Разделы
Архив
| Пн | Вт | Ср | Чт | Пт | Сб | Вс | |
|---|---|---|---|---|---|---|---|
| 1 | 2 | 3 | 4 | 5 | 6 | ||
| 7 | 8 | 9 | 10 | 11 | 12 | 13 | |
| 14 | 15 | 16 | 17 | 18 | 19 | 20 | |
| 21 | 22 | 23 | 24 | 25 | 26 | 27 | |
| 28 | 29 | 30 | 31 | ||||
Рассылка
Подписаться на рассылку:
Оцените содержание статьи?
(всего 67 голосов)
Изменить размер шрифта
ЖӘГО ИНСОН ЈОДО БЕШО, БЫЗЫН, ХӘЛҒ ЫШТӘН ЈОДО БЕШЕ!
Хыдо рәһмәт быкә тыни, Тофиғ Илһам!
Жыго вотејдән ки, инсони колә шытыш дијә. Чыми гыләј мәноән ыме ки, јәне һафизәмон кырте, рә јодо бекардејдәмон ыштә шәкәсон. Чокнә ки одәм ше бә Хыдо рәһмәт, гырдә бәбемон, бәбәмемон, јас бәгәтемон, ебәкамон ыштә чәшон зығи, еһсан бәдомон, Ғырон бәдомон һанде, чыбызным, һәни чичон ијән чичон бәкамон... Де һәјфи ки, камиши (бокисә манг, бокисә сор, чич бәзнем воте?) дәварде бәбештә һарчи јодо бебәкамон. Жыбызын, һич нијебән ә шәхс!
Ымијән вотејдән ки, ыштә мардәкәси ғәди нызнәкәс ыштәнән беғәд бәбе, беғурб бәбе! Бәнәве зәмини димисә, баһасте зәмини, бәше-боме, баһа-бәдо, пебәрәсе, кә бәбе, әғылсојб бәбе, кә ебәже, мол-мылк гырдә бәка, кинә бә шу бәдо, зоә кә бәка, чыбызным һәнијән чичон бәка. Интаси жәләвон бәманде бә согнә, бә чәши нибәгыне. Һич жыбызын ни жәләвон! Нә әј де һички кош нибәбе, нәән чәј кефи парсәкәс әбыни. Мылхәс, мерд әбыни бә мердон дәнибәрәсе!
Һәлбәттә, жәләвони мардејән бәнә чәј жимон карде бәбе. Бы дынјоәдә чокнә бәнә согнә нәвәбу, де чәј бә дынјо шејән жычиј гин әкәнин инсонон! Жәләвон бәјжијәти вахти бә һички јод омејдәни, манде марде бәпештә бә чикисә јод бо!
Ымән һесте ки, чәмә мәғсәд жәго одәмон барәдә гәп жәј ни! Чокнә бәвотен, һар кәс ыштә умри жијејдә, Хыдо бәј доә умри. Чокнә зынејдә, жәгоән жијејдә. Жәгоән ыштә ҹәвоби дојдә Хыдо вәдә!
Чәмә мәғсәд жәго одәмон һәхәдә гәп жәје ки, Хыдо әвони офәјејдә бо ади жимон карде не! Әвон бә дынјо омејдән де хысуси мәғсәди. Хыдо әвони офәјејдә ки, бәшәријәти огәтын ыштә амонсә. Әвон ади одәм нин. Әвон гыләј вәшә чон ки, бәнә ади одәмон жијејдәнин, әвон шәв-руж вәшејдән, вәше-вәше рушнә еғандејдән бо бәшәри, ро нишо дојдән бә одәмон, бә нав сәдо кардејдән әвони, вәомәј нишо дојдән бәвон. Әвон огәтејдән хәлғи. Әвон хәлғ кардејдән одәмон. Бәвон дијә кардәкәсон зынејдән ки, одәмон ијәндыку зикбәҹо егынијә ҹонинә мәхлоғон нин, и зывонәдә гәп жә, бә иглә Хыдо имон вардә, иглә хорәк һардә, иглә маһне һандә ијән рахс кардә, и ҹур фикир кардә, де иглә һәво нәфәс сәкәсон гыләј хәлғин. Вај бә хәлғи һоли ки, чәј нибәбеше жәго шәхсијәтон. Быбахш, хосә һандәкәс, ғәләтым карде, де гәдә һәрфи нывыштыме ын сыхан. Чумчыко бә жәго одәмон данибәме чәвон номи де гәдә һәрфи нывыште. Әвон сыхани һәғиғијә мәноәдә ОДӘМИН, ИНСОНИН, ШӘХСИЈӘТИН! Бәјжијәти вахтонәдән, ыштә дынјо дәгиш карде бәпештән һички һәхыш ни жәләвони јодо бекә! Чумчыко жәләвон јодо бешо, бызын, хәлғ ыштән јодо беше!
