ЛАНКОНЫЖЭ “ИКЭСЭ” ЭhВОЛОТ

 

ЛАНКОНЫЖӘ “ИКӘСӘ” ӘҺВОЛОТ

Гәвчәрәз

-Шәвы де хәј, Амјәзо!

-Һар шәвы де хәј бо, хосә Амјәзо!

-Чич һесте, чич ни? Чы хәбә һесте чәмә мәһоло?

-Сыхани рости, чәмә инә мәһоло жәго гыләј тожә хәбә ни. Бо ымружнә иглә хәбә әве ки, вотәкәсон вотејдән ки, чәмә Лики Визәзәминәдә тикәвонәј һәркиһәрки егынијә. Һәни ҹо хәбәм ни. Интаси чокә хәбон һестин ијо – чәмә жијә Русијә појтахт Москвадә.

-Бәс вотејдәш, һич ни тожә хәбә! Бывотәни, чы хәбәје?

-Ыштыку гыләј хәбә беныше, әве азән жыго фикир кардыме ки, мәвужи әгынни чы ғәзијә барәдә бә гәп жәј! Мадәм һәкәм мандејдәш, бывотомәни, чич вотејдәм.

    Ды-се руж чыми бәнав мәлум бе ки, ијо жијә “јол-јолә”, әрбобә, пулсојбә, тәнхосојбә озорбојҹоныжон гырдә быән бә иврә, сохтәшоне гыләј тожә тәшкилот. Номшонән ноә бәј Озорбојҹони диаспорә тәшкилотон Координасијә Шурә. Елон кардәшоне ки, гуја чанә озорбојҹоныж һесте ијо, әвони һәммәј гырдә бәкан ыштә бојдәғи жијәдә...

-Кин ки ышты вотә ә “јолә мердон”?

-Зә, чыбызным, сыпәсә вејин, кытысә кам! Икәс-дыкәсе ки, пеһанде бызным боты чәвон номон? Ты ки арифә одәмиш, бәпе бызни кин әвон! Чә номешә, номонышон номонсә мандә “икәсон” номон бымән әзбәрин зывононәдә. Зәһмәт быкәш, дәши бә интернет, баһанд әјо. Ижән чы еһтијоҹ һесте ки, сәнибәтон гылә-гылә бывотым боты әвони? Чымы мәғсәд чәвон номон пеһанде ни. Ныможәбыр мәби, имкон быдә аз тосә охој бывотым ыштә сыхани, тынән сәрәс чымы мәтләби.

-Жәгобу, чок, гушым бәтыкује...

-Дыли сыханыме, шинә Амјәзо, ды руж бәнав ки, ын хәбә певыло бе бә дынјо, һич дығғәт дој фикәдә ныбим. Чумчыко камәдә-вејәдә бәләдим бә һәмонә одәмон ыштәнијән, бәчәвон ғырјәтијән! Фырсәте вотәјнә, быдә боты гәп быжәным гыләј ланконыжә хонәхо әһволоти, һандәкәсонән баһандын, чок-чоки сәрәсын чымы воте пијә сыхани мәно: Сәвети вахтику гыләј мерд жијејдәбән Ланкони дијон гыләјнијәдә. Ко-сәнәтыш һежо “шпилјон” гәте быә. Бәболыш бә вотәкәсон гиј, гуја бә вахти гыләј медалшән сәјбән КГБ-ку. Сәвети һукмәт выло бе бәпештә икәсә мандә “нунвај”. Әмма канә хосјәтыш мандә һежо жәго! Һукмәт дәгиш быбујән, чәј гыләј даст һежо “јолон” довнәдә быә. Диарәдән һежо бәштә синә жәјдәјбән ки, чиче-чиче, нышт-әшт кардејдә де рәјони јолон. Ружон ружони чәј пыә егынејдә мардејдә. Јасе, диј ҹәмат омә гырдә быә чәј кәдә. Мәло Ғырон һандејдә, ҹәматән дард-ғәми дыләдә гәдә-гәдә гуш дојдә бә мәло. Ым мердијәлијән ныштә бәј гәвәдә, пегәтәше дивоо еһаштә телефони дастәк, декисә бә гәпе. Арәдә “миәллимә, миәллимә” вотејдә ки, быдә ҹәмат жыго бызны, әв бә гәпе де Ланкони чә вахти “јоли”. Бы вахти чәј зоә дәшејдә бә дылә. Виндеәдә ки, пыәш бә гәпе де телефони, ыштәни огәте зынејдәни, вотејдә: -Дәдә! Пыәш вотејдә: - “Зә, ты там быжән, ышты гәво чокә сыхан бенибәше”! Зоә и кәрән овардејдә бә пыә, һәмон ҹәвоби сәјдә. Мылхәс, охојәдә зоә бәј вотејдә ки, “Дәдә, телефони мафтул сијә, әв ко кардејдәни”! Мердијәли рыкно бејдә, вотејдә: -“Аз вотымехо, ышты гәво чокә сыхан бенибәше”!

