БАРДЕДЭ КЭРВОН ЭМЭНИ…

 

 

 

ХАНӘЛИ ТОЛЫШ

 

БАРДЕДӘ КӘРВОН ӘМӘНИ…

 

Бардедә кәрвон әмәни бә һәши ныштә, Һусејн,

Һәши тынд, војдә отәш, мәхлоғи лап бышдә Һусејн.

 

Дыләдә бардедәмон дуз һафто де јарә дожон,

Кон хокон, бывот екәјн бә бәштә сә ын сәожон.

Бә чәмә тәмшо бешән куфәвыжон, бәсрәвыжон,

Хәҹоләт, абру-һәјо жены-кинә кыштә, Һусејн.

 

Ныжәно, ғасбу кофир, бымандомон там, әмәни,

Вотәкәс ни бәвоно рыкно быкәјн кам әмәни.

Бардедән де әзоби бә хәробә Шам әмәни,

Хәлифә тәхти сәпе есә Јәзид ныштә, Һусејн.

 

Бардедән чан шәһиди кәллә дәмә, низә сәдә,

Бәмеку хун ру бедә чы тифилон чәшонәдә.

Зинҹири һаштәни тов чы Бимари кәшонәдә,

Чич быкә бо әсирон, бо уммәти, боштә Һусејн.

 

Зејнәби едоә бә сә һафт сјо пәлу и ружәдә,

Әсғәри сәдо мәгәр һич бебәбе чы гушәдә?

Зәмонә дарды-сәре мандә сиви нәв душәдә,

Кәрбәло мысибәти бардедәмон дештә, Һусејн.

 

Сутедә ғом әмәни, тәшнә-ҹигәр, бәрк тәшимон,

Бо һәхи мардәкәсон бәбен мәгәр һич пәришон?

Шедәмон, ышты вотә хосә ружон бә чәшимон,

Бәмәно һесте, вотеж, чы һар шәви маштә, Һусејн.

 

Чан кәси мардә азиз, хејмон һәмә мандән вирон,

Имоми әһли-әјол шедә вәдә чы кофирон.

Ханәли, дәнә бә јод, быбәм һежо бо әсирон,

Мәрҹуме ын чәшә аст, бо уммәти һаштә, Һусейн.