МУРВЭТИ JАhУ

Ф.Ф. Әбосзодә

МУРВӘТИ ЈАҺУ

...Шәви и аләмәдә нывыштәме мәғалә, вығандәме бә сајти редактори, чәсонә ныможым вотә, саат 5-дә дәшәм бә вырә ки, саати быһытым. Әнәһој дәвардәни, имон азизе, 2-3 саат әби һытәбим, телефони занг омәј: Чәмә быјә Мурвәтбе. Дастәдәш отәш-дастәдәшән кыләш, бәвотеш есә мәһоли вәш бәно! – Зә, чич быә? Коврә хәробә мандә? Коврәшон дәрыжнијә? Коврә овәјзи бардәше? Конҹо гынијә бумәларзә?

– Һәни чич быәнине? – вотејдә. Чәмә дард гоне овәјзисән, бумәларзәсән!  Мандә ғырјәтымонән дасто ше! – Зә, охо чич быә, чок-чоки сәросын мыни, быдә чымы һанумжәнә мазг бызны чич һесте, чич ни!

– Әмә ныштәмон ијо, һај мышғолимон дештә ружә маши, әјо – Озорбојҹонәдә, Ланконәдә чәмә номуси жәјдән бә ләғы!

– Зә, кије чәмә номуси жипо һастәкәс?

– Чәмә вәјујон омән ымруж Ланконо, бәмә-шивәне ијо!

– Чич быә? Хыдо ныкардә ки мардә? Бочи бәмә-шивән кардејдән?

– Зә, мерди кинә товыстонәдә кәшыш окардә шә бәштә кә бә Ланкон. И манг ијән ды руж мандә ыштә пыә-моә тоно. Омәсә Ланкони аеропортәдә дәчыкән чәј јәхә ки, бәс һали-ғәзијә жыгоје: Шымә ки Русијә шәһрвандишон, бәпе оменҹән бә Ланкон, ғејдијото дәвардәбәјшон. Мадәм ки, ғејдијотон ни, шымәни вадој әзынимон бә Русијә! И кәс быбу, да кәс быбу, бәвотем дард бә нимәје! Милләти вејни бы ружәдә! Тикәј чәм-хәм карде бәпештә гылә-гылә дәғандејдән бә кабинет, дәмандејдән бо очыне! Одәмәсә чәвонку 800 доллар сәшоне, чәјоән “Давај, до свиданија”!

– Бәс бочи ыми зыне-зыне ә бахтәвәри кинон вахтәдә ғејдијото дәвардәнин әјо?

-Зә, кефику гәп жәјдәш! Бәгәм ғејдијото дәварде һостоне! Ғејдијото дәвонијәкәс кије әвони? Әнә бә ше-омә дәғандејдән мәхлоғи, анә сәнәд тәләб кардејдән, кам мандә мәҹбур быкән ҹәмати ки, бышун ыштә бобо ғәбо әрајиш бијән ки, һәғиғәтән әвон бы дијәдә, шәһрәдә бә дынјо омән! Чәјоән Озорбојҹони сиојдимә шәјтони һукмәти дасто де тәһәри витән омән бә Русијә ки, копуги нунә пул ғәзәнҹ быкән боштә балон! Ијоән, ыштән зынејдәш, де һәзо әзоб-әзјәти сәшоне Русијә паспорт ки, сыпә-сығон ныгыны бәвон! Һукмәтән ымони һәммәј чок зынејдә, әве лап толыши туми песындынејро, әј тумәбыр кардејро есә дәвардә бы чәм! Жыго карде пијејдәше ки, һәни быдә иглә толыши нынгән ныгыны бә Толышстони! Һа, де минволи, ғејдијото дәвонејдәнин әвони. Гылә-мылә одәм бәбе ки, әвән ја де танышәти, ја де рышвә зуј, тәһәри егыне зынејдә бә ғејдијот. Мандәјоәнән әнә ше-омә кардејдән, и кәрән оғо бејдән ки, бәс вахт-вәдә тәмом быә, огарде лозиме бә Русијә. Ымһа, ым чәмә хәлғи дард! Чанә бәпе әмә тов бијәмон бы жыго һукмәти? Чанә бәпе толыш зыллләтәдә быбу Озорбојҹони һукмәти дастәдә?

