АЗ ВОТЕJДЭМ ОСМОН, ТЫ ВОТЕJДЭШ РИСМОН!

                                 АЗ ВОТЕЈДӘМ ОСМОН, ТЫ ВОТЕЈДӘШ РИСМОН!

-   Аз вотејдәм, ымружнә ружику бәвотым. Ты вотејдәш, не, којы ныбу де ымружнә ружи, гәп быжән дәвардәјонку, чәмә хәлғи тарыхику, чәј адәт-әнәнонку, һәлә бунәмон чич бејдә?
-Аз вотејдәм, зә, тарыхи, дәвардәјон вахт ни есә, ымружнә ружику гәп жәј лозиме ки, мәхлоғ бызны, дынјо чуне шејдә, чичон чәш кардејдән әмәни – чәмә хәлғи. Ты вотејдәш, не, әсыл вахтыше, есә тарыхику, дәвардәјонку гәп жәј лозиме, бој тикәјән чәш быкәмон, бунәмон дынјо чуне шејдә, бәвәдә гәп бәжемон дынјо шемони барәдә.
-   Аз вотејдәм, бочи жыго тарсејдәш ымружнә дынјо шемонику? Ты вотејдәш, вәсе бә до-дымжон гәтышоне чәмә пыә-моә! Боты чич һесте, нывыштејдәш, чәјо ныштејдәш ыштә кәдә, һич бәшты ејнән омејдәни ки, аз чичон кәшејдәм? Нывыштәкәс ты, дымжонсојб мы! Дәшош бә facebook, бәвәдә бәзнеш, чокнә дымжонон дојдән бәмы!
-Аз вотејдәм, зә, чымы чы ком һесте facebookәдә? Ко-сәнәти тумым быријә мәгәр? Азән дәшум әјо, шәв-руж быныштым әнг быбум де кали нодонон, бәвәдә чымы кардә коон ки бәкарде? Охо чә нодонон пијәјән әве ки, азән бом быныштым дејәвон бә иврә, һәни нывыштәкәс ныбу, чәвонән молодесон веј быбун! Ты вотејдәш ки, мыни бә facebook сәдо карде фикәдә ниш, аз һежо ыштә кој быком чоке. Чәј думоән вотејдәш ки, арәдә тикәј исло быкә, веј тынд мәнывышт, быдә даст быкәшын ышты јәхәку!
-   Аз вотејдәм, гирәм пијәмонбәј, һички кош ныбу дејәмә, гушонымон ашиш быбун, бәвәдә бочи дәшәнинбимон бы ко? Чымы вотәј ыме ки, вағику тарсејдәмонбу, бәвәдә бочи шејдәмон бә вишә? Быныштәмон ыштә кәдә, нунә пули дарди быкәшәмон, быдә чәмә сә-гуши бардәкәсән ныбу! Ты вотејдәш, мәсәлә гуши ашиш бејәдә ни! Азән вотејдәм, ко быкәмон! Интаси кали чијон, мәтләбон һестин ки, бәвон һаканә чәш ви быкомон чоке!
-Аз вотејдәм, чанә фырсәте, вахтымон һесте, веј бынывыштәмон ки, быдә мәхлоғ сәрәсы, бызны ыштә кој! Ты вотејдәш, дәрәсәкәс жәгоән дәрәсејдә, дәмәрәси коән мандә бә Хыдо! Ты һа һәрәкәт быкә бо дәмәрәси сәросније! Әв сәрәсәкәс ни! Һандејдә ышты нывыштәјон, жычиј сә бекардејдәни чәвонку, ашишән ныште зынејдәни, чумчыко ыштәни пусты-лу кардејдә ки, һежо мәјдонәдә быбу! Әве, дәмандејдә бо дымжон, тәһғир воте, шәр ғанде! Чымынән зывон дурум һардејдәни, дамә бејдәм, азән бејдәм бевәҹ! Нә кыштәнин ни, нә сәроснијәнин! Вадәмон чәвон сәј!
