ПОЗИ БЕБЭКАН ДЕ ПОЗИ

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 27 голосов)
Изменить размер шрифта Decrease font Enlarge font
image

 

 

Ф.Ф. ӘБОСЗОДӘ

ПОЗИ БЕБӘКАН ДЕ ПОЗИ

         Зинә бә Һилали мыдофиә һәср быә дыминә тәдбирмон де хәј-сәломәти дәвоније Москвадә. “Дәвонимоне” вотеәдә ки, одәм бәпе һәхи бывоты, “дәвонијәкәси” дәвонише, әмәнән ханбоз бимон бәј, иҹо бәјон кардымоне ыштә етироз Озорбојҹони Москвадә быә сәфарәти симоәдә бәчәј һукмәти. Һандәкәсон хәбәдон ки, чыми ды-се руж бәнав мәтбуоти конфранс бе. Әјоән толышон гырдә бин бә иврә, вотышоне ыштә дыли сыхан, тәләб кардышоне ки, Озорбојҹони һукмәт даст быкәшы ыштә ноһәхә иттиһомонку, Һилали вадә зиндоно!

         Һәлә ки һукмәт мандә ыштә куроҹәғә рәғисә, нәинки Һилали вадој фикирәдә ни, әксинә, тикәјән бә кәлләчәх бешә, гыләјән маддәш зијод кардә бә Һилали иттиһоми. Әмә бе әјән чок зынејдәбимон ки, Һилали гәте һич әлоғәш ни де “наркотикон”. Әмә чок зынејдәмон ын һукмәти, чок сәрәсејдәмон ки, “наркотик-маркотик” ијо гыләј вонәје, “һырси пијәј гыләј амбује”. Јәне, чы һукмәти дард Толыше, ижән Толыши озавзије роәдә навәжәнәти кардә, мыборизә бардә зоонин! Әнҹәх кали әвомә толышон бовә карде әзнин ки, “Озорбојҹон – чәмә вәтәне”, “әмә и милләтимон”, “тикәј чәш быкәмон, веј һајку рост мәкәмон, мәвужи һукмәт вабәдо Һилали” ијән ҹо жыго корә пәллеки, кујәзинги нәғылон... Әмә чок зынејдәмон ки, толыш әсире Озорбојҹонәдә, де һичкијән әмә и милләт нимон, һукмәтән ки, Толыши дышмене! Әве, Һилали мәсәлә и ружи, да ружи мәсәлә ни. Ым һәми һәлә веј ов бәба... Әмма чымон һәхәдә тикәј бәдигә сыхан бәкамон. Есә чымы сыхан ҹо чиј барәдәј...

         Шәхсән мыни нороһат кардә мәсәлә чиче? Һәлә ҹәми дыглә тәдбир дәвонијә быә, кали толышон чангышон дәғандә бәјәнды: бә ијәнды сә-сыхан кардәкәс ки, ијәнды тарсоәтијәдә иттиһом кардәкәс ки, ај фылонкәс ғырјәтине, әве омә бә пикет, фисонкәсән тарсоје, беғырјәте, әве омәни бә пикет ијән ҹо чијон. Јәне, ә просесон шејдән ки, Озорбојҹони һукмәтијән һежо пијәј әве!

         Ај чымы хосә Быјон ијән азизә Һовон! Һич тади мәгәтән бо ијәнды иттиһом карде! Бочи?

         Иминәниш ыме ки, бә пе һәни вотыме, ым һәми һәлә веј ов бәба. Әмә жыго тәдбирон һәлә веј дәвонијәнинимон, Хыдованди, дешмә комәги ијән иштироки дәбәвонемонән! Әве һәлә веј имкононон бәбе ки, чики һәғиғәтән тарсо, чикијән әнәтарс бе мәјдонәдә сыбут быкән!

         Деми әлоғодор гыләј чијән бывотым. Ым гыләј һәғиғәте ки, тарсе ајб ни, гыноән ни! Һич гылә мерд бәштә синә жәј әзыни ки, әв һич тарсејдәни, һичику тарс-ларзыш ни! Интаси ијо дыглә мәсәлә ијәндыку соф-ошко ҹобәҹо карде лозиме. Ымән әве ки, тарсе һесте, тарсе һесте. Одәм һесте ыштә ҹониро, тәнхоро, хыјзониро, әғылонро, ов-авлодиро тарсејдә. Быми һич тарсејән воте әбыни. Чумчыко һар гылә инсон ын тарси дәвонејдә. Әмма ым тарс ни, ҺОДИЈЕ, ыштә итјоти гәтеје, сәзукин беје. Кәфшәни пәрәндән һоди бејдә, ыштә итјоти гәтејдә. Чокән кардејдә!

