Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Оцените содержание статьи?
Ә РУЖ ҺӘЛӘ ОМӘНИ...
-Јалла, Амјәзо!
-Јалла, чымы Билә!
-Хәбә һесте, чичи фикири кардејдәм?
-Ышты дыләдәм бәгәм? Аз чыбызным, ты чичи фикири кардејдәш?
-Зымыстони ҹәлҹәли, һар тәрәф воа егәтәше. Даштәдә сарде, нәве бејдәни. Кәдән ки ныште ләзәт дојдәни. Бә жени едјәсеку чәшонымон бумәку быән! Дијәдә беәдә гырдә әбимон пичи кәно, бумијәтуми дәәчынимон пичи сәпе, әв әби боштә, әмәнән гәдә-гәдә әһәјмон! Ја әныштимон тәнујәсәдә, нынгон ејәһаштимон бә татә тәну. Һырдә бумијәтумон пејәвонимон бә мафтули, шоәдәјмон бә тәну, шин-шини әһәјмон. Чәј сәпејән тәнујәдә гылә ови чај пејәшомимон. Ај ләзәт әдәјһа!
-Ижән чыконҹо омәјш бешиш, бочымы сәј гыләј бәло биш? Имкон быдә, емардәмон ыштә кәдә! Дардымон каме, тынән тикәјән дард вардејдәш чәј сәпе! Һич нывиндыме, гыләј шојә хәбә быдәј, одәми дыли шо быкәј! Ышты вотәј чиче, быныштым есә бумијәтуми дарди быбәм?
-Зә, кәхәлизи зоә, һәлә аз вотәмни ыштә дыли сыхан, ты мәһолы хәробә ној! Вотем пијејдә ки, зымыстонијән ыштә ләзәтыш һесте чәмә мәһоләдә. Чыврәј зымыстонән бә зымыстони мандејдәни! Чич быкәј, дечи ыштә сәј ғал быкәј, чокнә кырт быкәј зымыстони дырозә шәвон? Толыши һәзо ләл-гылыш әби, шәвныштыш әби, мәхлоғ гырдә әби бә шәвнышт, де ләзәти әһәј ә ләл-гыли, зымыстонән жәго дәәварди ки, һич нәзниш кејнә омәј, кејнән сә бе! И кәрән әвиндиш ки, ымһа, әвәсоре! Ијо шејдәш лап бә выжор, һыријејдәш кали ләл-гыли (һырије вотеәдә ки, һич нез ше бејдә ки бә ләл-гыли? Выжори вәш гәтәше!). Интаси әјән де жәго ләзәти һарде бејдәни!
-Сујә сер, сујә амбу, гамыштә, быштә боранијә донә, чыбызным, һәни чан ҹурә ләл-гылон? Кывин әвон?
-Бәс азән әј вотејдәмәни. Кывин әвон?
-Чок бәчымы јоды варде. Ды руж бәнав ды кәс чәмә деғыжә билә меһмон омәбин бәчәмә кә. Шәһрәдәбим. Занг омәј. Әвонбин. Омәјн де машини, метро тоно пегәтышоне мы, омәјмон бә кә. Һежо чокнә ныштим бә машин, бәнем гыләј гәдә тумә һесте мијонәдә. Һисс карде бејдәбе ки, гыләј гәдә бәнкә һесте чәј дыләдә. Машинсојб воте, Миәллим, ышты зынәјку чич бе бәзне бы тумәдә? Вотем, һарчи бе бәзне, әмма зыне лозиме, чыконҹо омә ын тумә? Воте, есә Деғо чы бахшә бо бошмә, чоке? Вотем, ангивин. Воте, не, нызнәј! –Һындылә мурәббә! –Ижән не! – вотыше. – Охо, ты деғыжиш, бәпе чок бызни ки, зымыстони ән чокә бахшә чич бе бәзне? Бы вырәдә дынјо гарде бәчымы сә! Бовә быкә, ҹәми Деғ омәј дәварде чымы чәши вәо! Ым быә ко нихо! Вотем: Шәлем ов! Воте, әһсән! Һежо шәлем ове ки һесте! Бы ружонәдәомәм Деғо, бахшәм вардә боты!
Зә, Амјәзо, ты тәсәввур быкә ки, Москвадә, зымыстони бы ҹәлҹәлијәдә шәлем овышон вардә боты Деғо! Чыми ғыјмәт һесте? Анә сә-зывоным кардә боәј, һәни сә-быныш ни!
-Чымы зывон һежо бәло быә бочымы сәј! Бочи аз зымыстони ләл-гылику гәп жәјдәбимхо, тынән есә быпандовни мыни! Зә, чич бе, һарде шәлем ов!
-Аз нәнәмардәј чич бәкәјм? Лап бәнә тәбәрыкибе. И гылә гәдә бәнкә шәлев ов чиче ки бо хугә деғыжи? Бә кә рәсенҹән, пешомәме! Амјәзо, ышты вырә мәлум, лап бәнә бијәбе. Ыштәнән ки, ты зынејдәш, чан ружбе нохәшбим, һәлә есән бәштә омәним. Әмма әвым де гыләј ләзәти пешомәј, жыбызын, дынјошон дој бәмы! Бим тожә ҹывон!
-Ты жәгошәни! Һич әвотниш ки, бәс һәмро конҹо манде?
-Зә, бә шәлем ови виндә деғыжи чәш һәмро бәчије, бәчәј јод һәмро боме? Дыглә чәшымән быәбәј, бә һички нәдәјм әј! Ты есә чич вотејдәш бәмы, бывот, һәхы һесте! Әмма, аз чич быкәм, тамарзубим бо шәлем ови! Ыштәнән, золыми кинә жыго шәлемовыш ноәбе, лап одәми дујәвул бешејдәбе чәј тәпәо, чәшоән арс ру бејдәбин лап бәнә чәмә Осјо руј ови!
-Зә, вәсе, ғәләтым ныкарде ки! Лап чымы гәви шијә емәј! Есә аз чыконҹо пәјдо быкәм камиши шәлем ов, быкыштым ыштә чәши мелы?
-Быбахш мыни, бы коәдә дастәк бе әзыним бәты! Занг быкә бә ди, бәлкәм омәкәс бе, бывот, быдә бијән боты. Аз жыго дијә кардејдәм бәты, чәтин ышты јодо бешу шәлем ов! Зымыстони әғылиш, Хыдо ныкардә, бәпандәмеш, рысво бәбемон!
-Шәлем овику жыго гәпы жәј, ыштә вотә сыханымән јодо бекарде! Мәтләбым һич ләл-гыл ныбеһа! Ым чы кобе, окардыме боштә сәј? Зә, вотем пијејдәбе ки, ижән ҹывонон бә јаһун ки, толышон чич кардәнинин, чуне шәнинин. Кали ҹывонон пијејдәшоне лап ғыјом быкән! Ышты бәвон сыхан чиче?
-Лап һежо вырәдә воте ын сыхан! Вотәмбехо бәты, толышон есә һәлә һичи кардәнин нин. Быныштын татә пичи тоно, пешомын шәлем ови, сәбр быкән! Вахт-вәдә тәмом беәдә, бәвәдә бәвотем бәвон, чич карде лозиме! Һар навәдә шәкәс ағылманд әбыни! Ағылманд әве ки, вахтәдә һәрәкәт быкә! Бәвәдә әв бәштә орзу бәрәсе! Чәмә орзу веј јоле, боәј вејән һозы бе лозиме! Шаири вотәјнә, ә руж һәлә омәни! Боән һәммәјәво чәш быкәмон “ә ружи”!