НЭ БЫСК НЫСУТЫ, НЭЭНКИ КЭБОБ!

Разделы

Архив

Пн Вт Ср Чт Пт Сб Вс
123
45678910
11121314151617
18192021222324
25262728293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 38 голосов)
Изменить размер шрифта Decrease font Enlarge font
image

 

НӘ БЫСК НЫСУТЫ, НӘӘНКИ КӘБОБ!

ГӘВЧӘРӘЗ

            -Јалла, хосә Амјәзо!

            -Јалла, чымы Билә!

            -Хәјли вахте мыни һежо нороһат кардејдә гыләј фикир. Сыхани рости, ҹо толышонән веј вахти хәбә сәјдән ки, чокнәј чәмә Толыши һәрәкоти фәолијәти механизм? Јәне, вотем пијејдә ки, чымы ыштәнику веј одәмон парсејдән ки, мадәм һесте жыго гыләј һәрәкот, бәпе бәј узв бе јаанки чәво беше быбуше гыләј конкрет механизм ја не? Тикәјән де сојә зывони бывотым боты: Әмә чокнә мыәјјән кардәнинимон ки, мәсәлән, фылон толыш чәмә һәрәкоти узве ја не? Јаанки чокнә бызнәмон ки, һәмон толыш һәлән чәмә һәрәкоти узве ја не? Охо, әмә узвәти билет дојдәнимон бә толышон ки, дечәј комәгијән бызнәмон, әв һәрәкоти узве ја һәни бешә чәмә һәрәкото?

            -Һа, хосә Амјәзо, лап чокә парсонин, ыштәнән лап чәј вахтәдә дојдәш әвони! Вотејдәм, бој һежо бә иҹоән ҹәвоб быдәмон бәвон. Аз гәдә-гәдә изһор кардејдәм ыштә нәзәри, тынән бывот ыштә мылоһизон.

            Һәрәкот жыго гыләј чије ки, чәј бејдәнише конкрет чарчивон. Һәм ҹо-ҹо шәхсон, һәмән иҹтимоијә, сијосијә ијән ҹо тәшкилотонән узв бе зынејдән бә һар гылә һәрәкоти. Бы мәноәдә, һәрәкот жыго гыләј иҹтимоијә һодисәје ки, де сојә зывони бывотом, һежо ож бејдә чәј бә: бәј узв бејро еһтијоҹ бејдәни бо әризә нывыште, де әризә оварде, һәнијән ҹо проседурон. Боми вәс кардејдә ки, хонәхо бәјон быкә ыштә рај ијән мыносибәти. Сыхан шејдәбу чәмә һәрәкоти барәдә, толыши есәтнә һоли фамә, де жыго вәзјәти рози ныбә, ыштә хәлғи һәхи бәрпо карде роәдә бә мыборизә рост быә һар гылә толыш узв һисоб бејдә че Толыши озоди һәрәкоти. Әве, бә жыго һәрәкотон вотејдән умумхәлғә һәрәкот. Хәлғи һар гылә нымојәндә узв бе бәзне бәј. Һичкијән бәштә синә жәј әзыни ки, “ым әнҹәх чымы хәлғе, чымы һәрәкоте, ҹо һички ихтијорыш ни бы барәдә сыхани бывоты”! Әмә һәммәј толышимон, һар гылә толышән һәхманде ки, бывоты ыштә сыхани јаанки нәзәри! Әмә бәзнемон карде, рози быбәмон дечәј нәзәри ја рози ныбәмон. Тәнғыд ја тариф карде бәнемон әј. Тәрәфдор бе бәзнемон бәчәј нәзәри јаанки воте бәзнемон ыштә нәзәри. Һички мәҹбур карде әбыни ки, и ҹурә фикир быкә, иглә нәзәри сәпе быманды... Нәзәрон чанә веј, рангбәранг быбон, анән чок!

            Жыго зынејдәм, тынән чок зынејдәш ки, чәмә хәлғи һәрәкот лап сыфтәку бино быә мыхтәлифә иҹтимои, мәдәни, елми ијән ҹо ҹәмјәтон сохтејку.  Чәвон һар гыләјни ыштә хыдмәтыш быә чәмә умуми мыборизә тарыхәдә! Дәвардә әсри 80-нә сорон охојку ССРИ-дә рост быә умумхәлғә етирози һәрәкоти гыләј далғән омәј чәмә толышонышән рост карде ыштә һәхон роәдә бә мыборизә. Бы мыборизә шемонәдә толышон бә жыго гыләј нәтиҹә омәјн ки, һәммәјәво гырдә быбун гыләј сијоси партијәдә. Шәк ни ки, жыго гыләј партијә һестышбе ыштә мысбәтә, һәмән мәнфијә ҹәһәтон. Мысбәтә ҹәһәт әвбе ки, һәлбәттә, сијоси партијә хәлғи мыборизә сәдә мандеәдә, ым мыборизә һәнијән мытәшәккил бејдә. Интаси, әмә бә нәзәр быстәномон бәмә мығовимәт нишо доә ғыввә имконон, бәвәдә бә гиј гәтәнинимон ки, чәј дастәдә вејән чәтинә ко ни жәго гыләј сијоси тәшкилоти мыәјјән мыддәти дыләдә ипыллоғ карде.  Ыштән чок зынејдәш, әвон чокнә кардејдән, де кон чәмон кардејдән ын кој, әве ијо дәвардејдәм чә мәсәлә сәпе...

