Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Оцените содержание статьи?
БАХТӘВӘР БЫБУ ЧӘМӘ ХӘЛҒ!
-Ружы де хәј, Амјәзо!
-Һа ружы де хәј бо, шинә Амјәзо!
-Нујә сор омејдәхо, мәслоһаты чиче, чич быкәмон, чичи огәтәмон, чичи пегәтәмон, чичи бынәмон, чичи шодәмон, бә чичи һа бывотәмон, бә чичи не?
-Нујә сор омејдә лап чок! Сыфтә-сыфтә гыләј хәшомә быдә бәј, чәјо гыләј чәшрушни быдә бәмәһон, чәјоән бывот ыштә сыхани идомә!
-Лап чок вотејдәш! Хәш омејдә Нујә сор! Чәмәһон һәммәј, ҹәми чәмә хәлғи чәшон рушин!
-Амин, ја Рәббилаләмин! Хыдо хәј быдә бәчәмә хәлғи бы омә сорәдә! Һар комон овандисә быбу! Есә бывот, чич воте пијејдәбе...
-Һаани, һежо әј вотејдәмәни: Маштә дамејдә Нујә сор. Адәт жыгоје, мәхлоғ һәммәј сәкыштә жәјдә бә дәвардә сори, бә һисоб-китоб жәјдә дәвардә сори быә овандон ијән нырәсәјон, тәһлил кардејдә ыштә дәвардә ружон, пард шодојдә бә омә ружон. Чәмәнән бо воте һестымоне сыхан?
-Ым чы сыхане? Әмә чикисә ержонә мердимон ки? Шык бә Хыдо, чәмәнән бо воте сыханымон һесте, чокә коонымон һестин. Вотејдәш, ыштәни тариф быкәм бы синәдә?
-Неје, не! Тариф мәкә! Интаси кали чијон бывот, быдә хәлғ и кәрән баһандыәни...
-Чымы Билә, һәлбәттә, жыго коонымон һестин ки, әвони воте һәлә рәје. Вахт боме, Хыдованди, хәлғ бәзне чәвон барәдә. Чәмә бардә мыборизә тәләб кардејдә ки, кали чијон, кали коон сәпе һәлә омәкәмон. Жыго коонымон һестин, хәлғ әвони чок зынејдә. Һежо бывотәмән чәмә нывыштә мәғалон, аналитик мәрузон, ҹурбәҹурә мәҹлисонәдә чәмә иштироки барәдә һисоботон, мысоһибон ијән ҹо чијон, шык бә Хыдо, чәмә сајтәдә һәммәј дәрҹ кардә быән, һандәкәсонән һандәшоне әвон. Чәмә нывыштәјон барәдә чәвон нәзәрон бәмә чок мәлумин. Чыми чокә ҹәһәтән әве ки, хәлғи нәзәри зыне бәмә имкон дојдә ки, сәһв ныкәмон, бызнәмон ыштә нырәсә ҹәһәтон, һәнијән ғојм быбәмон ыштә нәзәрәдә. Шык бә Хыдо, ымсорнә сори чәмә чандә гылә тожә ҹывонон дештә аналитик мәғалон бешән бә мәјдон. Чыми мәноән ыме ки, әмә пештыпуримон ки, Толыш дејәмә сә бејдәни. Чәмә жыго ҹывонон перәсејдән ки, иглә чәмә сајт не, һәмән че Русијә ән јолә сајтон боштә фәхр зынејдән дечәвон номи! Каме ым боты? Ым коон һежо гыләј ғојмә пардин ки, әмәни иншалла бәбарде бә Нујә сор...
-Һәлбәттә, камә ко ни! Азән фәхр кардејдәм ки, Толыш бә нав шејдә, һар гылә тожә омә ҹывон дештә конкрет әмәлон, дештә ағыли ијән нывыштәјон һәнијән бә нав бардејдә чәмә хәлғи. Дынјоәдә есә кам одәм пәјдо бәбе ки, Толыши нызны, чәј барәдә нывыштәјон наһанды. Есәтнә дынјо ағыли, сәводи дынјоје. Шык быбу бә Хыдо ки, бы мәсәләдән чәмә хәлғи вәомә рушин чијејдә бә чәши...
-Вызмәти ныбу, әмма ростијән чәмә кардә коон жыгон ки, һар одәм сәнибәрәсе чәвон һәғиғи мәно, мәнтығи. Чокнә бәвотен, бә арифи гыләј ишорән вәсе, әмма бә дәмәрәси сә һа ғаппоз быжән, хәјыш нибәбе! Одәми дыл обејдә, виндеәдә ки, һәзо-һәзо толышә балон һај дештә оржиналә фикири, нәзәри бешејдән бә мәјдон, һәм дынјо һодисон, һәмән чәмә ыштә хәлғи еғволи барәдә ағылмандә нәзәрон дојдән бә нав. Хәлғ гәдә-гәдә, де фатхәши огардејдә бәштә, фамејдә ыштәни, шоми чок-чоки ҹо карде зынејдә музику...
-Чич чәш кардејдәш омә сорику?
-Ғајдә жыгоје ки, омә сорику ән чокә чијон чәш кардәнинимон! Чәмәку тәләб быә чиј чич быәнине? Покә нијәт, камилә имон, бә Хыдо меһиббәт ијән ибодәт, шәв-руж дыво, сабитғәдәмәти, бәчәмә хәлғи һурмәт ијән еһтиром! Бә һар гылә толыши хәшәҹони, сырә дијән, сәбарзи, болә рузи ијән ешаеш! Иглә бә Хыдо мәлуме ки, чичон бәбен омә сори! Дыво быкәмон бә Хыдо ки, комәг быбу бәчәмә хәлғи, бә ҹәми толышон! Ыми бәзнем воте ки, 2013-нә сор иншалла дәвардә сорон һәммәјсә чок бәбе бочәмә хәлғи... Хыдо бә вырә быросны чәмә орзујон! Бахтәвәр быбу чәмә хәлғ!
- Охој нывоте ыштә мәслоһат...
-Чокә әмәлон быкәмон, дылонәдә быә былхи огәтәмон канә сорәдә, бә ијәнды меһиббәти пегәтәмон дештә бә омә сор, озоди бынәчә бынәмон, мытијәти шодәмон, бә озоди һа бывотәмон, бә номердәти не! Озод быбу чәмә хәлғ бы омә сорәдә, чымы хосә Амјәзо! Хыдо комәг быбу бәтынән, һәлол быкә хәлғи роәдә ыштә кәшә әзјәти! Хыдо тыни веј нызны бочәмә хәлғи! Хәшәҹон быби дештә хыјзони, әғылон, ов-авлоди, дуст-таныши, хәлғи бә иҹо!
-Сәғби, хосә Амјәзо! Хыдо комәг быбу бәтынән!