ИДОН МЫБОРЭК БЫБУ, ХОСЭ ТОЛЫШОН!

 

ИДОН МЫБОРӘК БЫБУ, ХОСӘ ТОЛЫШОН!

 

- Амјәзо!

-Ҹонә Амјәзо!

-Јалла!

-Јалла, нозә Биләм!

-Зә, ымруж Мердон идехо!

-Һа, хәбәм һесте.

-Бәс фикиры чиче?

-Чич быәнине ки чымы фикир?

-Вотем пијејдә ки, тәбрик кардеј фикирәдә ниш чәмә јолә Мердон?

-Сыхани рости, ымруж маштәнәку ыштән-боштә бә но-пегәтим...

-Ышты но-пегәтым бочије мы? Мәхлоғ тәбрик бә чәше!

-Зә, ај ныможәбыр, имкон быдә, бә сә быросным ыштә сыхани! Вотәјым әве ки, иди ғајдә бәје ки, бәпе бынышти, чок-чоки но-пегәт быкәј, нәзәри сәғанди бә дәвардә ружон, бә јод бијәј ыштә дәдә-бобон, чәвон дәвардә жимони, кардә әмәлон, чәјо едјәси бә ымружнә ружи, есәтнә мердон кардә әмәлон ки, бызни чуне шејдә чәмә хәлғ, де ком мердон шејдә бә ро, чуне бәбан ым мердон хәлғи, комонин сәдә шә мердон, чәвон мәғсәд чиче...

-Һа, чич бе чән, но-пегәты карде тосә охој?

-Кардыме де хәј-сәломәти! Сыфтә әј бывотым ки, чәмә хәлғи еғволи жыго вардәше ки, һәзо сорон жијәмон чәмә јолә Вәтән Иронәдә. Бы незони гыләј ироныжә мыәллифи нывыштә мәғаләм һанде Ирони хәлғон барәдә. Росте, толышон һәхәдә гәвирәсәј, ду-тәлбис, ғејри-дырыстә мәлумотонән веј һестыбин бә мәғаләдә. Әнҹәх ә мерди зоә иглә чијыш софсәрост нывыштәшбе: Лап ғәдимә әјомонку жыго толышон һич вахти мәғлуб быәнин, ҹанги вахти һич бә пешо окыријәнин, һежо һар гылә ҹанго ғалиб бешән! Ыми бәмы анә ләзәтыш дој ки, бахшыме чәј мандә гынон! Бәчәј горәнә не ки, тарифыш кардә толышон! Не! Һәғиғәт ыме ки, толышон һежо пешт быән бо Ирони, тосә охонә нәфәси, охонә тылә хуни ҹангәдә быән Ирони роәдә!

-Ымони сәрәсәјм, лап чок! Де иди чич быкәмон чән?

-Чымы вотәј ыме ки, ај тангһовсәлә, мадәм ымруж Мердон иде, әмә сыфтә-сыфтә бәпе гыләј рәһмәт бывотәмон бәштә бә дәдә-бобон ки, Ирони роәдә шәһид быән!

-Һа Хыдо рәһмәт быкә ышты пыә-моә! Лап чокы воте: Хыдо рәһмәт быкә бәвон һәммәј!

-Чәјо бәпе гыләјән рәһмәт бывотәмон бәштә нәнон ки, әвон быәнәбәјн, чәтин чәмә дәдә-бобон тов әвәјн дышмени навәдә! Ғәрәјз ыми, охо иглә чәмә дәдә-бобон ҹангәдә быәнин! Бәс Толыши мердәзымоә мојнон ҹангәдә быәнин? Быәнхо! Әве, бој гыләјән рәһмәт бывотәмон бәчәмә нәнон!

-Хыдо рәһмәт быкә бәчәмә нәнон!

-Һа, есә бој гәп быжәнәмон ымружнә иди һәхәдә. Дыса сорбе ки, толышон и поә жијәнин бин Русијә тәркибәдә, ијоән һежо навәдә шејдәбин ыштә тожә Вәтәни роәдә ҹангәдә!

Вәтәни чоки-бевәҹиш әбыни, чымы Билә! Вәтән зәмини гыләј поәј. Зәминән һар вырәдә зәмине, чәј нише ҹо ном. Зәмини Вәтән кардәкәс чәј сәпе нәвә хәлғе, чә хәлғи номдорә зоон ијән кинонин! Ымруж әмә һәммәјәво рәһмәт вотәнинимон бә толышә мердон ки, шәһид бин Вәтәни роәдә! Сәғби вотәнинимон бә мердон ки, сәғ-сәломәт огардин ҹанго, есә жијејдән. Чәвон һар гыләни гыләј нымунәје, мәктәбе, мердәти нымунә, мердәти мәктәбе боәмә ијән бочәмә вәомә нәслон! Хыдоку дырозә умр орзу быкәмон бо һәмонә мердон – ветеранон, хәшәҹон быбун әвон һәммәј!

-Амин, ја Рәббилаләмин!

-Есән бој тәбрик быкәмон чәмә есәтнә мердон һәммәј, орзу быкәмон ки, быдә әвон һежо барз быкән чәмә хәлғи сәј дусти ијән дышмени вәдә! Вәтән чанә һестебу, чәј роәдә ҹангән анә һесте! Һыкм ни ки, тифанг пегәти бә даст, бә ҹанг быши Вәтәни роәдә! Есә Толыши озоди роәдә һар гылә сыхан бывот, ғыјә быкәш, кәлимә бынывышт ыштәнән һисоб быкә, бә ҹанге Толыши роәдә! Әмә орзу быкәмон ки, ружбәруж һәнијән веј быбун жәләвонә мердон, зоон ијән кинон! Әвон чанә веј быбон, чанә дылисыхт ҹанг быкон чәмә хәлғи роәдә, анән рә озод бәбе Толыш! Идон мыборәк быбу, хосә толышон!

-Һа, ым ҹо мәсәлә!