SOS: КУЛЭТОНИ МЭКТЭБ ГЭСБ КАРДЭ БЕ!

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 6 голосов)
Изменить размер шрифта Decrease font Enlarge font
image

 

SOS: КУЛӘТОНИ МӘКТӘБ ҒӘСБ КАРДӘ БЕ!

            Масәли рәјони Полиси шобә ковонон һәммәјәво һыҹум кардәшоне бә ди Куләтони мијонә мәктәб! Полисон бырнијәшоне мәктәби соәдә быә мивә ијән сырафә пузә бәлелә доон, кәвырә ҹо кардәшоне бо рој полиси мәнтәғә рәиси мыовин, полиси мајор Саһиб Әмәнови.

            Бы вағеә воте бәбе әнҹәх һајбоштәнәти!

            Јәни, һәғиғәтән мәктәб лозим ни бә куләтоныжон? Де рәјони јолә мәмурон“ғәсби” барәдә кәсимот кардә диј јолон һәни чы бәлон вардәшонни сыхан шә бы мәктәби сә?

            Кујә-кујә ҹәвобон һестин бы парсон...

            Лап ғәдимијәдә Куләтони мијонәдәбе диј мијонә мәктәби бина. Мәктәби гырдокәно сәбәсо быә дијовыжон де диј јолон рај поә-поә, выжә-выжә беғанун зәбт кардышоне чәј зәмин. Дәвардә әсри һафтоминә соронәдә, чокнә ҹо выронәдә, Куләтонәдән бә ғәрор омәјн ки, тожә мәктәб быдутын. Канә мәктәби ки әрозијәдә зәмин һәни мандәныбе, әве чә вахти “Коммунизми ро” сәвхози рәһбәрәти бо тожә мәктәб дутејро донзә һектар мәзә ҹо кардыше диј кәноәдә.  Бы мәзәдә ежә бе мәктәб, әғылә боғчә, интернат ијән дијәроә ро омә миәллимонро дымәртәбә кә. Бы тожә мәктәб директор тәјин кардә бе диј башә мердон гыләјни – јолә ныфуз сојб, дештә сәводи бә ном, чандә кәс алим, профессор, елмон доктор пероснијә Әһмәд Сәмәдов. Чәј һымһымбәдә мәктәбәдә бәрғәрор бе чокә низом-интизом, тәһсили сәвијјә рост кардә бе. Чыми нәтиҹәбе ки, һа сор 15-20 кәс Куләтони мәктәби сә кардә мәзун дахыл бејдәбин бә республикә али мәктәбон.

            Де ын пеһандә быә хошә овандон бә иҹо, Әһмәд миәллим ыштән шәбе бә Губа, әјо һыријәшбе чандә ҹурә мивә доон, сохтәшбе “Вәјши боғ” чәмә мәктәби бә “Ағҹагуми” сәһро мандә ожә мәзәдә. Ғәрәјз ыми, чәј вахтәдә мәктәби мәзә гырдокәно де сәлеғә каштә быәбин бәлелә доон. Бә мәктәби дылә имконон һисоб, - әмәг тәлими дәрсонәдә әғылон мәктәби соәдә әкаштин һавзә ијән бокләјнә рәсон, мәктәби рәһбәрәти әвони тәһвил әдәј бә довләти, чәвон пули сәрф әкәј бә мәктәбәдә тәһсил сә бекимсәнә ијән бечизә әғылон. Чәј директор быә сензә сори мыддәтәдә Куләтони мәктәб һәтто республикә сәвијјәдә нымунәвибе. ССРИ выло бе бәпештә Әһмәд миәллим ыштән дештә әризә беше директорәтику. Чә вахтикујән бино бин чәмә мәктәби бәмә-шивәнә ружон! Јусиф Бағыров бе мәктәби директор.  Жычиј дәныварде, де рәјони тәһсили шобә рәһбәрон дасти беғанун һәватә бин мәктәби емолотхонә һәмә дәзгоһон ијән дастәкә бинон. Јусиф миәллими мәктәби зәминән гәдә-гәдә ноше бә һәрроҹ!

            Һалијәдә мәктәби донзә һектар мәзә ғәт бе-бе омә мандә ды һектарәдә. Һәватә быә мәзонәдә беғанун дутә быән фәрдијә кәон. Чандә соронин ки, Куләтони мәктәб бә тәһсили сәвијјә горән “сијәнә” мәктәбон сијоһијәдәј. Пешонә соронәдә мәктәби мәзунон һич иглән  дахыл бе зынәни бә али мәктәб. 

