Разделы
Архив
| Пн | Вт | Ср | Чт | Пт | Сб | Вс | |
|---|---|---|---|---|---|---|---|
| 1 | 2 | 3 | 4 | ||||
| 5 | 6 | 7 | 8 | 9 | 10 | 11 | |
| 12 | 13 | 14 | 15 | 16 | 17 | 18 | |
| 19 | 20 | 21 | 22 | 23 | 24 | 25 | |
| 26 | 27 | 28 | 29 | 30 | |||
Рассылка
Подписаться на рассылку:
Оцените содержание статьи?
(всего 104 голосов)
Изменить размер шрифта
РУЖӘ ИДОН МЫБОРӘКЕ,
ХОСӘ ТОЛЫШОН, ҸӘМИ МЫСЫЛМОНОН!
ХОСӘ ТОЛЫШОН, ҸӘМИ МЫСЫЛМОНОН!
Дылон сыри Хыдо бәзне. Ки бәзне воте ки, фылонкәс ја фисонкәс де кон мәғсәди, кон нијәти омә бә имон? Ки бәзне иддо карде ки, чәј имон һәмәкәси имонисә камиле? Ја чәј вотә нымож, кардә ибодәт һәмәкәси кардәјсә һәнијән чоке? Ки бәзне воте ки, чики вотә нымож, кардә ибодәт һәмәкәси кардәјсә рә бәрәсе бә Хыдо дәрго, мыстәҹәб бәбе?
Ымони ијән һәнијән веј чијон әнҹәх Хыдо зынејдә! Мадәм ки жәгоје, бәс чиче чәмә имони, вотә ныможи, кардә ибодәтон мәно? Бочи гыләјни нымож вотејдә, ибодәт кардејдә, гыләјни гушәләхә карде-карде шејдә дештә гәтә рој, охонәсә “Хыдо кәриме!” вотејдә? Әмә бәзнемон воте бә хонәхо ки, бочи беныможе, ја имонәдә ни? Бочи чәмә гырдокәноәдә һәзо-һәзо одәмон нымож вотејдәнин, ибодәт кардејдәнин?
Һәлбәттә, һесте “Әмр бе-Мәруф”, “Нәһј әз-Мункәр”. Мәношән ыме ки, һар гылә мысылмони ғарзе ки, бәштә незә одәмон, ов-авлоди нишо быдә һәхи рој, опыртыны әј јавә роо, бекә чәј дыло шәјтони вәсвәсә, бијә әј бә имон! Интаси бымәдән веј парсон һестин ки, чәвон һәммәј мәно бо бәштә имонсојб вотәкәсон вејнијән мәлум ни. Әве вотејдән ки, сыфтә бә тәрбијә доәкәси, панд доәкәси ыштәни тәрбијә, панд дој лозиме! Јәне, мәслоһат доәкәс анә һоди быәнине ки, охон нәтиҹәдә бәштә ыштә имони зијон нывә! Бә ҹо кәси мәслоһат ныдоә һар кәс бәпе һәзо кәрә но-пегәт быкә ки, чанә чәј һәхыш һесте бо ыми кардејро! Һәлә бы азизә ружонәдә әј вотејдәним ки, чанә одәмон имонику тикәјән дијәро шејдән бәштә имонсојб, момин вотәкәсон һәғиғи әмәлон мышоһидә кардеәдә...
Чиче чәмә жимони мәно? Бочи әмә жијејдәмон бы фанијә дынјоәдә? Чуне шејдәмон, ромон бәкеје, чич чәш кардејдәмон ыштә жимонику?
И манге ки, бә ружәмон. Һар гылә ружә гәтәкәс бә дастпочәје ки, ын манги һәнијән чок дәвоны, ыштә имони һәнијән камил быкә. Ружә гәтејән бәнә бә имон оме веј сыроныш һесте. Һар кәс де гыләј нијәти, де гыләј мәғсәди ружә гәтејдә. Чыми мәно сәрәсоән, сәнырәсоән... Ымијән әнҹәх Хыдо зынејдә ки, чики гәтә ружә мыстәҹәбе, ғәбуле Хыдо дәргоәдә. Чәмә вәзифә ыме ки, дыво быкәмон бә Хыдо ки, һар гылә мысылмони гәтә ружә ғәбул Быкә!
Ружәмо гыләј манге ки, чәј сәвоб, чәј нур бә һар гылә , мысылмони, бә һәмә мысылмонон вәс кардејдә. Лап бә һәлә быәкәсонән дештә кали әмәлон ијән һәрәкәтон бы мангәдә жыго сәвоб ғәзәнҹ карде зынејдән ки, чәвон мәноән мәлуме әнҹәх бә Хыдо!
Сори јонзә манги һар гылә мысылмон жијејдә боштә ыштәни. Бы јонзә манги дыләдә чәмә кардә һар гылә ибодәт, вотә нымож, кардә дыво, хәјмандә әмәлон ијән һәрәкәтон әнҹәх бәчәмә ыштә хотоје. Јәне, әмә әвони кардејдәмон ки, ыштә ә дынјо ғәзәнҹ быкәмон.
