Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Подписаться на рассылку:
Оцените содержание статьи?
(всего 5 голосов)
ЧӘМӘ ВӘЗИФӘ ҺӘҒИҒӘТИ БӘ ХӘЛҒИ РОСНИЈЕЈЕ!
-Јалла, Амјәзо!
-Јалла, шинә Бом!
-Чиче, тәһәри сыхан кардејдәш? Бәмы хош омејдәни ышты һол...
-Һич әсос ни бо нороһат бејро! Шык бә Хыдо, һарчи ыштә ғајдәдәј.
-Мыни бә даст дәнојдәш? Чандә соронин зынејдәм тыни. Пәришон гынејдәш бәчымы чәши...
-Хыдо ныкә пәришон быбәмон! Одәм һежо сырәнин ни ки. Һаканә жыгоән бејдә. Һәвосатику бејдә, дынјо коон шемонику бејдә, ҹо чијонку бејдә. Ғејри-ади гыләј чиј ни ијо. Чәмә ко жыгоје ки, һаканә нығыл-нығыли фикир карде лозиме ки, чуне шејдә ын дынјо, чәмә шәнин быә ро ком быәнине? Чокнә кардәнинимон ки, коон чәмә пијә ғајдәдә бышун. Әзыним воте ки, һежо әвон чәмә пијә ғајдәдә шејдән. Әмма әмә һич ныбо бәпе бызнәмон ки, кон вырәдә, кон мәғомәдә бә коврә тәсир кардәнинимон ки, һампоку бә думо ныманды чәмә хәлғ...
-Дәрәсәјм. Бывотәмон, һежо ышты вотәје. Бәвәдә бәмы бывот, бә чы нәтиҹә омәјш?
-Һәлә рәје бә нәтиҹә оме, чымы Билә! Но-пегәт кардәнинә веј коон һестин һәлә...
-Мәсәлән?
-Зинә һәмсыхан бим де гыләј толыши. Хәјли гәпымон жәј. Мәхлоғ бәрк нороһате. Һәмәкәси зыне пијејдәше ки, чич бәбе чы коон охој?
-Чы гәпон жәј ки жәго?
-Сыхан вејбе, һәммәј воте имконым ни, һич һәхымән ни! Иглә ыми бәвотым ки, навко ҹәмат де мангон, һаканә де сорон хәбә нәгәти ијәндыку, нәзни чичи фикири кардејдә хәлғ. Есә, шык бә Хыдо, Интернети жыго нез кардәше мәхлоғ, конҹо быжијонән, жыбызын, лап ијәнды тонон. Дынјо бә сәдә гыләј ғәзијә бенҹән, бы сәдә әлбәһол зынејдән чәј барәдә. Лап банди сәдән и кәс гыләј чиј бынывышто Facebook-дә, дынјо һар вырәдә жимон кардә толышон һандејдән әј, әлбәһолән бә мыколимә дәше зынејдән де һәмон шәхси.
-Чичыш һандәбе ижән ә хонәхо?
-Мәхлоғ һәммәјсә веј нороһате кали толышон чыми-чәј сәпе витејку. Чымы һич хәбәмән ни, мәвотбән кали толышон лап дылышон шејдәјбән, мәсәлән, бо Мусавати ијән ҹо хонәхон! Ыштәни жәјдән-кујејдән ки, һичмәсә, толыш чәвон думо шәнине! Һәлә ымон бымандын бә и тәрәф, жәго толышонән һестин ки, ыштәни ғыбон дој һозын һукмәти роәдә! Бомынән веј мәрағине ки, бочи бәпе әвон жәго фикирәдә быбун, бочи бәпе ыштә риши быдән бә ошкоә дышмени чанг? Охо, чандә сорон бәчәмә толышон сә омә анә бәлон бәпештә аз жыго зынејдәбим ки, ымон һәммәј дәрс бәбен боәмә! Әмма жыго мәлум бејдә ки, дәрс быәни! Чиче ым, дышмени һиләје, хәјонәте јаанки кали толышон әвомәтије? Әве, воте, зинә телефизијәдә нишо дојдәбин ки, Ланконәдә “саати ғуллон” дутејдән; дыгләшон дутә, һәнијән дутејдән. Дәрәсејдәшәни, бочи дутејдән әвони? Һукмәт вотејдә бә толышон ки, ашиш быныштән, ыштә вахти дәмәгижнән, чыбызным, һәни чичон! Вәс нин ымон бо толышон? Бә одәми бәпе һәни чичон бывотын, чанә бәпе әј тәһғир быкән ки, әв бә ағыл бо?
-Чымы зынәјку, чәвон һар гыләјни һесте. Азән веј һандејдәм жәләвонон нывыштәјон, әһволым чок беәдә лап һәсбәһсән кардејдәм дејәвон. Әвомәти кардәкәсон әлбәһол винде бејдә. Дејәвоным ком ни. Умдәвом ки, әвон вахт ше-ше ыштән дәбәрәсен лозим быә чијон. Кам быәни ки жәләвон! Әмма хәтоманд ә кәсонин ки, намәбиҹәти кардејдән, ыштәни нез нишо дојдән бә хәлғи, есә бој, һәғиғәтәдә бә дышмени осјо ов екардејдән, чәшпушнә кардејдән ҹәмати. Һа жәјдәш әвони, окардејдәш чәвон пәхыри, хәјрыш ни ки ни! Чыјо жәјдәш, чәјо бешејдән, гыләј номи фош кардејдәш, де ҹо номи бешејдән!
-Һа, лап бә ҹангиш ки, чымынән хәбәм ни!
-Зә, ијо бо нороһат бејро гыләј әсос није! Ше-ше мәхлоғи чәш обејдә. Веј чијон һандејдән, ыштән хәбәдо бејдән че дынјо һар вырәдә шә просесонку. Веј одәмон димдәжоәти кардејдәнин, парсејдән ыштә нызнә, сә бенышә мәсәлон. Шык бә Хыдо, есә анә сәводинә толышон бешән бә мәјдон ки, жәләвонон кин, ов пегәтын чәвон вәдә? Жыго песутејдән әвони ки, бә осмон бешејдә чәвон аһ-уф!
-Ым чокә гәпе! Дығғәт дој лозиме ки, идеоложи ҹәбһәдә чәмә нырәсә ҹәһәтон лап кам быбун. Хәлғи сәросне воҹибе! Воҹибе вотеәдә ки, чәмә мәғсәд хәлғи һәммәј бәштә сә гырдә карде ни ки! Чәмә мәғсәд әве ки, хәлғ сәрәсы ыштә вәзјәти ијән бызны жыго вәзјәто беше роон, воситон, чәмон. Чәмә вәзифә һәғиғәти роснеје бә хәлғи. Һәғиғәтән ки игләје, дыглә һәғиғәт бе әзыни! Чәмә хәлғ дештә рој шәнине, ыштә рој гәтәнине, ыштә сыхани вотәнине, ыштән боштә јолјәти кардәнине. Вај бә ружи ки, ижән чәмә хәлғи сипиришәти быдән бә ҹо кәсон даст! Фаҹиә бәвәдә бәбе! Чәмә лап әфсәлә вәзифә ыми бә хәлғи роснијеје! Әмә дештә рој бышомон, ыштән боштә сипиришәти, јолјәти быкомон, бәвәдә һарчи чок бәбе иншалла!
-Иншалла жәгоән бәбе!