ДАРД МЭВЭ ДАРДИ СЭПЕ

 

ДАРД МӘВӘ ДАРДИ СӘПЕ

-Јалла, Амјәзо!

-Јаллә, чымы Билә!

-Чич һесте, чич ни?

-Сәломәтије иншалла! Чиче ижән, тәһәри гынејдәш бәчымы чәши. Гәмијоны ғәрғ быән?

-Шык бә Хыдо, гәмим ни бо ғәрғ бе! Әмма кали мәсәлон һестин ки, тәлх кардејдән чымы әһволи. Ҹо мәсәлә није, һежо чәмә һаружнә жимони һырды-һәше...

-Де ејһоми сыхан мәкә демы! Ыштә дыли сыхани бывот, азән бызным, чы мәсәләје.

-Шинә бом! Вотејдәм, чәмәһон һар гыләјни де тәһәри чадојдәмон ыштә сәј, кыле-кыле кардејдәмон. Тикәј нуне, шык бә Хыдо, ғәзәнҹ кардејдәмон. Бымон сыханым ни.

-Бәс бәчије ышты сыхан?

-Ај чымы Амјәзо! Охо чәмә жимон һежо иглә тикәј нун ғәзәнҹ карде, ыштә сәј чадој, хыјзони һарде-бырәви росније ни!

-Һәни чиче, бывотәни...

-Зә, бахтәвәри зоә, жыго сыхан кардејдәш, жыбызын, һич бәшты ејнән ни дынјо коон! Марде һесте, манде һесте, хәј һесте, шәр һесте бы жимонәдә! Дијәро егынијәмон Вәтәнику, ов-авлодику. Веј вахти һич хәбәмонән бејдәни, ки марде, ки манде, ки бә шу ше, ки кә бе! Кам быә ки, бо семи, лап бо һафтоми хәбәдо быәмон ки, мәвотбән чәмә лап незә одәмон гыләјни шә бә Хыдо рәһмәт? Ҹәмати вәјәш кардә, вәјуш вардә, серужә чиче, и кәрән хәбәдо быәмон ки, хонәхо әғылсојбе!

-Жыго сәрәсејдәм ки, гәдә-гәдә нез омејдәш бә мәтләби!

-Һәни чы мәтләбы пијејдә? Аз ыштән дештә хыјзони ныштәм гыләј мәмләкәтәдә. Шымә быә мәмләкәти бы сәдә гыләј авлод боштә зоә вәјә кардејдә, бә сәдән ә гылә авлод боштә кинә вәјә кардејдә.

-Хыдо хәј быдә бәвон һәммәј! 

-Хәј быдәј, аз вотејдәним ки, ныдә! Азән вотејдәм, Хыдо хәј быдә! Әнҹәх деми сә бејдәнихо!

-Һәни чич вотәнинимон?

-Ај ышты деғыжә кә хо ныбу, лап һовсәләо бекардејдәш мыни! Зә, ты бәгәм зынејдәниш ки, авлод вәјә кардеәдә сәло жәјдә, дәвәт кардејдә ыштә ов-авлоди һәммәј?

-Һәлбәттә, зынејдәм!

-Бәс бочи чымы дыли ширә епарзынејдәш? Аз чич быкәм, гыләј сәло Русијә чә сәо омә, гыләјән чы сәо. Ышты вотәј әве, гырд беабру быбум ов-авлоди, һампо дыләдә? Һич ныбо, бәчәвон гыләјни шәниним ја не?

-Гыләјни бочи, бә һар дыглә бышош, чоке!

-Машалла быбу бәшты жә гәпи! Азән зынејдәм ки, бышом, чоке! Чок неје, воҹибе! Әмма әјән бывот ки, чокнә бышум? Ше зынејдәм бәгәм?

-Һа, есә зынәме, бочи маштәнәку бә зых-зыхиш бомы. Бәмы бочи вотејдәш, дијәкә бәштә имкони, зу вышкијејдәбу, бышу, ја зу ныбу, бәвәдә мәши, гыләј чәшрушни быдә де телефони, ашиш-ашиши бынышт ыштә кәдә, вәссәлом!

-Ыштәнән мотим бәты! Нә “но” зынејдәниш, нә “хорошо”! Зә, аз ҹојлинә быәбәјм, дард бә нимәбе! Бәс кәдәкијон? Шымә мәмләкәти бы сәдә чымы авлоди вәјәје. Әј тәһәри рози еғанде бәзнем. Бә сәдә, есә бој, жени авлодон вәјә кардејдән. Һынә һесте, жени рози еғанд!

