ЫМ ИД ЧЭМЭ ИДЕ !

МЫБОРӘКЕ ШЫМӘ КУЛӘ ШӘВ, АЗИЗӘ ТОЛЫШОН!

ЫМ ИД ЧӘМӘ ИДЕ, ЧӘШРУШНИЖӘН ЧӘМӘНЕ!

            …Хәjли вахтбе ше зынеjдәныбим бә выжор: зыком имкон доjдәныбе. Ымруж әштим сәпо. Диjә кардыме бә һәвосоти: әвәсор боj-боj вотеjдә бә одәми! Думот кардыме ки, кәдә ныште вахт ни. Кәдәкиjон вотен, “Кулә шәве маштә, бә выжор шеj лозиме”. “Фырсәте”, - вотыме, бышум һәмән дәгиш быкәм ыштә һәвосоти. Омәjм бә выжор. Һежо жыго зынеjдәбим ки, тоҹике гуждәһват. Һыриме гужд. Хәбә сәме: -Нәвузи ид кардеjдәшон? Воте, бәле. Бәс Кулә шәви? Ерәхәj бәмы мот-моти. Бәнем, зынеjдәни чичи барәдә шеjдә сыхан. “Тоҹикиш?” - парсәjм. “Чы фәрғыш һесте?”. – Ошандыше ыштә даст, jәни ки, “һәм чымәдә, һәмән чәвәдә”. “Тоҹикиш jа не?”, - ижән парсәjм. “Пыәм узбәке, моәм тоҹик”. “Мәсәлә мәлуме”, - вотыме. – “халисә тоҹик быәбәjш, әзниш чиче Кулә шәв”. Вотыме боәj кали чиjон Кулә шәви барәдә, хошыш омәj…

            Бешим чәjо, думот карде-карде омәjм бә кәj тәрәф. Ижән jәғын кардыме боштә ки, әнҹәх халисә ироныж бәзне Кулә шәви чич бе. Чумчыко ым чәмә иде – халисә ироныжон Ид!

            Омәjм бә кә, ныштим, отырниме китобон, интернет ки, бунум һәни ком ирони хәлғи зывонәдә ыштә хысусиjә ном һестыше Кулә шәви. Бәнем, не, һежо иглә толышон мәхсусиjә ном ноәшоне бы ружи. Ижән jәғын кардыме боштә ки, чәмә Иде Кулә шәв – толышон Иде! Вотыме ыштә нымож, дыво кардыме бо Хыдо, шукур кардыме Бәчәj jолjәти ки, доәше бәчымы хәлғи жыго гыләj Ид!

            Бы чандә сорон дыләдә чандә кәрә нывыштәме Кулә шәви барәдә. Бәмы жыго омеjдә, кам толыш бәбе ки, һәни нызны Кулә шәви әсыл молjәти иjән мәно... 

            Әнҹәх бовәм жыгоjе ки, һич вахти зиjоди әвәни Кулә шәви барәдә сәнибәтон нывыштәjон. Чумчыко ым гыләj меҹузә руже, Хыдо меҹузә! Хыдо доәше бәмә ружон һәммәj. Речинин, азизин чәвон һар гыләjни! Быми нибәзне бе шәк-шубһә! Интаси чы сыр һестебу бы ружәдә, одәми олывнедә, оҹымош вардедә, ҹәзб кардедә бәштә! Чымы зынәjку, дынjо кон вырәдә быбуjән, Кулә шәви һар гылә толыши иминә орзу әве ки, быбу ыштә Вәтәнәдә – Толышәдә, быбу дештә хәлғи, ов-авлоди бә иврә. Һич вырәдә жыго ләзәт доjдәни Кулә шәв! Чумчыко Хыдованди-Аләми бә зәминәдә, бо һәмон хәлғи нозил кардәше ым Ид! Жәго гыләj толыши бәштә чәши вә варде әзыним ки, Кулә шәви пәши ныгәты боштә Вәтәни, боштә ов-авлоди, ғыбо ныгәты чәj хыртә, пурғыбо ныбу! Интаси гыләj сырән һесте бы пурғыбо ыштәнәдә: соф кардеjдә одәми, нур доjдә бә одәми дыли, руфи, нез кардеjдә одәми бә Хыдо!

            Әве, Кулә шәви иминә орзуjән ыме ки, быдә һар гылә толыш пурғыбо быбу бы ружәдә, бы шәвәдә, пәши быгәты боштә Вәтәни иjән хәлғи. Быдә jодо беныкә ки, ТОЛЫШИМОН ӘМӘ, ТОЛЫШЕ ЧӘМӘ ХӘЛҒИ НОМ, ТОЛЫШЕ ЧӘМӘ ВӘТӘНИ НОМ. ҺАР ГЫЛӘ ТОЛЫШ БЫ АЗИЗӘ РУЖӘДӘ ОРЗУ КАРДӘНИНЕ КИ, ОЗОД БЫБУ ЧӘМӘ ВӘТӘН, ЧӘМӘ ХӘЛҒ КИ, ИЖӘН БӘНӘ НАВКОНӘ БАХТӘВӘРӘ СОРОН БӘ ИҸО БЫБӘМОН, ЫШТӘ ИНӘ ЗЫВОНӘДӘ БӘ ИҸО ЧӘШРУШНИ БЫДӘМОН БӘ ИJӘНДЫ, “КУЛӘ ШӘВМОН МЫБОРӘКЕ!”, “ҺӘЗО-ҺӘЗО КУЛӘ ШӘВ ДӘВОНӘМОН!”, “БӘ НӘВУЗ БЕШӘМОН БӘ ИҸО!”, - БЫВОТӘМОН БӘJӘНДЫ.

            МЫБОРӘКЕ ШЫМӘ КУЛӘ ШӘВ, АЗИЗӘ ТОЛЫШОН! БЫ АЗИЗӘ ИДӘ  РУЖӘДӘ JОДО БЕМӘКӘН ТОЛЫШИ, ДЫВО БЫКӘН БО ТОЛЫШИ! ХЫДО БЫМӘСЫ ЧӘМӘ ДЫВОН!

ИЛАҺИАМИН!