АЗ ЖЫГО ДЫНJО ЧИЧИКУ ТА БЫКЭМ?

Деғыж

 

АЗ ЖЫГО ДЫНЈО ЧИЧИКУ ТА БЫКӘМ?

 

Дынјо номерди дынјоје - мәлуме,

Есә һәни биҹ, вејәзын бә номе!

Мәјдон чәвоне, аспи һа тожнедән,

Рәсәј огәтдән, емәјон выжнедән.

Нә һәјо ни, нә имон ни, нә әдәб,

Беәдәбин, беәдәбин, беәдәб!

Пиједәшоне, бәвон зур быгәтым,

Һәхи огәтым, ноһәхи пегәтым!

Кәкојлә ним ки, боәвон “га” быкәм,

Аз жыго дынјо чичику та быкәм?

 

Гыләјни вотдә, азим чы хәлғи јол!

Чымы жидасти бәнине ым мәһол!

Һа вотедәш, јолбе ышты һынә ни,

Бә ҹо кәси ағл һички јол быәни!

Нә сәводыш ни, нә зындә дынјо кој,

Сијосәт чиче, номыш чиче чы рој?

Ыштә вәзифә дардәдәш, даст быкәш,

Бә нијони де тырки бәш кәшбәкәш!

Мы тыни чокнә че “осјо А” быкәм?

Аз жыго дынјо чичику та быкәм?

 

 

Ышты уму бә Московәј, Бокује,

Чәвон вотәјон боты шин, локује.

Де жыго ағли әве јол, сәккә ниш,

Бәштә орзу ты һич вахти әрәсниш!

Чымы гыно ни ым, аз чичонәмхо?

Чымы нә пулым һест, нәәнки тәнхо!

Аз гынокор ним, бә һичи әгынниш,

Нә толыш ниш, нә мысылмон, одәм ниш!

Кејнә дој бәмы да, аз әј са быкәм?

Аз жыго дынјо чичику та быкәм?

 

 

Һежо бә вонәш, пул ни ки, ко быкәј,

Доә пулонән шедән бә дәдә хәј!

Ты нишо быдә ыштә кардә коон,

Милләт бывиндо, шукур бәкан зоон.

Һәдәр-һәдәри шәр мәғанд ты бәмә,

Ышты бәнавән веј одәм дәрәмә!

Тарсәло сәнәт ни хәлғи сәдә ше,

Һәлә веј зоә бә мәјдон бебәше!

Ыштәни бочи бәшты сә ча быкәм?

Аз жыго дынјо чичику та быкәм?

 

Мы чич быкәм ки, дасто ко омдәни,

Јолјәти бәшты һич вырәј дамдәни!

Де зуј ни һа нодон, ағли мәјдоне,

Ышты миәллим Хыдо ни, шәјтоне!

Бәшты вотәј аз бочи дәгиш быбум?

Ағли дәгижным, һәхи роо бешум.

Аз ки ыштә кој зынедәм мыкәммәл,

Һәхи роәдәм, комәг бәка әмәл!

Меш ним охо, һа әвәсор за быкәм!

Аз жыго дынјо чичику та быкәм?

 

Бә даст-почән ки, гырд быкән милләти,

Туш быкән толыши бә дышмени ти!

Вај бә ружи ки, бәвотеш һәјғәти,

Һу бәкан бәшты сә кул-каинати!

Ҹар бәкәшен ки, һајди, “дышмен тыниш,

Бә милләти овҹи имкон дојдәниш!

Бәло тыниш бо милләти, дод-әмон!

Һаштедәниш ки, толыш бо бә имон”!

Лыкишон ки, бом шымәни ба быкәм?

Аз жыго дынјо чичику та быкәм?

 

Милләти номи бә зәмин ежедән,

Бә мәхлоғи сәј һежо пор дәжедән.

Һежо бә гәпин, вәрсәғе вотедән,

Чыми-чәј думо һа ғыјбәт кардедән!

Нә јол әзынин, нә руки, кин әвон?

Гәләвонин, гәләвонин, гәләвон!

Мәәттәл мандәм! - Чич бынәм, пегәтым?

Коми бывотым, аз коми огәтым?

Мы ки Деғыжим, собуним “ка” быкәм?!

Аз жыго дынјо чичику та быкәм?