-Ијо сыханым ни бывотым бәты! Ым веј гонә мәсәләје, чәј ҹәвобән бәмыку ни! Бынышт жирој, екә бәштә сә перој хоки! Јавә вырәдә дәмандәш! Чымы лап дыл суте боты, фәғырә Биләм!

-Һәлә гуш быдәј бәмы! Деми сә ныбе ки! Женән һәлә быманды бә и тәрәф. Бәс кәдәки әғылон чокнә быбун? Лап бывотәмон, зоән сәросне бәбе! Бәс кинә? Чокнә бәј бывотым ки, мәши бәштә халәкинә вәјә?

-Зә, јурдомардәј зоә, кыште фикирәдәш мыни? Ыштән чок зынејдәш ки, аз веј вахте јодом бекардә жәго чијон! Чичы карде, бывот, демијән сә быкәмон!

-Аз вотем, бомем ышты тоно, камиши тәј бәкам ыштә дыли, тынән ханбоз бәбеш бәчымы дарди. Тынән ымруж огардәш бомы бә әждәһо, дум жәјдәш, до певатејдәш! Зә, жычим карде зынәбәј, һәни бәты бочи шикат кардејдәбим? Ыштә сәм гин кардә, тынән дард вардејдәш дарди сәпе...

-Мәслоһаты пијејдә чымыку? Чич бывотым? Бымијән шукур быбу! Које-шајәт, пулы пијәјбәј, бәвәдә вај-шивән бино әби! Бо мәслоһат дој чич һесте ки? Быши бывот бәштә авлодон ки, быдә әвон һәммәј дастбәдаст быдән, әмә рәјрә озод быкәмон Толыши. Бәвәдә ҹәми толышон гырд бәбен бә Толыш, вәјән бәкан әјо. Әмәнән бәвәдә һәммәјәво дастбәдаст бәдомон, бәшемон бәшты авлодон вәјән, бәчәмә авлодонән вәјә!

-Бә кинә чич бывотым чән?

-Һа, ымән лап һостонә које! Јәне, ә ко ки пемандо бә сыхани, чич һесте ки бочәј һәлл карде? Бә кинән бывот ки, “чымы балә, гыно бәмыку ни, гыно ышты моә авлодонкује ки, нез мандејдәнин бә Толыши кој. Кејнә әвон нез бон бәчәмә кардә кој, бәвәдә әмә рәјрә бәрәсемон бәштә орзу, шымәнән роһат-роһати бәшешон бә һәмә авлодон вәјә. Чанә ки әмә рәсәнимон бәштә орзу, сәбр быкә”! Чокнәј боты?

-Чорәм чиче? Бышум бывотымәни. Воте бәвотеме, әмма гирәм маштә скајпәдә ныбом, бызын ки, сәм сәломәт ни! Хыдоһафиз!

-Зә, тарсо мәби, һарчи бәнә чымы вотәј быкош, бәвәдә әғылонән рози бәманден, ышты ыштә сәән сәломәт бәбе! Әғыл мәби, аз чандә соронин дәвинәм карде ым чәм...

-Чок, аз шим, сәломәт быманд!

-Не, һәлә мәши, по дәжән. Чымынән сыхан һесте бәты. Ты жыго фикир мәкә ки, әнҹәх ышты дарды һесте. Һар кәси дард боәј гоне!

-Хәтом ныкарде ки, бә мәслоһат омәјм ышты тоно? Чорәм чиче, бывот, тәј быкә ыштә дыли. Чиче ышты дард?

-Ымруж һандыме ышты бә толыши нывыштә гәтә мәтн, дарди пегәтыше мы.

-Бочи? Бевәҹә сыханым нывыштә ки?

-Бевәҹә сыхан быәбәј, дард бә нимәбе! Зә, аз анә зәһмәт кәшејдәм, нывыштејдәм Толыши луғәтон. Әвон һәммәјән һестин бәтыку. Һич ныбо, лозим беәдә окә ә зәһриморә Луғәти, дијә быкә бә сыханәни! Бә гәдә мәтнәдә чандә гылә сыхан һесте ки, ҹо зывононо пегәтә. Бәс бы дарди чич бывотым? Зә, толыши зывонәдә “шәрик” сыхан һесте? Чәмә бәнә выләпәрә “ханбоз” сыханымон һесте, “гәм” не, “ғәм” быәнине, коми бынәм, коми бывотым? Бочи шымә һәммәј жыго дышменишон бәчәмә зывони?

-Аз чанд руже ыштә ҹони һајәдәм, быбахш мыни, хосә Амјәзо!

-Быбахшымәни, чорәм чиче?