МЭДО ЛЭТИФОН

     Ружи чы ружон Сәтолла маму нохәш гынејдә, шејдә бә нохәшхонә пезышки тоно. Ым пезышк че Сәтолла маму андоми тикәј ешышт-пешышт карде бәпештә, пегәтејдә ыштә ғәләми, дәмандејдә боми дамон нывыште. Мылхәс, Сәтолла маму бешејдә чәјо, пеныштејдә бә автобуси, омејдә бә Мәдо. Автобуси поәдә Әбдул миәллим виндејдә         Сәтолла маму, вотејдә:
-Сәтолла, чыконҹо омејдәш?
   Сәтолла маму вотејдә:
 -Шәбим пезышки тоно.
   Әбдул миәллим вотејдә:
-Чич вотыше?
  Бы вырәдә Сәтолла маму пезышки нывыштә нусхә бекардејдә нишо дојдә бәј. Әбдул миәллимикујән адәтебән, жычиј һандеәдә оәшандијбән ыштә сәј. Әве ә нусхә һанде-һанде ошандејдә ыштә сәј. Дыләғыппә гәтејдә ым әвомә Сәтолла маму. Омејдә рәсејдә бә кә, вотејдә бә жени:
-Һајди оғанд чымы јонго!
  Жен вотејдә :
-Зә, кәхоби зоә, чич бе, чич вотышоне бәты нохәшхонәдә?
Сәтолла маму олахтејдә вырәдә, чандибәчандон вотејдә:
-Әбдул зынејдә...

     Мәдоәдә гыләј косибә мерди чәш дамејдә бә хани кинә. Ым мерд һәни мардејдә чы хани кинә пијемонику. Веј һәрәкәт кардејдә, жыго-жәго чалғард кардејдә. Виндејдә ки, не, хан әдәни ыштә ә ханымә кинә бәнә быми педыријәпочә. Дастыш сијејдә һар вырәо, мандејдә мәтәл: чич быкәм, чич ныкәм. Ружи чы ружонән омејдә дәшејдә бә Бобо Сәјдәғә тыбә, пеш ныможи бино кардејдә бо жыго гыләј дыво карде:
-Хыдовандә, ты быкышт Мәдожон һәммәј, иглә мыни баһашт де хани кинә....