            Тосә бә мәғоми ки, әмә гырд сәрәсәјмон ки, чә ғыввә навәдә веј чәтине, бәлкәмән һич мымкун ни де жәго чәми мыборизә барде, хәјли вахт дәварде. Бы мәддәти дыләдә һәнијән ҹәһдон бин, әмма чәвон һич гыләјни бә дәрһәл нырәсәјн.

            Ым шә просесон һәммәј чок-чоки тәһлил карде бәпештә, әмә бә жыго гыләј фикир омәјмон ки, чәмә һәрәкот беном (аноним) быәнине. Јәне, чәј быәниниш ни конкрет гыләј офис јаанки ҹо гырдә быә вырә. Һички зынәнин ни һәрәкоти узвон номон, јәне, сијоһи быәнин ни. Әнҹәх 3-4, 5-6, 10-15 кәс вахтбәвахт вотәнинин һәрәкоти сыхани, бә ҹо-ҹо һодисон чәј мыносибәти, тәһлил кардәнинин дынјоәдә шә һодисон, мыәјјән кардәнинин чәмә мыборизә мәғсәдон, бә мәғсәди рәсе воситон, чәмон ијән методон.

            Комонин жыго тәшкил кардә быә һәрәкоти башә ҹәһәтон? Иминәни әве ки, һукмәт һа нәвејдә, һич ҹурә пәјдо карде зынејдәни ки, охо ком толышонин чәј узвон? Пәјдо карде зынејдәни, әве репрессијән карде зынејдәни әвони! Дыминәни әве ки, чәмә хәлғи мыборизә мәғсәдон ҹо-ҹо формонәдә тәсәввур кардә толышон, дынјо кон вырәдә бејдән быбун, ыштә зынә, ыштә зу вышкә сәвијјәдә бардејдән ыштә мыборизә, әмма лозим быә мәғомәдә әвон һәммәј сыхани нојдән бә иврә.   Ымән имкон дојдә ки, сијоси нәзәронышон дејәнды мывофиғ номә, һәтто ијәндыку вејән хош номә, лап шәхси мыносибәтонәдә дејәнды дышмен быә кали толышон һәммәј хыдмәт кардејдән бә иглә мәғсәди: чәмә хәлғи озавзије ијән ыштә Вәтәнәдә ыштә һәхи бәрпо карде! Чыми нәтиҹәје ки, бәпе бә һич гылә толыши чочин ныво ки, бәс бочи фылон толыш фылон мәсәлә барәдә фылон ҹурә гәп жәјдә јаанки нывыштејдә? Ком толыш ыштә хәлғи, чәј озоди мыборизә барәдә чич чокә чиј нывыштејдәбу, кон мысбәт сыхани вотејдәбу, әвон һәммәј хыдмәт кардејдән бәчәмә охон мәғсәди!

            -Ымони сәрәсәјме! Интаси ышты вотәјонку жыго бешејдә ки, ком толыш лап хәјонәтән кардејдәбу бәчәмә хәлғи, хыдмәт кардејдәбу бә шәјтонон – бәчәмә дышменон, шәв-руж чол кандејдәбу бочәмә хәлғи, әвонән һәммәј хыдмәт кардејдән бәчәмә умуми мәғсәди?

            -Әстәғфурулла! Һар гылә ҹо хәлғи һәрәкотәдә ымон раст омә чијонин. Дәдә-бобоку жыго быә, жыгошән жәгоән бәбе. Бымијән тәәҹҹуб карде лозим ни. Һәлбәттә, жәләвонон нәинки чәмә һәрәкоти узв, һич толыш һисоб карде әбыни, кардејән лозим ни! Бы барәдә веј нывыштә быә, һәлә бәбејән! 

