ТОЛЫШИ РОСТБЭ ЭЛЭМ

 

ТОЛЫШИ РОСТБӘ ӘЛӘМ

 

Мо зывони һәвәсдә,

Умрыш сә бе ғәфәсдә.

Вотше охон нәфәсдә:

“Толыши ростбә әләм, -

Чы Зулфиғари ғәләм”!

 

Ки вотдә толыш гардә?

Мәвжи әв ыштән мардә!

Чәј чәши пардә вардә!

Толыши ростбә әләм, -

Тофиг Илһоми ғәләм!

 

Ки вотдә толыш лоле?

Дылдә кәломыш боле!

Шери нығылә чоле!

Толыши ростбә әләм, -

Ханәли Толыши ғәләм!

 

Ноһәх ныкәшон әзоб,

Баһандон, быкон сәвоб.

Бә кәсон дојдә ҹәвоб:

Толыши ростбә әләм, -

Вәлиша маму ғәләм!

 

Толыш сијо рангәдә,

Һәшт сор зылми чангәдә,

Вотыше һар вангәдә:

Толыши ростбә әләм, -

Әли Насири ғәләм!

 

Бә Ирәвон ше, омәј,

Вотше бәчәвон һәммәј:

Банди Хәрәбоғ чәмәј!

Толыши ростбә әләм, -

Чы Фәхрәддини ғәләм!

 

Хыдо сәјсә һәхе-һәх,

Былындә куј, барзә рәғ!

Дојдә һәхику сорәх,

Толыши ростбә әләм, -

Бајрами рушнә ғәләм!

 

Чы бандонку сәјдә тәб,

Дыләдәш иглә мәтләб:

Быбу толыши мәктәб!

Толыши ростбә әләм, -

Чы Нәримани ғәләм!

 

Чәшоныш һа нәмине,

Һар сыханыш ғәмине,

Дардыш Толши зәмине!

Толыши ростбә әләм, -

Јәдулла Сәјади ғәләм!

 

Хәјәвоне – хәј рышдә,

Шәри пешти арышдә!

Бо арифон нывышдә,

Толыши ростбә әләм, -

Сәид Хилгәти ғәләм!

 

Барзә һале мијонрығ,

Бә һытәјон жәјдә шығ,

Бә шәјтони ғандә сығ,

Толыши ростбә әләм, -

Меһтәмәнсони ғәләм!

 

Вотдә, зывоне имон,

Зывоне дарди дәмон.

Детобә охорзәмон,

Толыши ростбә әләм, -

Забил Мәдожи ғәләм!

 

Бы зывони марде ни,

Ҹони дештә барде ни,

Марде һесте, гарде ни!

Толыши ростбә әләм, -

Азәр Толыши ғәләм!