ЧЫЛЭ ШЭВИ ЧЭШРУШНИ

 

 

ХИЛГӘТ

 

ҒӘЗӘЛОН

 

Доғыш карде чы зылми чәшыш, ғојмыш епуште,

Бәмәш әј нишо карде ки, ын дынјо и мыште.

 

Ве шаһон мәсе чәј ном, ғәролшон ныбе, ларзәјн,

Чы тахтонкуш еғанде, бә тахт әмма ныныште.

 

Сыхан әј бино карде, әјән ки ноше нохтә,

Нә пеш әј воте зындән, нә мәсдән, нә нывыште.

 

Сығонышон хыдо карде, дылон сығ бин, осын бин,

Де ыштә Хыдо ҹојли чанәндәш “хыдо” кыште!

 

Де ангыштәш әј анҹе деј осмонәдә осмон,

Нә ыштән ше бә осмон, нә Овшум бә жи ныште.

 

Ты Пејғәмбәри, Хилгәт, анәндә быкә тариф,

Ки, бывтон ә кәхоби вырәш тәјли наһаште.

 

 

*  *  *

 

Зиз кардә тәбым ки, бәнә бандон гылә һони,

Бој, тәшнәш әгәм, бој бычәш ын чәшмә сиҹони.

 

Чәш ви быкош, ыштәндә бәвиндеш Хыдо нахшон,

Чәш ож быкә, һа ҹој бә гәпе әв ды нышони.

 

Дынјо пијеку доғ быбуш, ашығ әзыниш бе,

Һич виндә, обырнын мәгәр ишкилбә ғыбони?

 

Ын дынјо, зәмонә чәвәдәш кејнә пероснә?

Рос ни вотедән, дынјо огордындә зәмони.

 

Әв корпәтиҹо быә пејғәмбәри ам-душ,

Гониш кәшә бә сыфт де пејғәмбәри гони.

 

Мәккәш Хыдо дәј сыфтә гофеш карде бә корпә,

Дәј һаштә зәмин осмони порсанги, мизони.

 

Зәрбәш бә пешош һаштәбу чанәндә ибодәт,

Башмард есә, чанәндә ныможыш де әзони.

 

Ҹоныш сә Хыдо дышменику әј де ғылынҹон,

Ғојмыш бә дасыш сә чы дусон дыл де зывони.

 

Дысәј мәжәниш гәп, дысәје чәј ғәмә шәмшир,

Ҹони, жыго зындәш ки, бәрохнеш де һосони?

 

Әј зындәныбуш, бәс чоко пејғәмбәри зындәш?

Бын елми шәһәр һич ғәрәз әј кәјбә ни, ро ни.

 

Шаһон кә бәке, аз әчәј осмони пәрәндәм,

Лонәм чымы барзе, әдәним лонә бә лони.

 

Вотдәш ки, Әли чич бә, гыләј пыштә кумәш бә,

Ношиш, чы гәвон ов шедә бо кандулә шони!

 

Валлаһ, әзыним һич, Әли ыштән чы ғыроне,

Чанәндә баһандош ты гирәм ыштә ғырони.

 

Тәјли әв огардәни, дышмен быбу, ја дус,

Хилгәт, быши чәјку ты быстән ыштә дамони.

 

Ја Рәб, аз әгәтним ғәрәз әј һич кәси довнә,

Дасон чымынән һич чы Әли довнәку ҹо ни!