышон! Дыво быкән ки, Хыдо бымәсы чәмә сәдо! Дыво быкәмон ки, быдә һәнијән нез быбәмон бәштә Хыдо! Дыво быкәмон ки, Хыдо озод быкә чәмә хәлғи!

Ружәмоә мангон мыборәк быбу!