УМУ МАНДЭ БЭ ХЫДО!

Разделы

Архив

Пн Вт Ср Чт Пт Сб Вс
123
45678910
11121314151617
18192021222324
25262728293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 76 голосов)
Изменить размер шрифта Decrease font Enlarge font
image

 

 

УМУ МАНДӘ БӘ ХЫДО!

(Бә Фәхрәддин Әбосзодә)

 

 

Вотедәбиш: -Шымә ше`рон бә милләти зу дојдән,

Ысә вотдәш әвон һәни нәфтәленә бу дојдән.

Сери тоғә бы боғәдә лу вардәни, лу дојдә.

Бәмә комәг быкә кыве? -Уму мандә бә Хыдо!

 

Тыркә вәју вардедәмон, - тырк кардедә әмәни,

Вәју шедә чыјо, бә тырк огардедә, чәмә ни!

Выло кардән һар вырәдә чәмә шерә хәмәни,

Бәмә комәг быкә кыве? -Уму мандә бә Хыдо!

 

Ше`р һытә сондыхәдә, быә дардику зарды-зук,

Гәзет һесте, бешо әјо, сәдо бәка шәри-сук?

Чы “Толыши Сәдо” һәни нам бешедә, танге лук.

Бәмә комәг быкә кыве? -Уму мандә бә Хыдо!

 

Фәхи бојли, коврәј хоки екә бә сә әнывышт?

Веј одәми пидәше бәј быдә мәзә әнывышт.

Дештә шери, бывот, охо чичи рәсә әнывышт?

Бәмә комәг быкә кыве? -Уму мандә бә Хыдо!

 

Һандедәмон ым тарыхон, вотедәмон, рушнәмон,

Һәлә бә ро дәныгынјә, вотдән гонә пошнәмон.

Сыханәдә пут, ғәҹымон, пыјемондә мужнәмон,

Бәмә комәг быкә кыве? -Уму мандә бә Хыдо!

 

Ијо-әјо јәнды сәдо мәсдәнимон, коримон.

Вотдән јолә бустонимон, Валлаһ, һәни шоримон!

Әмәнышон жә бәјәнды, бо и јәнды моримон,

Бәмә комәг быкә кыве? -Уму мандә бә Хыдо!

 

Ко кардәбу котән һежо, бәнә һәши сыведә,

Сојбыш әгәм мерд бедәбу, ча кардә, асб шиведә,

Фәхи, һытә милләти сојб, есә-есә лыведә...

Бәмә комәг быкә кыве? -Уму мандә бә Хыдо!

*  *  *

            Хосә Ханәли дај! Шык бә Хыдо, чан соронин зынејдәм Шымәни, һежо бәсә асписә виндәме Шымә! Јәни һежо дылванди доәкәс, бә ҹанг сәдо кардәкәсым виндә Шымә! Һич виндәмни ки, аһу-зор быкән, руфо егынән, һич мышоһидә кардәмни ки, Хыдо ныкардә, умујон песијы Хыдоку! Дынјо хәлғон һәммәј һестышоне шаирон. Чәвон дыләдә мыборизонән быән-һестин, бәдвиндонән. Ым дәдә-бобоку жыго быә, жыгоһән жыго бәбе. Вај бә шаири һоли ки, Хыдоку пебәсије чәј уму, јәни гијбәкул бәбе!

            Һәлбәттә, шаир хәлғи гәп жә Зывоне, чәј һар дарди бывоте, һәмән хәлғи шојә ружәдә чәј сәдо бә аләмон певыло кардәкәсе!

            ... Мәјусым винде шымә, дылым тәвәј! Әмә Дешмә һымһымби жимон кардејдәмон бы дәнәбәдылә дынјоәдә! Һәзо-һәзо толышон че дынјо һар вырәдә бә кәшон-кәшонин, һәвур-һәвур кардејдән Дешмә шерон! Корпә әғылон ыштә моә вәдә гуләвазә кардејдән Дешмә шерон! Хыдо ныкардә, әвон жыго бызнын ки, Шымәнән уфо егынијәшон! Чич бәбе бәвәдә? Баршије чәвон кәш-пор, кәшбәку, гијбәкул, вијәвон бәбен әвон һәммәј! Хыдо бәмә нишо ныдә ә ружи!

            Уму, һәлбәттә, бә Хыдоје! Әмә һәммәј бә Хыдо бә умумон, Дечәј рој шејдәмон, Чәј һәхи тәләб кардејдәмон! Хыдо ро һостон бәбәј, бәвәдә милјон-милјон одәмон есә һәммәј әшин Дечәј рој! Бы роәдә һесте һар ҹурә әзоб-әзјәт. Бәс бочи быми вотејдән имтоһон! Имтоһоне, чәмә хосә Шаир, Сипириш! Хыдо имтоһон! Иншалла, орзу быкәмон ки, чәмә хәлғ сәбарз бешу чы имтоһоно! Хыдо бәвоте: Шымәку һәрәкәт – Чымыку бәрәкәт! Һәрәкәт быкәмон, Шинә Дај! Бәвәдә мыкофотышән бәбе – быми шәк ни!

Быбахшән мыни ки, сыханым воте Шымә сыхани вәдә! Хыдо умр быдә Бәшмә!  

Бынывыштән, рост быкән чәмә хәлғи бә озоди ҹанг!

Вејән јолә дастәмон,

Бә ијәнды рәсдәмон.

Ыштә һәхи бәстемон!

Ә руж һәлә омәни,

Вәтән, чәшкә әмәни!

Чәшкә әмәни, Шинә Дај!

Һежо Шымә рукә билә Әбосзодә

 

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (1 добавлено)

  • Опубликовано Rabil, 20 Июль, 2011 01:42:28
    xanali muallimi qlayan kitobi nashr nikarde mini mayus karda...Votdan Xanali mamu kitobi Allaverdi muallim chap karda...Qlay qoa chay maddi problemish hallish karrdabay Allaverdi muallim ay chap akay...

Главные новости

|