ХЫДО ОКЭ ЫШТЫ БЭJ!

     Ымруж чәмә Билә Мушфиги моәо быә руже. Чанд руже бә думотим ки, чич бынывыштым бәj, чокнә тәбрик быкәм чәмә Билә? Һандәкәс бәвоте, чиче, сыхан пәjдо карде зынеjдәним ки, бынывыштым? Һәлбәттә не! Сыхан веjе бо нывыште – иjәндысә речинә, шинә сыханон! Һа пиjеjдәме бынывыштым жычиj ки, шо быкәм һәм Мушфиги ыштәни, һәмән һандәкәсон – әj зынәкәсон, дустон, ошнон, һәмрон, ов-авлоди! Һа нывыштеjдәм, виндеjдәм ки, не, ғәмгинин чымы сыханон, ғәмгине чымы тәбрик!
     …Пенҹминә соре ки зиндонәдәj чәмә билә Мушфиг. Сәбәбышән әве ки, дышменымон зуманде һәлә: конҹо толыши номи гәтәкәс һесте, конҹо толыши роәдә сыхан вотәкәс һесте, әjоән пәjдо беjдә дышмен, тәлә рыштеjдә һәмонә толыширо! Фытнә, фәсод, мәкр, пул-рышвә, һәни чыбызным чандә ҹурә һилон һестин дышмени еһтиjотәдә. Әвон һәммәj сәбәро кардә быән бә толыши вәjнә мыборизә роәдә. Нә дин һесте, нә имон. Дәҹҹолон быән аспо, толыш быә пиjодә. Жыгонә чандә гылә толышон әзоб-әзjәти дыләдә бә ҹангин Толыши роәдә.
     Толыши роәдә ҹанг кардәкәсон гыләjниjе чәмә Мушфигән! Чәj дардон-бәлон һәммәj сәбәбән Толыше ки һесте! Еһанә даст кәшәшбәj ыштә мыборизәку, даст кәшәшбәj ыштә хәлғику, гәтәшнәбәj чәj ном, әнышти ыштә кәдә, дештә корпә әғылон, дештә пиjәженә моә, дештә һәмро, дештә боон, дештә ханымә һовон, маш әкәj, тәнхо гырдә әкәj, роһат-роһати жимон әкәj боштә.
Әкәj ымони һәммәj, һәлбәттә! Әмма Мушфиг нәби һәни! Әби чандә һәзо толышон гыләjни! Чә толышон ки, веj вахте jодо бекардәшоне ыштә хәлғән, ыштә номән, занбохбәсә быән jадон мышти жиjәдә. Чә толышон ки, ыштәнән, чәвон тәнхоән, чәвон һестемон һәммәj ғоллығ кардеjдә бә jади. Ыштәнән ләзәт сәjдән бәвон «гижә толыш» вотеәдә…
     …Ыштәни фамә иминә ружику, бә jолә жимон чәш окардә ружику Толыши роәдә бә ҹанге Мушфиг. Һәтто зиндонәдә ныштә вырәдән дәвом кардеjдә ыштә ҹанги. Ов-авлодыш, корпә балоныш чәшбәрон пенҹ соре! Әмә һәммәj чәшбәромон…
Һич гылә зылм мандәни беәвәз! Зылм кардәкәс жыго фикир кардеjдә ки, һежо аспо бәбе. Интаси жәго ни! Чәвон ком гыләjнисә ыштә ҹәзо сәjдә һежо бы дынjоәдә, мандәjонән зол  сутеjдән ҹәһәнными отәшәдә! Ымонән бәстен ыштә ҹәзо – быми ни һич шәк-шубһә! Толыш бәсте ыштә хысуси, ыштә ә зоон хысуси ки, чәj роәдә дучо быән бә әзоб-әзjәти, чан ҹурә зылләти! Иншалла Мушфигән бебәше бә озоди, деjәмә бә иҹо дәвом бәка чәмә ҹанги! Кам мандә, лап кам мандә!..
     Ымруж әмә һәммәjәво чәшрушни доjдәмон бәштә Билә Мушфиги, тәбрик кардеjдәмон чәj сини! Орзумон игләjе: ХЫДО ОКӘ ЫШТЫ БӘJ, ЧӘМӘ ХОСӘ БИЛӘ МУШФИГ! МЫБОРӘК БЫБУ ЫШТЫ СИН! ЫШТЫ РОJ БӘ ЧӘШИМОН, ЧӘМӘ ХОСӘ БИЛӘ!