Воскресное чтиво на Толышпрессе : ВОТДЭН БЭ ЧИЧИ?

 

 

ӘБДУЛРЗА ӘҺМӘДОВ

   

 

                  ВОТДӘН БӘ ЧИЧИ?

Чиче һырку, чиче выжвард, чиче вотдән сио тәло?

Дылысыхт, сиплошә, шыппу, чәнәхә локә, һәло.

Вызмә вотдән бә чичи, мыштәһу, лурт, коjә, сәло,

Чиче әв ки, һежо ҹолнәj, поти вотдән бә чичи?

 

Дәросын мыни, бә сә дәнә бомы “шынг” сыхани,

Кәвыжә, шым, хыjәвон, довлә, ды мынг – мынг сыхани.

Ливә-лампу, чығоне, ҹых, екулә, зынг сыхани,

Позәдә пур бедә кәфшән, кыты вотдән бә чичи?

 

Вәлокә чиче, полокырчәкә, мавлә, чакә тос,

Һәjвонондә чиче руәжылә, ҹырыск, доккуә, рывос.

Бо чичи кардедәбин навко бә шәв һежо һовос?

Бо һәмәj нахшон еғандә лути вотдән бә чичи?

 

Куло, вышол, вәчә се, кәвыжә, лынгә, чиче мыж?

Пыхыво, сынды-си, гәрәjчи, ҹу, бынвас, пу, кырыж.

Рандәму, локәку, гулмех, леғәрыштән, һанә, ғыж,

Чәкерә, генҹыво, кырчым, шоти вотдән бә чичи?

 

Һәjвонондә коме бо мивә әв петатдә бә до?

Чиче әв, зиккә жедә, осмони егәтдә сәдо?

Кон ғарзе, гыно бәкаш, әj ныкош гирәм ты әдо?

Һәжәмә, һәjвәрә, гәвданг чоти вотдән бә чичи?

 

Әв чиче ки, вишәдә кандуләдә гәтдә лонә?

Кон доj әв, каштедән әj со-бәдә әнҹәх бе донә?

Чиче әв, руj кәно бедә, пыjедә роj итонә?

Бумәку, реғ, гофекәрт, мырхути вотдән бә чичи?

 

Бә чичи сокрә, дуә, шып, чохо, шалбенд вотедән?

Әшиво, зингәвулә, һасмәнә, ҹебенд вотедән?

Деләвузуз, мәләғә, кындәлә, се, генд вотедән,

Гописә, ләккоә, сәсинә, пути вотдән бә чичи?

 

Бандәнә, пулә, ҹәмәкул чиче иjән ҹынәвә?

Әв чиче, әбжорику тарседә, витдә чы тәвә?

Ком пәрәндәj ки, әв охшәш додә әнҹәх бә дәвә?

Бемәхә, нунку, ғәлизә зоти вотдән бә чичи?