            Ымруж чәмә ружонә мәсәлә – рәјон Масали полиси ыштәнбәсәти мәсәләје! Мәсәлә бымәдәј ки, рәјон Масали Полиси шобә Рој полиси болмә рәиси мыовин, полиси мајор Саһиб Әмәнови овардәше бәштә рәиси – полковник Ә. Јусифови ки, Куләтони мәктәби соәдә бәј вырә ҹо быкә бо кә кардеј. (?) Рәисијән пегәтәше рәјон Масали Полиси шобә һејәт һәммәјәво вардәше бә Куләтон. Әвон анҹәшоне мәктәби соәдә быә доон. Бы мәғомәдә Куләтони диј әрози нымојәндә Илһам Муртузајев ијән бәләдијә сәдр Билал Нусрәтов омән бешән бә мәктәби со, парсән чәвонку ки, ым чы ыштәнбәсәтије? Ҹәвобәдә полиси рәиси вотәше ки, “шымә бәчымы ләшғәри вә бешејдәшон? Сәр иҹро Ғәзәнфәр миәллим хәбәдоје чы мәсәләку”...

            Полисон әнә мандејдән әјо ки, кәријән кандә бејдә, иншооти материалонән вардејдән...

            Интернет сајтонәдә, һаказә мәмләкәти мәтбуотәдә әмә кифајәт ғәдәр мәлумот доәмоне рәјон Масали Полиси шобә рәиси ыштәнбәсәтијон барәдә. Тәнғыдику нәтиҹә бекарде әвәзи, әмәни “һывос кардә” “чәмә полис” ружбәруж даст ғандејдә бә һәнијән сахтә ијән ајбәжорә воситон... Ночор мандә дијовыжонән бы фикирәдән ки, нише чы мәмләкәти сојб!.. Милли Мәҹлисәдә ғәбул кардә быә реч-рәвошинә ғанунон тәтбығ кардә бејдән әнҹәх бә әһоли мәзлумә тәбәғә.

            Бәмы мәрағин быә жыго гыләјмәғом һесте ки, бочи бәләдијә сәчынонәдә “фәоләти” нишо доә, чокнә бәвотен, “пусты-лу быә” одәмон бочи бә нез номәјн полис Куләтони мәктәби ғәсб кардеәдә? Бәмы жыго омејдә ки, чә “фәолонән” чәш һесте мәктәби зәминәдә... Еһанә жыго бышо,бәвәдә бы незони жыго бәбе ки, кәон дивон гырдә дәбәчыкен бә мәктәби диво. Әјән ғејд быкәм ки, Куләтони мәктәби вәдә еһаштә быә чәј сеглә шәһиди шикил! “Чәмә полисон” һәјо ныкардышоне һич чә шәһидон руфикујән!

            ...Ымони һәммәј нывыште бәнав, аз пебемон огәтыме де Әһмәд миәллими.  Тәсәввур быкән ки, ымони мәсе бәпештә мыддәти хыртәш һышк бе әдәбијоти миәллими! Иглә ымыш воте ки, әмә де ә мәктәби коллективи бә иҹо ведрә-ведрә ов кырнијәмоне, доштәмоне ә доон, боғ кардәмоне ә боғ! Ижән гырәј кардыше ки, “һукмәти бәмы доә ғыјмәт әв быә ки, де 120 мәнот пнсијә дијәро кардәшоне мы мәктәбику”.

            Охојәдә ымијән бывотым ки, ҹәмат бәрк норозије һакимијәтику. Полисон мәктәби ғәсб карде исә сыбут кардыше ки, анархијә, һәркиһәрки, һајбоштәнәти, ыштәнбәсәти, кәләсығортмә һыкм кардејдә бы мәмләкәтәдә.

            Һич гыләј чокику хәбәдојдәни чы анархијә охој. Кыве охо Озорбојҹонәдә чәмә јолон вотә һуғуғијә довләт? Ыме чәвон һуғуғијә довләт ијән демократијә? Ыме чәвон ғанун?

Нәтиҹә жыго һосил бејдә ки, полис анә криминал быә ки, ғәбул кардејдәни ғануни. Чумчыко ын һукмәти әнә доәше “быжән!” әмр ки, чәмә ғанунон һәммәј мандән Милли Мәҹлиси осынә сејфонәдә. Чә ғанунон осынә сејфоно бешә ружи бәвиндемон јәни? Жыго бышу... чәтин!

Мәтләб

Озорбојҹони Журналистон иттыфоғи узв

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (1 добавлено)

  • Опубликовано Asiman, 01 Ноябрь, 2011 22:38:49
    Hemme due!!! hicnobu HIDO ku bitarsenen,nohex kam bovoten!!!

Главные новости

|