            Һар гылә һәрәкоти тарыхәдә гыләј вахтон бејдән ки, бәвәдә жәләвонон кардә ко һәғиғәтән јолә хәто бејдән бо хәлғи умуми кој! Шык быбу бә Хыдо ки, чәмә һәрәкот веј вахте дәвардә һәмон мәрһәлә! Бәты чанә чочинән бо, иминәни, есә чәмә һәрәкоти узвон әксәријәт жәго гыләј шәхс бә мәјдон бешенҹән, әлбәһол зынејдә, әв чы кон лонә кижәје! Дыминәни, чәмә бәхти бәвәдә вардәше ки, чәмә дышмен зуманде әнҹәх дештә пули. Ағылыш, сәводыш анән веј ни ки, чәј бәчәмә вәјнә омутә, де пули ијән ҹо воситон бә даст сә комсә толыши кардә әмәлон гыләј јолә зијон быжәнын бәчәмә һәрәкоти. Бәты сырән бо, веј вахти жәләвонә толыши кардә әмәлон ыштәнән бәчәмә хәлғи хәј вардејдән. Бочи? Чумчыко, әмә вахти-вахтәдә мыәјјән карде зынејдәмон әј, чәјоән сәбәро кардејдәмон әј бәмә лозим быә сәмтәдә. Әве, аз һежо вотејдәм ки, коон ныбу де жәләвонон, быдә бәнә чыхчыхәнә “сә быбән”, чәмә осјо беәјән ыштә коәдәј...

            - Гыләјән парс: Бывотәмон ки, зынәмоне чокнә рәфтор карде лозиме де бәрмалә “дышмени”. Бәс хәјонәткор? Әмә чокнә бәпе мыәјјән быкәмон ки, фылон толыш ымружән чәмә һәрәкотәдәј јаанки бешә чәјо? Охо ыштән вотејдәш ки, нә әризә ни, нәәнки сијоһи?

            -Һа бәшты ағыли һејран, Амјәзо! Чокы воте! Ышты вотә одәмонән һәммәј иглә сиҹимисә дәвоште әбыни. Һестин жәго толышонән ки, ҹо-ҹо сәбәбон һыҹубәто мыәјјән гыләј вахтәдә бә ғәрор омејдә ки, һәни әзыни бы һәрәкотәдә бе. Әлбәһолән соф-ошко бәјон кардејдә ки, “ај чымы хосә билон, аз окыријејдәм бә кәно”. Әвони сәрәсе лозиме, рынҹи бејән лозим ни чәвонку. Чумчыко һар гылә одәм ыштән чок зынејдә ыштә кој. Һар гылә толыш ыштән дештә хоши мыәјјән кардејдә боштә ки, әв иштирок карде бәзне бы мыборизәдә ја не? Ҹәмати һәммәј де зубәзу ҹәлб карде әбыни бә мыборизә! Сыхани рости, чымы јолә һурмәтым һесте бә толышон ки, чокнә бәвотен, бәнә мерди вотејдән ыштә сыхани, чәјоән окыријејдән бә кәно, һәмән һәни мышғол бејдәнин де “ови лил карде”. Чандә жәго одәмон зынејдәм ки, мыәјјән вахти бәпештә ижән сәбарз-сәбарзи омән бә пешо, умуж быән бәмә.

            Жәләвононән һестин ки, бәрмалә елон кардејдән ки, бәс окыријејдән бә кәно. Интаси әвон һичуне шејдәнин, чәвон ко-сәнәтышон бејдә “ови лил карде”. Чәвонку ыштә итјоти гәте лозиме!

            Ижән ыштә итјоти гәте лозиме чә толышонку ки, һич шәјтонән  сә бекарде зынејдәни чәвон әмәлонку! Ым һәмон шәхсонин ки, һич ҹурә бејдәни мыәјјән карде ки, әвон бы һәрәкотәдән ја не?  Әвон ыштән бәрмалә вотејдәнин ыштә фикири, кәнооән веј одәмон ошко карде зынејдәнин ки, әвон “конҹон”, “декин”? Жәләвононән бә нијони жыго һәрәкәтон кардејдән ки, тосә ҹәмати вејни чәвонку сә бекарде, һәни ди бејдә, ко којку дәвардејдә!

            -Жыго сәрәсәјм ки, бы охонә дыглә групи аид быә “жәләвонон” барәдә изоһот дој, һәғиғәти бә хәлғи росније бевәҹ әбыни!

            -Һәлбәттә, әмә ыми кардәнинимон ки, јолә зијон ныгыны бәчәмә хәлғи ијән бәчәј мыборизә! Интаси ым жыго гыләј кафтә мәсәләје ки, һәддисә зијод һоди бе лозиме бы коәдә! Чыми гыләј сәбәб ыме ки, одәм тади гәте бәзне, побәпочә бәбе, шәр бәғанде бә гыләј толыши! Чок-чоки бә кој охој беше бәпештә бәрмалә воте бәбе кали сыханон. Дыминә сәбәбән ыме ки, жәләвонә одәм һар вахти бәнә “кемҹулә сефи” бејдәни ки, пегәти бә даст чәху, быбырни әј, нишо быдәј бә ҹәмати ки, һәғиғәтән кемыш дәғандә әј!

            Чымы нәзәр жыгоје ки, веј вахт сәрф карде лозим ни бә жәләвонон. Жијәдә-жијәдә мышоһидә карде лозиме чәвон кардә коон. Лозим быә мәғомәдә жыго де устоәти һәрәкәт карде гәрәке ки, быдә нә быск нысуты, нәәнки кәбоб!

 

 

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|