ЫМРУЖ ТОЛЫШИ-МЫFОНИ РЕСПУБЛИКА ЕЛОН КАРДЭ РУЖЕ! (ВИДЕО)

ЫМРУЖ ТОЛЫШИ-МЫҒОНИ РЕСПУБЛИКА ЕЛОН КАРДӘ РУЖЕ!

ЧӘМӘ ТӘБРИК!

            Ымружнә руж – ијунә манги 21 толышә хәлғи тарыхәдә ән әломәтдорә ијән шәрәфмандә гыләј руже. 20 сор чыми бәнав бы ружәдә толышә хәлғи номдорә зоон – Әләкрәми, Микаили ијән Әждәри елон кардышоне Толыши-Мығони Республикә! Чы һодисәку 47 руж дәварде бәпештә – августә манги 7-дә Толыши-Мығони Республикә Хәлғи Мәҹлиси елон кардыше Озорбојҹони тәркибәдә Толыши-Мығони Мухтарә республикә. Бы вист сори дыләдә веј нывыштәмоне чы һодисә ијән ТММР-и толышон тарыхәдә быә вырә барәдә, тәһлил кардәмоне ыштә вадоә сәһвон, но-пегәт кардәмоне чәмә Республикә мывәғғәти мәғлубијәти дахыли ијән хариҹи сәбәбон. Жәго кардәмоне ки, быдә вәомәдә ижән ныкәмон жәго сәһвон, һәмән бә нәзәр быстәнәмон дынјоәдә, чәмә регионәдә шә просесон, ә просесон ки, чәвон мыстәғимә тәсирышон һесте јаанки бәзне бе бәчәмә хәлғи һәрәкоти.

            Росте, ТММР-и умр веј дыроз дәныкәшәј. Чәј елон кардејку се манг дәнывардә че Республикә јолон бә ғәрор омәјн ки, тәрг быкән чәмә Вәтәни појтахт Ланкони. Әмма бы дәвардә мыддәтәдә чәмә хәлғи ныпијәкәсон, чәј дышменон чанә шәр бығандынән бәмә, ым гыләј һәғиғәте ки, чәмә Ланкони тәрг карде сәбәб чәмә хәлғ ныбе. Һички воте әзыни ки, толышон ыштән ныпијәшоне ә Республикә, ғандышоне әв. Не! ТММР-и јолон чок-чоки но-пегәт карде бәпештә бә ғәрор омәјн ки, бә вахти чәвон Ланконәдә манде дечәмә хәлғи фаҹиә сә бе әзни. Чумчыко һәм Озорбојҹони дыләдә, һәмән чәмә незә һамсијә довләтонәдә веј зумандә ғыввон һестбин ки, һар вахти һозыбин бочәмә хәлғи мәһв кардејро! Бәвәдә әмә мандәбәјмон Ланконәдә, чәмә хәлғи мәһв карде әзнин. Әве әмә бәвәдә шимон Ланконо. Интаси әбәди нышимон Ланконо! Мывәғғәти шимон ки, ыштә ғыввон гырдә быкәмон бә иврә, тәһлил быкәмон ыштә сәһвон, зывон пәјдо быкәмон де дынјо, сыбут быкәмон дә дынјо јолә довләтон ыштә һәхи, чәјо ижән огардәмон – әбәди огардәмон бәштә Вәтән, бә Ланкон, бә Толышыстон!   

            Ымруж әмә һәммәјәво ид кардејдәмон һәмон ружи – ијунә манги 21! Кәноо веј одәмон бәзнен воте ки, мәғлубијәти чокнә ид карде бәбе? Толышон зынәнинин ки, чәмә дышменон ән јолә сәһв һежо бымәдәј ки, әв мәғлубијәт зынејдә боәмә һәмон Республикә охој! Не, чымы Билон, мәғлубијәт ни әв! Әв гыләј чоје ки һежо вәшејдә, певәшејдә. Әв гыләј чоје ки, чанә толышә хәлғ һесте, әбәди бәвәше һәзо-һәзо толышә зоон ијән кинон дыләдә! Бы идә ружәдә әмә дылисыхт бәзнемон воте ки, һәхымон һесте ид быкәмон ым ружи! Ид быкәмон ки, быдә һички јодо бенышу Толыши-Мығони Республикә! Быдә јодо бенышун ә Республикә елон кардә јолә мердон! Быдә јодо бенышун толышә хәлғи роәдә шәһид быә мердә зоон! Быдә һар гылә толыш ымруж “Сәғби!” бывоты бә Әләкрәми, Микаили, Әждәри ијән чандә гылә ҹо толышә мердон! Быдә һар гылә толыш “Хыдо рәһмәт быкә!” бывоты бәчәмә шәһидон! Быдә јодо беныкән ки, чәмә хәлғи озоди чәј ыштән дастәдәј! Быдә јодо беныкән ки, һар гылә толыш ыштә зувышкәј кардәнине ки, әмә һәммәјәво озод быкәмон ыштә хәлғи, бысохтәмон ыштә мыстәғилә довләти – Толышыстони!

Идон мыборәк быбу, чәмә хосә хәлғ! Бы азизә ружәдә әмә јолә ғырјәт, имон ијән мыборизә орзу кардејдәмон бәшмә һәммәј! Бы идә ружәдә и быбән Толыши гырдоәдә, һозы быбән бо Толышыстони озоди роәдә бә мыборизә! Әмә иншалла бәстемон ыштә һәхи! Бәвәдә Ланкони мијонәдә һәммәјәво рост бәкамон Толышыстони бојдәғи! Жәго рост бәкамон ки, быдә и кәрән әв еныгыны бә зәмин! Быжијы Толыши-Мығони Республикә! Быжијын ә Республикә елон кардә зоон! Хыдә рәһмәт быкә бәчәмә шәһидон! Быжијы чәмә хәлғ! Быжијы Толышыстон!

ВИДЕО : ЫМРУЖ ТОЛЫШИ-МЫҒОНИ РЕСПУБЛИКА ЕЛОН КАРДӘ РУЖЕ! (ТММР-И ПРЕЗИДЕНТ ӘЛӘКРӘМ ҺУММӘТОВИ ТӘБРИК)

ВИДЕО : ЫМРУЖ ТОЛЫШИ-МЫҒОНИ РЕСПУБЛИКА ЕЛОН КАРДӘ РУЖЕ!(ТММР-и ХӘЛҒИ МӘҸЛИСИ СӘДР ФӘХРӘДДИН ӘБОСЗОДӘ ТӘБРИК)