         Пикети ды-се руж бәнав әмә гырдә бимон бә иврә, мәслоһатымон карде ки, чокнә дәвонәмон пикети. Мәслоһатән жыго бе ки, кали толышон жыго кучә тәдбиронәдә иштирок карде һич лозимән ни! Һәмонә одәмон чанә “согнәдә” быбон, анән бо Толыши ыштәни чоке. Чыми веј сәбәбон пеһанде бәбе, әмма, жыго сәрәсејдәм ки, быми һич еһтијоҹән ни, чумчыко әвон мәлумин бәчәмә һәммәј. Әмә гирәм жәго одәмон һәммәј гырдә быкомон бә мәјдон, ым бәбе һукмәти пијәј! Јәне, һукмәтијән пијејдәше умуты ки, комонин һәмонә толышон ки, дештә пули, тәнхо, ныфузи ијән ҹо чијон дст гәтејдән бәчәмә һәрәкоти. Боән ағылманд быбәмон, ноһәхә гәпон мәжәнәмон бә ијәнды. Һар гылә жыго тәдбирәдә чәмә һәрәкоти быәнинише ыштә стратегијә ијән тактикә. Кәноәдә мандә, дијәроәдә жијәкәси чымон һәммәј зыне һәм мымкун ни, һәмән воҹибән ни. Әсос ыме ки, “кијәсәдә ныштәкәсон”, јәне кој дыләдә быәкәсон ымони бызнын ијән бәвон чок-чоки әмәл быкән!

         Манде чымы вотә дыминә тарс, чыми барәдә, чымы зынәјку, һартәрәфә гәп жәј лозиме. Һар гылә толыши дыләдә камәдә-вејәдә Хыдо тарс һестебу, бәвәдә әв чок-чоки зынәнине ки, әв ыштә имкони, ғыввә чарчивәдә ымружнә ружи рост быәнине бә Һилали мыдофиә! Ымијән зынәнинимон ки, ијо сыхан әнҹәх Һилалику шејдәни, - Хыдо окә чәј бәј!, - сыхан шејдә Толыши ијән толышон еғволику! Јәне, ымружнә ружәдә Һилали мыдофиә кардәкәс Толыши ијән ҹәми толышон мыдофиә кардејдә!

         Чы вотәјонку бешә нәтиҹә: Һич вырәдә нывыште јаанки воте лозим ни ки, фылонкәс “ғырәјтине”, әве шә бә пикет, әмма фисонкәс тарсоје, беғырјәте, әве шәни! Жәго ни, ај чымы азизә хәлғ! Ијо мәсәлә ғырјәти мәсәлә ни. һар кәс бәпе ым һәғиғәти гушовә быкә еһашты ыштә гушо ки, ки чич кардејдәбо, әнҹәх ыштә ғарзи дојдә! Бәштә ғарзи доәкәси “ғырјәтманд, әнәтарс”, ныдоәкәси исә “беғырјәт, тарсо” воте әбыни! Әмә һәммәј һәрәкәт быкәмон һич ныбо минимум сәвијјәдә, һар кәс ыштә имкони мығобиләдә Хыдо ғарзи быдәмон. Ыми карде бызномон, бәвәдә чәмә веј коон сәбәро бәбен иншалла!

         Ымијән јодәдә огәтән ки, тәдбири зу бәвәдә одәмон веј јаанки кам беәдә ни! Пикети бе ыштән гыләј факте! Һукмәт бәлкәмән һежо пијејдәше умуты ки, ком толышон, чандә толышон бешејдән бә тәдбир ки, чәвон “тәдбири” быгәтын. Быдә әвон жәгоән бызнын ки, әмә һежо “әнәмон”. Вахт-вәдә омедә рәсеәдә әмә сыбут бәкамон иншалла чанәмон!

         Чыми барәдә сыхан обеәдә, мәҹбурим ки, гыләј ҹо һәшјән бешум. Һар гылә толыш чок-чоки зынәнине ки, кије чәмә дышмен! Чымы зынәј ыме ки, чәмә дышмен Озорбоҹони довләте ијән чәј һукмәте!

         Бочи “тарсику” гәп жәјәдә оваштим бы мывзу? Чумчыко сыхан бә сыхани рәсеәдә, веј толышон дод-әмон кардејдән ки, бәс Озорбојҹони һукмәт веј зуманде, әве һәләбәсә ко ни чәј вәдә тов варде, бәчәј вәјнә мыборизә барде! Һәмә һандәкәсон жыго сыханон мәсејдән, вејни ыштәнән жәго вотејдән. Ајбыш ни, быдә бывотын! Интаси боән мыәјјән быкәмон ки, “һукмәти зумандәти” чичәдәј?

