hМ!.. Бывотым чич быкэм, нывотым чич быкэм?

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 25 голосов)
Изменить размер шрифта Decrease font Enlarge font
image


 

 

 

Ф.Ф. ӘБОСЗОДӘ

ҺМ!..

Бывотым чич быкәм, нывотым чич быкәм?


          Зинә һандыме Һилали зиндоно нывыштә дыминә номә /дијәкә: http://haqqin.az/1223-hilal-mamedov-za-chto.html /. Кешкә һандәмнәбәј! Һәлә чәј иминә номә һандеәдә чымы дыли еныштыше ки, ај дили ғафил, консә һәнәк шејдә!..

 

         Ыврәш мәлуме ки, зиндон һәләбәсә ко ни. Бә һич Хыдо бәндә ғысмәт ныбу әв! Хыдо шојде ки, ҹәми толышон шәв-руж бә һәрәкәтин ки, Һилал бешу зиндоно. Интаси чокнә бешәнине?

         Гыләј мәсәлә һесте ки, бәмы һәлә дырыст мәлум ни ки, ым мәктубон һәғиғәтән Һилал ыштән нывыштејдә, јаанки кијсә әвони “чок-чоки” редактә кардејдә, чәјо вадојдә бә “ефир”?! Имконән ни ки, ыми хәбә быстәнәмон Һилали ыштәнику. Ә одәмон ки, чәј мәктубон дојдән бә толышә сајтон, чәвон әсли дојку имтино кардејдән. Дојдәнинәни, чич бәбе карде? Бәс әмә чокнә быкәмон, чич быкәмон? Аз чок сәрәсејдәм ки, ым һәнәкон охој Һилали ыштә сәдә бәчәкен! Интаси бәвәдә ди бәбехо!

         ...Нәвузәли мәрһум дештә иглә сыхани манде Толыши тарыхәдә: “Аз толышим, әве мыншон дәғандә бә зиндон”! Интаси әјән ым сыханыш воте лап охојәдә. Бәвәдә ки, һәни јәғыныш карде ки, чәј тале һәлл быә. Бәвәдә ки, һәни дырыст әмин бе ки, һич хәјыш ни бы һукмәти ловә карде! Тосә бә вахти, озодијәдә беәдә һежо вотыше ки, “Озорбојҹонәдә милли зәминәдә чымыни-ыштәни (дискриминасијә) ни”!? Бы незони “Толышон сәдо” чап кардыше чәј зиндоно нывыштә охонә мәктуб. Кешкә чапыш кардәнәбәј! Чумчыко әјоән ә мәрһум ын һукмәти, Һејдәри ијән чәј зоә тариф кардејдә, ижән нывыштејдә ки, “Озорбојҹонәдә милли зәминәдә чымыни-ыштәни (дискриминасијә) ни”!? Чок, быдә ныбу! Жәгобу, бәс бәвәдә бочи тыншон “толыш бе горәнә” дәношоне бә зиндон, чәјоән бешин бәшты охој!?

         Ај чымы хосә толышон! Фикир мәкән ки, бомы һостоне ым сыханон нывыште! Не! Валлаһ, һостон ни! Интаси мәҹбурим бынывыштым! Чумчыко чанә нывыштејдәниш, вотејдәниш, чәмә Јолон вотәјнә, “гәлә нав чуне шејдәбу, чәј думоән әјо шејдә”! Чәмә ыштән тале дәрс бејдәни бочәмә толышон! Дәрс бәбәј, Һилал жәго чијон нәнывыштихо! Нәнывышти ки, Толыши-Муғани Мухтарә республикә “идејә ыштән халис гыләј провокасијәбе”, “чәј мыәллифи ки бејән, де кон мәғсәди чәј кардејән әмә бәвәдән сәрәсејдәбимон”! Һилали 1993-нә сори Ланконәдә виндәкәсон, деәј һәмроәти кардәкәсон ком гыләјни воте бәзне ки, бәвәдә Һилал ТММР-и “провокасијә” һисоб кардејдәбе? Жәго ныбехо! Һилал вист ружи дыләдә јәни анә дәгиш бе, анә нифрәтыш карде бәштә хәлғи, бәчәј тарыхи ки, дәманде бо тәһғир карде ыштә хәлғи ән шәрәфинә сәһифон гыләјни? Охо чымы нәзәрәдә бә ТММР-и жәго тәһғир кардәкәси һич толыш воте әбыни!

         Фәрз быкәмон ки, һәғиғәтән Һилали ыштән нывыштәшни ә сыханон. Хуб! Бәс әмә чыконҹо бызнәмон ки, ым ҹо кәси һәнәке? Һәрчәнд ки, чы һәнәки сәдә ныштәкәсон мәғсәд бәмә мәлумехо! Ым бәнә һәши чоштә мәлумә које ки, ә одәмон Һилали бардејдән де мәрһум Нәвузәли шә рој! Јәни Һилал ыштән, ја чәј незә авлодон зынејдәнинбу ыми?

