Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Оцените содержание статьи?
БӘ ТОЛЫШОН МИЛЛИ ШУРӘДӘ ИШТИРОКИ “НЕ” БЫВОТӘМОН!
БОВӘ МӘКӘ! МӘТАРС! ЛОВӘМАНД МӘБИ!
Толыши озавзије һәрәкоти ијән ИА Tolishpressи иҹо бәјонот
Информасијә агентәтијон доә мәлумотонку мәлум бе ки, 2013-нә сори ијунә манги 7-дә бы незони елон кардә быә Озорбојҹони Демократикә ғыввон Милли Шурә Тәсис конфрансәдә кинодрамәтург Рустәм Ибраһимбәговышон выжнијә чәј сәдр. Һәмчинин тәсдығ кардә быә че МС 129 кәсо иборәт узвон сијоһи. Конфрансәдә ғәбул кардә быә Милли Шурә Әсосномә, Дәјонномә ијән бә бејнәлхәлғ иҹтимоијәти Овардномә. МШ Бәјонномәдә вотә бејдә ки, чәвон номижә сәчынонәдә ғәләбә сә һоләдә, ды сорнә дәвардә доври дыләдә бә жимон дәвонијә бәбен жинә тәдбирон: мажоритар-пропорсионал системи әсосәдә, јәне де паритети шәрти парламенти сәчынон дәбәвонен; һакимијәти десентрализасијә нәзәрәдә гәтә быә тожә Конститусијә ғәбул кардә бәбе, президенти сәлоһијәтон мәһдуд бәкан, ғанунәдә, иҹроәкә ијән мәһкәмә һакимијәти арәдә реал баланс тәмин кардә бәбе; парламентәдә вејни тәшкил кардә ғыввә һукмәт тәшкил кардә бәбе. Сывој ыми, Конститусијә әсосәдә (2015-нә сори) нәзәрәдә гәтә бејдә тожә озод ијән әдоләтинә парламенти, президенти ијән бәләдијә сәчынон дәвоније. Хариҹи сијосәти әсос приоритет быәнине Озорбојҹони әрози битовәти бәрпо карде әсосәдә Хәрәбоғи мылхәтә тәнзим карде.
Әмә жәгоән чәш кардејдәбимон: МШ рәсми сәнәдонәдә һич иглә сыханән ни Озорбојҹони довләти әсос проблеми – чәј вејмилләтинә характери ијән мәмләкәтәдә бы саһәдә ҹидди проблемон бе, ән воҹиби – МШ чы мәсәлон һәлл карде планон һәхәдә. Бы мәноәдә, һәтто иглә толышијән – (тосә есә рәсми ғејдијото дәвонијә ныбыә) “Озәри-Толыши ибыәј” сәдр Меһдибәј Сәфәрови бә МШ тәркиб дахил карде һич гылә тәминот дој әзыни ки, вәомәдә, бә һакимијәт оме һоләдә, МШ һәлл бәкарде чы зәмини бынәјнә хәлғон, әзҹумлә че толышон проблеми.
Веј нығылә символик ҹәһәт бымәдәј ки, Милли Шурә һәмон ғәрор һаким партијә НАП-и ғурултајәдә Илһам Әлијеви бә семинә мыһләт президентәти бә нав доә ружи ғәбул кардә быә. И. Әлијеви ғурултајәдә јолә нытғыш кардә. Чәј ын сыханон ки, “чәмә партијә нише сијоси рәғибон мәмләәти сијоси сәһнәдә... Әве сијоси сәһнәдә әнҹәх ә сијоси ғыввон мандәнинин ки, әвон бәфомандин бәчәмә довләткорәти. Әмә һәммәј сәрф кардәнинимон ыштә ғыввон зумандә ијән ғудрәтинә Озорбојҹони роәдә”, и кәрән сыбут кардејдән ки, әв МШ ныфузинә сијоси ғыввә һисоб кардејдәни, ә ғыввә ки, вәомә президентә сәчынонәдә деәј бә консә рәғобәт дәше бәзне. Әксинә, чәј сыханонку жыго нәтиҹә бекарде бәбе ки, фовгәлодә дәрәҹәдә розије МШ бә мәјдон бешејку, чумчыко ын тәшкилот мышғол бәбе де чәј семинә мыһләтә президентәти легитим карде.