Кали мәлон зывоно мәҹлисонәдә мәсејдәмон ки, “ружәмоәдә мысылмон бәпе ыштә чәшон, ыштә зывони, ыштә гушон ијән ҹо чијон париз быкә, чәш быкә гыноку”. Бәлкәмән ыштә дыләдә һәмон шәхс ҹо чијон гәтејдә. Интаси чәј вотәјку жыго бешејдә ки, гуја әнҹәх ружәмоәдә ымони кардәнине һар гылә мысылмон. Һәлбәттә, жәго ни! Мысылмон, имонсојб, момин бәпе һа руж, һар дәғиғә, һар ләз жәгоән быжијы. Жыго беәдә парс бешејдә бә мијон: Жәгобу, бәс Ружәмоә манги ибодотон, дывон, ныможон и.ҹ.ч. фәрғ чиче мандә мангонку?
Чы зынәјку, фәрғ бымәдәј ки, јонзә манги дыләдә һәмонә сәвобә әмәлон де Хыдо номи кардә мысылмон, Ружәмоәдә әвони һәммәј кардејдә бо Хыдо хото! Јәне, јонзә манг боштә ыштәни жијә мысылмон, и мангән жијејдә бо Хыдо! Чәј кардә һар гылә дыво, вотә һар гылә нымож, кардә һар гылә әмәл бә Хыдо хош омејро бејдә! Әве вотејдән ки, Ружәмоәдә мысылмонон һәнијән нез бејдән бә Хыдо. Тәсодуфи ни ки, бы мангәдә Хыдо чидар, кәшбәку кардејдә шәјтони,бастејдә чәј даст-почә, имкон дојдәни ки, әв вәсвәсә дәнә бә мысылмонон дыли. Чә тәрәфоән Хыдо тобәто окардејдә ыштә хәјмандә кәјбон, де јолә һәвәси ғәбул кардејдә Ыштә бәндон кардә дывон ијән ибодотон!
... И мангбе һәзо-һәзо мысылмон дынјо һар вырәдә бә ружәбе. И мангбе шәјтон кәшбәкубе, чидарәдәбе. И мангбе мысылмонон имтоһонәдәбин Хыдо вәдә. Һар гылә ружә гәтәкәс бә кеш бешәбе ки, чәј кардә ибодотон һәммәјсә речин быбун! И мангбе әмә һәнијән незбимон бәштә Рәбби! Әнҹәх ружә гәтәкәсон бәзнен ки, чы речинә мангбе ын манг! Әнҹәх әвон һәммәјсә чок фамејдән ки, чанә хошбе ружә гәте, Ружәмоәдә ибодәт карде! Әнҹәх бәвон мәлуме ки, чанә хосе бә Хыдо нез бе! Әнҹәх әвон сәрәсејдән ки, чанә гоне бы манги “Хыдоһафиз!” воте, чәјку есије!
Чымы сәрәсејку, ыме чәмә жимони мәно: ижән јонзә манг чәшбәро бәбемон, интизорәдә бәбемон ки, кејнә боме есәнә Ружәмо! Де интизори чәш кардејдәмон ки, Ружәмо бо, әмә ружә быгәтәмон, јәни һәнијән нез быбәмон бә Хыдо, хош боәмон Бәј! Жыгонә – чы Ружәмоо бә Ружәмо һар гылә моминә мысылмон ғәзәнҹ кардејдә ыштә ә дынјо. Ружә гәтәкәсон һәммәјсә чок сәрәсејдән ыми!
...Жимон ыштән гыләј јолә имтоһоне бо һар кәси! Интаси чы имтоһони дыләдә һестин һәнијән ҹо имтоһонон. Ружә чы имтоһонон гыләјније. Бо һар кәси ән гонә ко имтоһоне. Һички бәштә синә жәј әзыни ки, бетарс-ларз бә имтоһон ше бәзне! Әмма чы бахтәвәре ә шәхс ки, имтоһоно, хысусән Хыдо имтоһоно, сәбарз бебәше! Әве бә ружә дәвәт кардејдәмон шымәни һәммәј!
Жыгонә, имтоһон дој-дој, ыштәни дәвинә карде-карде һар гылә мысылмон ја һәнијән нез бејдә бәштә Рәбби, јаанки тикәјән дијәро еғандејдә ыштә рој Чәјку... Чы хосе бәштә Хыдо нез быәкәсон һол!..
Ымруж Иде – мысылмонон ән јолә Ид – Ружә ид! Ыштә мысылмонә хәлғи, ҹәми мысылмонон тәбрик кардејдәмон де Ружә иди мыносибәти! Һар гылә ружон ид быбу, чәмә азизә хәлғ, һәмә мысылмонон! Һежо нез быбән бә Хыдо! Мыстәҹәб быбун шымә гәтә ружә, вотә ныможон, кардә ибодотон ијән ҹо хәјмандә әмәлон! Хыдо рәһм быкә бәчәмә хәлғи! Хыдо комәг быбу бәштә бәндон!
Комментарии (0 добавлено)
Политика и экономика
Интервью / Заявление
