"Воскресное чтиво" на Толышпрессе : ТОЛЫШЫСТОН

Толышыстон

Дынjош виндә чымы чашон,
Конжоj жыго һалон, вишон? –
Тыниш росто вәjшти нышон,
Толышыстон, Толышыстон!

Әтрә буjе ышты һәво,
Чәнә дардон дәмон, дәво,
Дыво кардәм, бә чаш ныво,
Толышыстон, Толышыстон!

Тыни мәһол-мәһол гардәм,
Һәвәс сәjдәм, ғурур бардәм.
Инәш, бәты сәждә кардәм,
Толышыстон! Толышыстон!

Речиниjон ғәлә тыниш,
Сәо бә сә вылә тыниш,
Дынjо чашә гылә тыниш,
Толышыстон! Толышыстон!

Чамы дылиш ты, жониш ты,
Бә иj дынjо, иj тыниш ты.
Че Бобоки вәтәниш ты,
Толышыстон! Толышыстон!

Чаш сеjр кардә, обдән дылон,
Банди сәj воә, быни вылон,
Жәһ-жә жәjдән хос былбылон,
Толышыстон! Толышыстон!

* * *
Кам кәшәшни сә ве доғон,
Жоjон бәты жә ве доғон.
Мәрд пемандәш бә ве доғон,
Толышыстон! Толышыстон!

Кывин чәнә шәһәр, диjон?
Ысә мандән чәвон риjон…
Боты жон доj һуррәмиjон
Толышыстон! Толышыстон!

Бәшты гири дынjо мот бе,
Тарых выjо ғатбәғат бе,
Вахти подшо Атропатбе,
Толышыстон! Толышыстон!

Че игидон аркониш ты,
Че ғырjәти бәркониш ты,
Каспианәш, Һыркониш ты,
Толышыстон! Толышыстон!

Зоә-кинә де барзә шәни
Ышты роәдә ноjдә жони.
Бәхты обу, вахте һәни,
Толышыстон! Толышыстон!

Омә машки шо ыштыне,
Аһурвонә чо ыштыне,
Озодәти ро ыштыне,
Толышыстон! Толышыстон!

Чокнә бәжjе беты ым жон? –
Охо, умур бәбе ғәзон…
Вешо вотдә: Бәты ғыбон,
Толышыстон! Толышыстон!