НЫГОДЭ

Шинә Халәзоә! Тыни чок сәрәсејдәм! Нороһат кардејдән

тыни чы номердә дынјо коон! Нороһатиш бо хәлғи – ымијән

фамејдәм! Интаси гыләј сәј нығо дој дардым бәбәј, әвојм әныштим

Гоговоәдә. Һич нороһат мәби, бәнә бијә сәрин огәт ыштә дыли!

Ки де кон рој бышујән, охојәдә әмә һәммәј дәвардәнинимон “ә парди”.

Бы номердә дынјоәдә һа рој шеј бәбе! Һынәманд әве ки, “ә парди”

дәварде бызны... Чәмә сәон һәммәј ғыбонин бә Толыши!

Ф.Ф.Ә.

 

Баләддин Вешо

НЫҒОДӘ

Лап быбоән тәј, нығодә,

Ҹурмә быгард, сәј нығодә!

 

И бывотон, са бывотон,

Гәвшон быкә ка, бывотон,

Ә шаирон һа бывотон;

Һәхи огәт, хәј нығодә,

Ҹурмә быгард, сәј нығодә!

 

Быши ыштә Ләлә думо,

Бәнә пәси гәлә думо,

Емәгын һа дәлә думо,

Һиј мығәтби, кәј нығодә,

Ҹурмә быгард, сәј нығодә!

 

Бәшты чы ко, милләт сидә,

Комҹо омдә, чуне шедә,

Бә роәдә ки һәлок бедә,

Ты фик мәдә бәј, нығодә,

Ҹурмә быгард, сәј нығодә!

 

Тынән бывот: ыштә ром һест,

Ыштә хонә, ыштә чом һест.

Бы дитоно вејә хом һест,

Ханбоз быби дәј, нығодә,

Ҹурмә быгард, сәј нығодә!

 

Әбосзодә чонә ләхә,

Вотдә бәмә га “бемәхә”.

Биш де нечи чангбәјәхә,

Бәдырје һа шәј, нығодә,

Ҹурмә быгард, сәј нығодә!

 

Бешедә бә чырк, орәхдә,

Пегардә бә тырк, орәхдә...

Лидер вотдә бәрк, орәхдә,

Толыш быбу чәј, нығодә,

Ҹурмә быгард, сәј нығодә!

 

Че “Толышон сәдо” бешдә,

Ве сәфе бәј һәвар кәшдә.

Бә чанди луз санҹу дәшдә,

Бәтаспе жәј-жәј, нығодә,

Ҹурмә быгард, сәј нығодә!

 

Ҹо дастә сәј мелы лывә,

Бә и вырә жәјдән һәвә;

Имон*  тыни бә тор нывә,

Бовә мәкә бәј, нығодә,

Ҹурмә быгард, сәј нығодә!

 

Бә шәјтони пок бывот лап,

Бә лырдови сок бывот лап,

Бә һукмәти чок бывот лап,

Тыни бәнә һәј нығодә,

Ҹурмә быгард, сәј нығодә!

*ДТИ

2013, Андурмә