-   Аз вотејдәм, зә, кәхәлизи зоә, һәни вәрәмәжә быәмон ышты пытпытику! Жыго дәдәм вај, жәго нәнәм вај! Һәм вотејдәш бынывышт, чәјоән дәмандејдәш бә пыт-пыт ки, бочи жыго нывыште? Ты вотејдәш, пытпыт ныкәм, бәс коврәј хоки екәм бәштә сә? Детынән пытпыт ныкәм, бәс бәки бывотым ыштә дарди? Охо, барометр чымы дастәдәј, вотејдәш. Азим памјәкәс мәхлоғи “температури”. Дијә кардејдәм, арәдә һарчи тикәј чок бејдә, веј зоон сәдо бешејдәни. Һежо чокнә ты гәдәј чулә дәкуједәш бә канды һылә, һәзо-һәзо меш бејдән, анә выз-выз кардејдән ки, гушоным ешејдән, сәм данг бејдә!
-Аз вотејдәм, зә, јурдомардәј зоә, есә боәмон дасти ды-сеглә меши окыријәмон бә пешо, мәнывыштәмон ыштә дарди? Ты вотејдәш, ды-сеглә меш вәс кардејдә ки, одәми гушон ешун! Ты виндәбәј, әвон чокнә мәһоли һу кардејдән бә одәмон сә, бәвәдә жыго нәвотиш!
-   Аз вотејдәм, зә, коврәшон хәробә ноә, чәмә хәбәмон ни? Меши выз-выз чич бәбе охо? Ты вотејдәш, һәлбәттә, меши выз-выз жычиј ни, интаси одәми сәј хәроб кардејдә! Ја бәпе егыни бәчәвон сәвијјә, чәвон зывонәдә гәп быжәни дејәвон, јаанки әвон дәрәсәкәс нин!
-Аз вотејдәм, бәнә бәмы быжи, фик мәдә бә һар ро дәвардәкәси, сәј евә быжән, мышғол быби дештә кој! Ты вотејдәш, бәс чокнә бызнәмон, мәхлоғ чич фикир кардејдә, дардыш чиче, коврәш дәжејдә, чичыш пијејдә?
-   Аз вотејдәм, зә, әмә лығмон нимон ки, чорә быкәмон бә һар кәси дарди! Әмә ыштә виндәј ијән зынәј нывыштејдәмон, јәне, диагноз нојдәмон, һәмән мыолиҹә чәми нишо дојдәмон. Ки пијејдәшбу чок быбу, әвони быкә, ныпијәкәси мәҹбур кардәкәс нимон ки! Ты вотејдәш, толыши жыго мыолиҹә карде мымкун быә ко ни! Бәпе быҹуј, бынәј чәј зывонисә, чәјоән де еһмоли бывоти бәј ки, “чымы билә, ебә”! Вај бә ружи ки, ышты сәдо тикәј гур бешо, бәвәдә әј быкыштошән, нә ебардәкәс ни, нәән ки даст нибәкәше ышты јәхәку ки, ты киш, де жәго тони гәп жәјдәш демы?
-Аз вотејдәм, зә, ҹон чәј, ҹәһәнным че Хыдо! Пијејдәшни чок быбу, вәјнәнә бынәдә ныпијоше! Аз диагнозијән бынәм, дамонијән быһырым, әј бынәм чәј зывонисә, һәлә ловән быкәм ки, тыны Хыдо, бој ебә әј? Ты вотејдәш, чорәмон чиче, мадәм дәшәмон чы шәлә жијәдә, бәпе тосә охој быбәмон!
-   Аз вотејдәм, зә, чәмә пыә пештисә ни ки! Бочи бәпе һежо шәлә кырнијәкәс әмә быбәмон? Ты вотејдәш, һички мәҹбур кардәшни әмә ки, дәшәмон шәлә жијәдә, әве, ҹонымон бебәше, бәкырнемон!
-Вај дәдәм вај, нәнәм вај! Вај пым вај, мом вај! Ым чы бәлобе, аз егыним? Зә, аз вотејдәм осмон, ты вотејдәш рисмон! Аз иглә деты зывон пәјдо карде зынејдәним, ты чокнә зывон пәјдо кардејдәш де анә толыши?