ГЫРБОНЭ ИДОН МЫБОРЭК !

ҒЫРБОНӘ ИДОН МЫБОРӘК!

   …70 ружбе ышты орзуjәдәбимон. Бә чәшбимон тыни. Һәзо-һәзо моминон, де милjони мысылмонон дынjо һар вырәдә бә чәшбин тыни. 70 руж чыми бәнав сә кардымоне ыштә Ружә, пок кардымоне ыштә ҹон иjән дыл, нез бимон бә Хәлләғи-Аләми, пок-поки мандимон бә дыво боштә ыштәни, боштә ов-авлоди, дусти-таныши, боштә хәлғи - бо толышон, бо ҹәми мысылмонон. И гәво дыво кардымоне ки, Хыдо бымәсы ыштә мығәддәсә мангәдә чәмә дывон, быбахшы чәмә гынон, ро окә боәмә, бочәмә хәлғи – бо толышон!

   Чәjоән мандимон интизорәдә бо Ғырбонә иди – Исмоjли ғырбони! Бо ә иди ки, бымәдә чәмәһон һар гыләjни дәвардәнине Хыдо дәвинәку, исбот кардәнине ки, лоjиғе бә Хыдо бәмә доә номи – бә инсони номи. Сыбут кардәнине ки, ғоjме ыштә бовәдә, камиле ыштә имонәдә, поке ыштә әмәлонәдә! Имкон быәкәсон, ыштәни һозы зынәкәсон зиjорәт кардәнинин мығәддәсә Мәккә, шәнинин бә Һоҹ, имкон ныбәкәсон есә боj обырниjәнинин (ижән ыштә имкони дахыләдә) ғырбонә ғучи, кәлә, дәвә и.ҹ. һәjвони, ғәзән ноәнинин киjәсә, окардәнинин ыштә һәлолә сурфә ки, шо быбу мардәкәсон руф, бә тәм бо омә меһмонон гәв. Һәммәjәво шукур быкәмон бә Хыдо ки, кам ныбу Чәj бәрәкәт чәмә кәоно, чәмә һар гыләjни зәһмәто! Демиjән ижән бовә быкәмон бә Хыдо әзәмәти, jолjәти, бәчәj ғудрәти, сыбут быкәмон ки, ә обырниjә мол ни Хыдо роәдә ән чокә ғырбон, һар гылә мысылмони ИМОНЕ, ТӘҒВАJЕ ән чокә ғырбон! Чокнә ки "Ғырон" бәjон кардеjдә: "Бә Хыдо нибәрәсе нә чәвон гужд, нәәнки хун. Бә Хыдо рәсәнин әнҹәх шымә тәғваjе. … Jа Мәһәммәд! Мыждә быдә бә еһсан кардәкәсон!" (Әл-Һәҹҹ//37).

   Хосә толышон, ҹәми мысылмонон! Бәштән ыштә jонгоо маштә-маштә, ғусл быдән бәштә андоми, чәjо тәкбир карде-карде – "Аллаһу Әкбәр!" зикр карде-карде сәбәро быбән бә мәчит, бывотән ыштә иди ныможи, чәjоән "Тәкәббәл Аллаһу миннә уа минкум" ("Быдә Хыдо ғәбул быкә шымәку иjән чәмәку") дыво һанде-һанде, "Бисмиллаһ" воте бәпештә обырнән ыштә ғырбони, ыштәнән бәһән, бахшән быдән. Шукур быкән бә Хыдо jолjәти, дыво быкән бочәмә хәлғи – бочәмә мысылмонә толышә хәлғи ки, Хыдо комәг быбу бәj, перохны әj зылләто!

   Мыборәк быбу шымә Ғыбонә ид, хосә толышон, хосә мысылмонон! Бекән ыштә дыло шәjтони вәсвәсә, шукур быкән бо Хыдо! Камил быбу шымә имон! Хыдо бәрәкәт нозил быкә бәшмә сурфә! "Әнҹәх воһидә Хыдоjе шымә Аллаһ. Әнҹәх бәj тәслим быбән иjән итоәт быкән!" (Әл-Һәҹҹ//34)