         Бывотәмон ки, ым һәнәки ҹо одәмон бардејдән. Бәс бәчәмә кали толышон чич бывотәмон? Чәвон кардә ән “јолә” ко әв бе ки, Һилалшон дышмен карде де Ирони! Һәнијән сәрост бывотомон, Иронышон дышмен карде де Һилали! Бәвотешон бочи? Иминәниш әве ки, Ирони барәдә чич бывотонән (бәболыш бә вотәкәсон ыштән гиј!), һички воте әзыни ки, әјо “сынни-шиә” проблем һесте! Охо, ај чымы билон, Ирон һәмон довләте ки, әјо һәтто јәһудијонән, хачпәрәстонән, зәрдустијонән  дештә кефи жијејдән! Ыврәш һәғиғәте ки, Имам Хомејни (ә) инғылоби лап сыфтәку “вәһдәтыш” елон карде, јәни ғәдәғәныш ној бо “сынни-шијә” сыхани кардәкәсон! Есә чич бе, бә Һилали рәсеәдә Ирон дышмен бе бә сыннијон? Хыдоку бытарсән һич ныбо, бәндәку тарсон нијебу!

         Дыминәниш әве ки, бәки лозиме анә дујә гәпон, мәсәлән, мәрһум Нәвузәли барәдә? Охо әј зынәкәсон һәммәј чок зынејдән ки, ә мәрһум шиәбе! Ым чы шәре ғандејдәшон бә мардәкәси? Ым чы һәнәке?!

         Ым коон кардәкәсон мәвужи жыго фикир кардејдән ки, демијән Һилал хош боме һәм бә Озорбојҹони пантыркистон, һәмән бәчәвон мәнәви пыә – Авропә! Зә, ај әвомон, Авропә һички перохне әзыни зиндоно, перохне әпинише, пенибәрохнејән! Авропәвыжон дард пули дарде! Һәмон ә Лејла Јунус ни бәгәм Һилали жыго шәкбәлујә мәктубон чап кардејдә, бы незони нывыштејдәбе ки, Авропа мәмурон, депутатон һәммәј рышәвәхорин! Чандә соронин аз нывыштејдәм бы барәдә. Бәмы гуш дојдәнишон, бовә кардејдәнишон, ыштән бәзнешон, әмма һич ныбо бә Лејла ыштәни бовә быкән! Авропәвыжонро Һилали гәте мандејдә бә гыләј јолә пулә тумә гәви обе! Бомен, тикәј зикмәвулә бәкан, чәјо бәстен ыштә пулон, бебәшен бәшен! Озорбојҹонәдә тосә есә гуја че Авропә озод кардә шәхсон һәммәј ыштә “сроки” ныштән, чәјә бешән бә дашт. Әвән һәни бәвәдә бејдә ки, Озорбојҹони һукмәт безо бејдә бәвон рышвә дојку, јаанки гыләј ҹо јолә гозәшт сәјдә чәвонку, чәјо ыштә сәјку кардејдә зиндонәдә ныштәкәси...

         Һәлбәттә, чымы етирозым ни ки, Авропә Һилали мыдофиә быкә. Азән вотејдәм ки, быдә ҹәми дынјо мыдофиә быкә әј! Азән шәв-руж бә һәрәкәтим ки, жәгоән быбу! Әмма сәрост дијә карде лозиме бә һәғиғәти чәши дылә!

         ...Һилали дыминә номә жијәдә нывыштәшоне ки, ыми нывыштеәдә һәлә дәгиш кардәшонныбе чәј маддә. Мәношән ыме ки, гирәм ымруж Һилал ыштә тарыхи жәго тәһғир кардејдәбу, ыштә тожә маддон зыне бәпештә ҹәми толышон тәһғир бәка ки, чиче-чиче хош бо бә пантыркистон! Ки бәмы бәзне воте ки, әкәни (јаанки, чы фәрғыш һесте, чәј мәктубон редактә кардәкәсон әкәнин) ыми?  

         Ҹо кәси воте әзыним, аз шәхсән ыштән бә ТМР-и “провокасијә” вотә шәхси, лап чымы доғмә балән быбо, мыдофиә карде әзыним, ај милләт! Әве, ја Һилали авлодон чәј нывыштә мәктубон әсли бекән бә мијон, быдә бызнәмон әв ыштән чы фикирәдәј. Јаанки ыми ныкон, бәвәдә бәзнемон мәсәлә кон вырәдәј...

         Һички ихтијорыш ни ки, бәштә ыштә хатыр тәһғир быкә ыштә хәлғи, быбә чәј риши ангыл быкә ижән бә ҹо хәлғон думи, тәһғир быкә ыштә тарыхи, шәр бығанды бәј! Әмә, јәне Һилалијән, - ыштән выжнијәмоне боштә ын ро! Чы рој лап сыфтәку әмә зынејдәбимон ки, чичон бе бәзнен бы роәдә! Әве бәнә мерди тосә охој тов вардәнинимон! Жәго ныкомон, бәвәдә бә Хыдо ләнәт бомемон! Ыми бәпе бызны һар гылә толыш!

 

 

 

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|