НЭВУЗЭЛИ

 

 

 

 

 

НӘВУЗӘЛИ

 

 

 

 

Нәвузәли, бәнә Һәши бәвәшеш,

Дәмә иҹо де ғәринон ро бәшеш.

 

Детынышон ғәзо карде вотејдән,

Чанә елмы дештә барде вотејдән.

“Алим марде – аләм марде” вотејдән,

Нәвузәли, ты һәлә веј бәвәшеш!

 

Чы “Толыши сәдо” бәты ангылбе,

Һа сәһифәш бо милләти чан гылбе.

Гәзет ыштә пурә сини шингилбе,

Ижән дәмә машки иҹо бәвәшеш!

 

Ҹисмы ни бә, руфы ышты сәғ мандә,

Кылән быбо, чәху мандә, чәх мандә.

Бо тиши жәј чанә ришә, рәғ мандә,

Тиши бәжеш, тарыхондә бәвәшеш!

 

Чы милләти һар дардику һолибиш,

Ты ки дештә шәһидәти ғалибиш.

Вәше-вәше бәнә Һәши али биш,

Нәвузәли, һәлә веј-веј бәвәшеш!

 

Дештә марде дышменоны ты кыште,

Әвоны лап бә осјо гин дәкыште.

Чы шәһидон охон вырә беһиште,

Нәвузәли, әјо һежо бәвәшеш!

 

Мәләк хәбә бәсте, алим бә ты киш?

Толыш омәјш, толыш мандиш, толыш шиш.

Милләтиро бывә, јолә толышбиш,

Нәвузәли, хәлғи вәдә бәвәшеш!

Бәштә һәхи әв рәсјәдә бәвәшеш!