– Чок, бовәм карде. Әмма һежо иглә ымонин шикат кардәкәс, ја һәнијән һесте?

– Ва, дәдәм вај, нәнәм вај! Аз бәты вотејдәм илләт һәммәј быружәдәј, тынән бахтәвәрәтику гәп жәјдәш! Әфа, чәмә ланконыжә зоә товыстонәдә шә бә Ланкон. Шә ружи маштәнәј омә бә паспорти идорә ки, ај мердон, аз Русијә шәһрвандим, ғејдијото дәвонән мини! Вотәшоне, ғејдијот фылон ни, бәшмәшон ду вотә! Бәмәшон план доә ки, Бокујәдә Һејдәр Әлијеви мәркәз сутә, әј бәрпо кардејро пул гырдә карде лозиме. Әве, әмә де ғејдијоти номи одәмәсә 500 мәнот пул гырдә кардејдәмон, дојдәмон бәвон!

– Тәфлигы чиче? Чич быкәмон?

– Вотејдәм, гыләј овардномә бынывышт, әј бывғандәмон бә Авропә Москадә быә сәфирон, бәлкәм гыләј чорә быкән бо толышон!

-Хок бәшты әғылә сә! –  вотејдәм бәј. – Зә, де мәктуби, оварди ко сәбәро бәбе?! Авропә ыштән епырт омә, тәсејдә ғарзи, боһрани дыләдә, ыштә ҹони һајәдәј! Әвон әвотнин ки, ым толыши мердон мардән ки, чәвон номуси, ғырјәти нахчыванышон Ланкони аеропортәдә жипо һастејдән, һәлә чәвон пулонән сәјдән чәвон дасто?! Зә, бәшмә вотеәдә ки, Һилал зиндонәдәј, пикет карде лозиме, боән. И кәсику сәдо бешејдәни! Һар кәс “чырт” кардејдә, шејдә ыштә кој думо! Вотејдәш, зә, һа толышона, һәзо мәнот быдән гыләј китоб быһырән, быдә шымә әғылон умутын бә толыши һанде! Ышәт амон пеғандејдән, һәлә бәмә ахмәхән вотејдән, шејдән бәштә кеф! Вотеәдә ки, зә, ај беғырјәтон, гыләј руж бәме лозиме бо Толыши, де ки чәмә ыштән довләтымон ныбо, жыгә бәкәшемон! Һар да гылә толыши нәв кәс бунд гәтејдә одәмику ки, бәс Озорбојҹон чокнә бәбе? Ымонин ышты ғырјәтмандә толышә зоон, ышты вотәјнә “чокә зоон”? Чымон чич чоке һәни?

– Чок, бәс ты чич тәфлиг кардејдәш? – бәмы вотејдә.

– Тәфлиг ыме ки, быдә бә һички хото ныгыны (чумчыко толыши бә толыши вотә сыхан веј вахти бәнә гуллә гынејдә бәј, әмма һампо доә дымжонијән бәнә шинә чај пешомејдән!), де ки толыши женон сәпо рост ныбон, мердон вејнијәдә рост быә ғырјәт ни! Бышән гәп быжәнән де ҹәмати, гырдә быкән әвони һәммәј, бешәмон бә пикет, бебру быкәмон Озорбојҹони шәјтонә һукмәти дечәј Һејдәр Әлијев мәркәзи бә иврә ҹәми дынјоәдә!  Гырдә быкән ҹәмати, аз ыштән бәбам әвони бә пикет! Ҹо рош ни, ај чымы билә! Әмә ыштә зуј нишо ныдомон бә һукмәти, һежо бы ружәдә бәбемон, ружбәруж лап бә јавә руж ебәгынемон!

Есә зынәј чиче чымы тәфлиг?

-Һа, сәрәсәјм тыни.

-Жәгобу, быши мышғол быби де кој...