         Хок бә шәхси јаанки һукмәти сә ки, әв де пули, тәнхо ыштәни зуманд һисоб бәка! Тарых чич вотејдә бәмә? Конҹо жәго быә ки, пул ијән тәнхо перохны гыләј одәми јаанки һукмәти? Һәтто кәфшәни пәләнгән мыәјјән вахт бәштә синә жәј-жәј гардејдә вишәдә, ыштәни зуманд һисоб кардејдә! Әмма чокнә ки димбәдим омејдә де фили, огардејдә бә гыләј жәғоли, морә лонәро нәвејдә ки, де тәһәри нијо быбу әјо! Јаанки тикәј синыш егардеәдә јем бејдә бо шәғолон! Ымән чәј зумандәти!

         Зуманд ә шәхс јаанки һукмәте ки, Хыдо мандә чәј пештәдә! Зуманд ә шәхс ја һукмәте ки, пештыпуре бә Хыдо! Ыми зынә һар гылә толыш сәрәсәнине ки, дынјо һәмә һукмәтонән емон чәмә сәпе, чәвон һәммәјсә зумандимон! Чумчыко әмә Хыдо һәхи роәдә бә ҹангимон! Чыми мығобиләдә еһанә комсә толыш гыләј һәромә, бехыдоә, беимонә һукмәти навәдә ҹыззыт дојдәбу, вај бәчәј һоли!

         Әве, чымы вотәј әве ки, һар кәс ыштә итјоти гәтәнине, һоди быәнине ки, һич гылә зәфә нырәсы бәчәј ыштәни, бәчәј ҹәми ов-авлоди. Әмма тарсе лозим ни, ижән вотедәм, пештыпур быбән бә Хыдо, бә нав бышән!

         Һоди бе вотеәдә ыштә нәзәрәдә гәте лозиме кали мәсәлон. Чәмә дышмен зуманд ни, номерде, мијонгәзе, дыздәдәме, камфырсәте! Чәјку һар номердәти чәш карде бәбе! Чыми итјоти гәте бәбе, лозимејән! Мәсәлән, һандәкәсон быбахшын мыни, жыго гыләј мығојисә барде бәбе: Дијәдә одәм де ҹадә шеәдә зынејдә ки, мәсәлән, фылонкәси соәдә гыләј јамәнә сыпә һесте, нобәләдә одәми винденҹән ҹум һардејдә чәј сәпе. Ә одәмән чәјо дәвардеәдә ыштә итјоти гәтејдә ки, зијон ныгыны бәј. Әмма ҹо гыләј хонәхо соәдә гыләј сыпә һесте ки, ҹадәо одәм дәвардеәдә һич сәдошән бешејдәни. Жыго бәзнеш ки, һич әјо сыпә ни! Интаси ты ашиш-ашиши чә кәј вәо дәвардеәдә икәрән бәвиндеш ки, һәмонә сыпә думотоно вите омәј гыләј дыздәдәмыш ғанде, еғыч гәтыше ыштә нынг! Һа, ым ҹо мәсәлә!

         Озорбојҹони һукмәтән мандејдә бә жәго гыләј дыздәдәмә сыпә! Һа се-чо сорәдә и кәрә, кејнә ки, толышон тикәј ашиш бејдән, пештыпур бејдән ки, һукмәт тикәј “һәмул” быә, демијән вадојдән ыштә дасто ыштә итјоти, бәвәдә гыләј дыздәдәм ғандејдә, толышон гыләјни “еғыч гәтејдә”! 2007-нә сори һәмон толыш мәрһум Нәвузәли бе, есән Һилале!

         Әмә бәпе бызнәмон ки, жыго камфырсәтә, мијонгәзә дышменику һар ҹурә номердәти чәш карде бәбе. Ымијән зынәнинимон ки, бы жыго һукмәти чокнә ғалиб оме бәзнемон! Һички воте әзыни ки, кон вахтисә де “киш-киш” воте комсә хонәхо һырсыш тожније зынә мәзәо! Чәмә дәдә-бобон вотә иглә сыхани чок-чоки огәтән ыштә јодәдә: Пози бебәкан де пози!

         Боән әмә һәммәјәво ыми шуар быкәмон боштә, рост быбәмон бә Һилали – Толыши мыдофиә! Чанә ныштә вырәдә быныштомон, әмәни гылә-гылә “баһан”. Иншалла, тәдбиронмон веј бәбе, шымәни һәммәј бы тәдбиронәдә бә чәшимон! Рост быбомон, һәм Һилали иншалла перохне бәзнемон зиндоно, һәмән сыбут карде бәзнемон бә ҹәми дынјо ки, чәмә толышә хәлғ һәғиғәтән лојиғе бә ОЗОДИ!

 

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|