Чәвон һар гыләјни ҹури бә вырә роснејдән ыштә бә пе чымы вотә миссијә: Атропат де Әһумерди беше бә Мәгдони Искәндәри вә, нишо доше бәј һәм ыштә хәлғи мәдәнијәт, һәмән Әһумәрди тимсоләдә чәј ЗУ! Зәрдуст дештә КӘЛОМИ омәј бә толышон һәрај! Бабәк дештә шымши беше бә дышмени вә! Исмајл де Хыдо һәхә КӘЛОМИ, де Һәзрәт Әли (ә) номи нозил бе бә толышон! Зулфиғари һанде омутыше бә толышон, шер һанде! Сыбут кардыше бә бәшәри ки, ым зывон де Хыдо ыштәни гәп жә зывоне!..
Чәј бәпештә ӘВ омәј, Тофиғ Илһам омәј! Ыштә чәшон нурыш екарде бәштә дыл, зуш дој бә сыхани, дәвом кардыше Дәдә Зулфиғари кардә ко, речыш дој бәчәј вотә сыханон, һәнијән шиныш карде ым зывон, ростыш карде әв бә поетикә бәш, чандә сорон шинә һани бәпештә озывоныш варде толыши зывон, “былбыли зывоне әв!” вотыше:
Гуш быдә бә былбыли, чич вотедә?
Вотдә, чымы зывоне толышә зывон!
Чәшәдәш нур ныбе-ныбе, веј одәмонсә бәнав “һандыше” Ғырон, зынәше чәј мәно:
Гыләј китоб һесте һа! Чәј һар нохтә ешғи нуре!
Әлиф, Лам, Мими мәно нызнәкәс әғыле!
Чымисә зуманд вотәкәс, Ғырони мәдһ кардәкәс бәбе јәне? Гыләј ҹо зывонән бәеб јәне ки, Әј жыго мәдһ быкә? Чәтин быбу!..
Дештә иглә шери гырдә кардыше ҹәми толышон бәнә гыләј мышти, хәлғыш карде әвон:
Чәтинәдә, дарәдә
Ғырјәтбыкәшонимон,
Әмә толышонимон!
Чәј вотәјон, нывыштәјон һәхәдә нывыштејро, дылипури нывыштејро нә дәфтәр вәс бәка, нәән мырәккәб! Чумчыко әв гыләј дыјоје ки, һич вахти ғәт әбыни чәј ов! Чанә Толыш һесте, толышон һестин, әнә әмә һәммәј ов баһамон чә дыјоо, чәј вошнијә чој рушнәдә ружбәруж бә нав бәшемон Толыши озоди роәдә!
Әмма... Дој бәзнемон јәне Тофиғ Илһами ғарзи? Чәтин дој бызномон! Хыдованди Тофиғи орзујон бә дәрһәл бәрәсен – Толыш озодән бәбе, чәмә ыштәни довләтымонән бәбе, әмә һәммәјәво ыштә Вәтәнәдә гырд бәбемон, ыштә нәнә зывонәдә, Т. Илһами вотә “былбыли зывонәдә” бәвотемон-бәсыремон, баһандемон, Тофиғи шерон зывонон әзбәр бәбен. Ымон һәммәј бәбен. Чәј сыханон, шерон һежо дејәмә бәбен! Де һәјфи ки, Тофиғ Илһам ыштән әбыни чәмә арәдә! Ијән ... чәј ғарзи дој әзынимон һич вахти!
Хыдо рәһмәт быкә тыни, Тофиғ Илһам! Ғәбы де нури һежо пур быбу! Быбахш әмәни, быбахш Толыши, быбахш толышон!
Добавить коментарий
Комментарии (1 добавлено)
-
Опубликовано Emin, 31 Май, 2012 20:14:31XIDO tini va shimani rahnmat biko.
Политика и экономика
Интервью / Заявление