Бы ружонәдә МШ сәдр Р. Ибраһимбәгови бә “демократикә ғыввон” ын тәшкилоти “Кремли нахшә” һисоб кардәкәсон ҹәвобәдә бәјон кардәше ки, әсл һәғиғәтәдә “Илһам Әлијеви ыштә һакимијәт Кремли нахшәје”. Бә әдоләти хото дечәј ын фикири рози бејән бәбе. Әмма һич ҹурә рози бе әбыни деәј ки, мәвужи мәшһурә кинодрмаәтурги сијоси мәғсәдимывофиғәти нәзәро “јодо бекардәше” бывоты ки, ыштә нубәдә Милли Шурә Илһам Әлијеви Администрасијә нахшәје!
Чәмә дастәдә һар гылә әсос һесте фикир быкәмон ки, ым жәгоән һесте! Тожә тәшкилоти бәјон кардә быә мәғсәд ијән вәзифон, чәј рәһбәр һејәти дыләдә - бә есәтнә һакимијәти ғоллығ кардә чандә шәхсон ијән толышә хәлғи ошкоә дышменон, ә шәхсон ки, бә сутим-сутимин бо һакимијәти бә даст варде ки, һәмән бәчәј горәнә ки, рәјрә мәһв быкән чәмә хәлғи, - бе, һәнијән веј чијон бәмә гырд әсос дојдә ки, бы фикир боәмон.
Әве, әмә овардејдәмон бә ҹәми толышон ки, чәвон һич гыләјни иштирок ныкә бы Милли Шурә коәдә. Чумчыко Озорбојҹони республикә есәтнә һакимијәт ијән Милли Шурә молјәти етиборән иглә медали ды тәрәфин, һәмән чәвон һар дыјнәни бәчәмә хәлғи ади мывҹудәти һәхи ғәбул карде фикирәдә нин!
Һәтто М. Сәфәрови ыштәни Тәсис конфрансәдә дечәј рәһбәрә һејәти иврәдә не, мәнзыли бә сәдә ныште, бәј ыштә сыхани воте имкони ныдој ыштәнән бәрмалә сигнале ки, вәомә “демократикә” довләтәдә кон вырә нәзәрәдә гәтә быә бочәмә хәлғи (һәмчинин бо ҹо бумијә хәлғон). Әмә һеле кардејдәмон М. Сәфәрови ки, быдә әв тәҹили тәрг быкә Милли Шурә, гирәм әј пијејдәшныбу һәм ыштән, һәмән чәј сәдр быә тәшкилот ки, веј толышон бы фикирәдән ки, әв сохтә быә И. Әлијеви Администрасијә тәрәфо навсәчынә довриро (һежо жыго мывәғғәти беј сәбәбоән һәлә рәсми ғејдијото дәвонијә быәни), бә толышә хәлғи тарых бәнә гыләј ләкә дахил ныбун!
Әмә ижән бә һәмә толышон бәјон кардејдәмон ки, толыши хәлғи һестыше ыштә озавзије ро, де ә ројән әв бә нав һәрәкәт кардәнине. Ым ро – мыстәғиләти, мыстәғилә толыши довләти бәрпо карде роје. Әнҹәх чәмә ыштә довләт чәмә хәлғи жимон карде ијән озавзије тәминот бе бәзне! Һич гылә толыши һәхыш ни ки, бәштә шәхси мәнофе јаанки ҹо сәбәбон хото бә гулмәчә огордыны толышон чә сијоси камбинаторон дастәдә ки, әвон Озорбојҹони мыстәғиләти бы ҹәми сорон дыләдә һежо хыдмәт кардәшоне бә һаким клани! Деми әмә бә һички тарс омејдәнимон, әмма ҹәми толышон хәбәдо кардејдәмон ки, быдә пешо һички нывоты ки, әвон хәбәдо кардә быәныбин! Чокнә бәвотен, хәбәдошбу, бызын дастбәсилоһиш!
Бә Милли Шурәдә иштироки “не” бывотәмон!
Ымонин чәмә әсос шуарон: Бовә мәкә! Мәтарс! Ловәманд мәби!
ТОҺ-и сәдр: Фәрмони Фәхрәддин Әбосзодә
ИА Tolishpressи сәр редактор: Каһин Мирзәлизодә(Әбилов)
Москва. 7 ијун 2013 с.