   Чә хонәхо әһволот ныбу, аз сыфтәку чок зынејдәм ки, һич ғәләт кардәкәс нин ым тожә тәшкилоти сохте пијәкәсонән (бочи вотејдәм “сохте пијәкәсон”, тикәј бәпештә сәбәрәсеш)!

   Пешо бәнем чыјо-чәјо думојәнды мәхлоғ нывыштејдә ышты нәзәри де ын кој әлоғодор. Һај гыләј чиј нывыштејдән. Кали кәсон де бә жыго гыләј фикир омәјн ки, гуја Москвадә жијә ым хонәхонән гыләј тожә “Иванишвили” һозы кардејдән бо Озорбојҹони!

   Ты ыштән чок зынејдәш ки, бәмә һич тати-сардыш ни чә одәмон кардә коон. Әве чә тәшкилоти барәдә гәп жәј фикәдә ним. Бомы мәрағин ыме ки, чәмә кали толышон кам мандәбе осмонәдә быпәрын ки, гуја бәвонән чичсә бәрәсе бы ғалмәғаләдә! Шојво кардәкәс ки, бә ијәнды шојә хәбә роснијәкәс ки! Виндәкәсон жыго нәғыл кардејдән ки, мәвотбән кали кәсон маштәку тосә шанго сәкујејдәнбән ын шәһри, бә һәмә толышон шојә хәбә дојдәнбән ки, “һа, һәни лап кам мандә, Хыдованди шејдәмон бә Озорбојҹон”!

   Ымијән зынејдәш ки, аз кам-кам бешејдәм бә шәһр. Зинә де тәһәри арыштәмбе шәјтони нынг, бешәбим бә шәһр. Чәмә лап хосә билон гыләјни бәмы раст оменҹән, шојво дыләдә әлбәһол чымы нәзәрыш зыне пијәј чә һәмон зәһриморә тәшкилоти барәдә. Кешкә бәпе вотәмнәбәј, әмма һәни дибе, вотем, зә, бәс хәбә ни ымружнә бәјонотику? Воте чы бәјоноте? Вотем бәс чә тәшкилоти јолон бәјонотшон доә ки, мәвотбән мардә омәјбән бә дынјо ын тәшкилот. Әве, әвон дәбјовнејдән чә тожә тәшкилоти фәолијәти. Тосә бә вахти ки, гуја чәвон јол бәпе бышу бә Илһами зијорәт, әв чокнә бывото, жәгоән бәкан. Јәне, мәслоһан бызно, тәшкилоти марди бәнон бә реанимасијә ки, бәлкәм де тәһәри оҹон бијән әј! Не, које, бердәм әв рози ныбо, бәвәдә јодо бекән ә тәшкилоти, быбән дәкандән марди! Бәјоноти охојәдән һәлә хәјли јалтәғәтијән кардәшоне бә Илһами ијән бәчәј јолјәти кардә һукмәти ки, быдә вејән хујәжә ныбу әв! 

   Шинә Амјәзо, вотыме, әнҹәх пәшимон бим бәштә вотәј! Кам манде чәмә билә пәшјә быбу, һолјәт быкә! Чокбе соәдә мандәбимон, сәринә ваваз гынејдәбе, чандибәчандон де тәһәри рангыш омәј бәштә!

   Есә зынәј чиче чымы мәтләб? Зә, чанәдә воте бәбе бы толышон ки, емәгынән чыми-чәј думо, умдәво мәбән бә һампо! Чәвонку бошмә нунә бу омејдәни! Чокише гырдә быбән бә иврә, гыләј чорә быкәмон боштә хәлғи! Чич быкәм ки, чәмә кали толышон лап бәнә бә ланконыжә “икәсә” ғәзинә, зәмонә чанә дәгишән быбо, даст кәше зынејдәнин ыштә хосјәтику! Һа бәвон вотејдәм ки, зә, ымони һич мығојисә карде әбыни де чәмә һамсијә гырҹијон, чымонку чәш мәкән жәго мердәти, жәго ғырјәт! Чы фојдә? Јолон вотәјнә, ә чиј ки де шыти омәбу, ғәб боме чәј еһдәо!

   ...Мәшән чыми-чәј думо, ај билон! Әмә чич карде бызномон, ыштән бәпе быкәмон боштә хәлғи! Јодо бекән ә хонәхон! Ҹони ғырбон быдән бәштә хәлғи ижән бәчәј балон!