ДЫЛИ РЫШТЭЈОН

ДЫЛИ РЫШТӘЈОН

(Појсә нывыштәј)

Бырзым гәте кусәдә,

Марзым манде душәдә,

Дәро гыним, аз бешим,

Дылым Беләрусәдә!

Пози һәши чы зарде,

Мәһол бомы пегарде.

Бы синдә ым һәнгомә,

Бәчымы сә ки варде?!

Че маги асп таз шедә,

Шинә гәпыш ҹон седә.

Әчәј һа кардә нозә,

Бомы јолә дард бедә.

Һындә холыш димисә,

Номыш бәсә номисә.

Бәмы сырәкәс бәпе,

Нәвыш ныво нимисә!

Мухолоныш перыштә,

Пыјемони арыштә.

Канә дардоным кам бе,

Тожә дард мыни кыштә.

Гәзнә гырон товнедә,

Ғыбо дыли бовнедә.

Чә речини ноз мыни

Бә мәһоли новнедә.

Выл гин бедә бутәдә,

Зил орәхдә мутәдә,

Әј  вотыше неј бәмы,

Һардем манде лукәдә.

Былбыл һандә вылисә,

Ов шығедә дылисә,

Ым кинә че отәше ,

Быштдә мыни зилисә.

И манг рәјрә зинә бе,

Чандә шинә кинә бе.

Бомы ноз кардә мојнә

Хосә номыш Инә бе!

Ком инә ымыш занде?!

Чандә дәјым еһанде!

Шим бешим аз бә Питер,

Фикым Минскдә манде!

Забил Мәдож

Минск

11.03.2011 г.