ЧЭМЭ БАНДОН ГЭЛЭ

                                                           ЧӘМӘ БАНДОН ҒӘЛӘ

     Аз бывотом ыштә дијку, Зәмини зујку, банды-кујку, Толыши зујку. Чәмә бәнав толышә балә кәш бино ка бәштә ғәлә. Хәбәм зынә тарыхику, Каспи дыјо быә бандику, толышон быән банди сәпе, ғәлонәдә - һали сәпе. Ым Осторо, ым Ланконе, Лик банди сәпе мандә сәдик, гылә-гылә ғәлон номи, кәрвонә рон, һалон номи. Чанә һәлә аз зынедәм, бошмәно гырд аз вотедәм: “Шыкә һале” Әзәрујәдә, “Јекдәс ғәлә” Тангәрујәдә; Ваго, Тангәру, Шијәкон, “Ғәлә танг быә” толыши мәкон. Деғәди, Сәк, Арчони руј, Рујәкәно, бән “Мәкә куј”. “Ғәлә кафу” кәрвони рој, “Шиндон ғәлә” пијодә мәпој. Әсконәкон, Тахтәнәкон, “Аспәјз ғәлә” чәмә мәкон. Кәрвони ро “Сым сипјәпард”, “Сыми” доә быә бә “Надири” дард. Арчони тарых ғәдиме, Ғәзәндаши ном бә номе. “Мәһәммәд-Һәнифи” мәчит, Ғәјби доә бә Арчони ид. Вылон нојдән Тоҹи-Тахти, Нәвузә ид омә вахти. Дарды-сәри һаштедәмон, отәшонку ваштедәмон. Кулишанбә ымруж иде, кагон, верон моғнә пиде. Вотедәмон Кулә шәве, сәмәнимон гандым, ҹәве. Артопожон кул нибәвотен, веј ғәдимә ном бәвотен. Кули вотдән “Атар-патар”, шыпларзику дузкә татар. Ғәдимику мандә номе, бын фәрзијә аз ве шоме! Арчони, Сәк, Әләшоәдә, Хани сәрај бырзә һијәдә. Бумәларзәку ешә ди быә, кә вырә ном “Хангәди” быә.

                                  Баһанд, чымы толышә балә,

                                              Чанә веје банди ғәлә:
                                         “Аспәјз ғәлә”, “Шиндон ғәлә”,
                                           “Ғәлә кафу”, “Пашә ғәлә”,
                                          “Шыкә һали”, “Јекдәс ғәлә”,
                                          “Ғәлә Танги”, “Әләшу ғәлә”,
                                        “Сым – сипјәпард”, “Кинә ғәлә”.
                                    Чымы милләт, чымы мәхлоғ, чымы зилләт,
                                              Чымы авлод, чымы балә,
                                             Баһанд, бымәс Сәфтәрику,
                                                 Умут Синәдәфтәрику!