ВЭJЭОН МЫБОРЭКЕ!

ВӘЈӘОН МЫБОРӘКЕ!

     Вәjә шоjе, шоткомәjе. Бочи? Чумчыко чәj мәно ыме ки, нәсыл дәвом кардеjдә, бә нав шеjдә. Хыдо ки доәше бәмә ын жимон, әмә доjдәмон бәштә әғылон. Чәмә әғылонән вәjә кардеjдән ки, әj быдән бәштә әғылон. Вәjә шоткомәjе һәмән бәчәj горыш ки, ов-авлоди һәммәj гырдә кардеjдә бә иврә, әвонән шоjд беjдән ки, чәвон авлоди нәсыл шеjдә бә нав, озавзиjеjдә.
     Вахтон һестыбин, толышон һәмә әжин ыштә Вәтәнәдә. Гыләj авлоди, незә одәми вәjә беәдә дастә әгәтин һар тәрәфо әвоjн бә вәjә. Әдәjн-әстәнин, әһәjн-пеjәшомин, әсырин-рахс әкәjн! Женон бә и тәрәф, мердон бә и тәрәф, пыло патәкәс ки, ғәjлә патәкәс ки, чаj ноәкәс ки. И тәрәфо бобәрчинон хорәк новнеjдән, чаjәвонон чаj доjдән, сипиришон ғәбул кардеjдән ғонәғон, женон дәвонеjдән зәнәнон бәчәвон чоды; әғылон певаштеjдән һар тәрәфәдә… Сиjо зырно сәдо пегәтәше мәһол бәштә сә, һар тәрәфо ҹәмати сәдо кардеjдә бә вәjә. Гырдо-кәноәдә жиjә мәхлоғ һәммәj зынеjдә ки, фылон диjәдә вәjә кардеjдә фылонкәси зоә, фылонкәси кинә бә шу шеjдә бә фылонкәси зоә. Мәсәкәс, дамә быәкәс, жены-мерд, һырды-дыжд һәммәj и гәво “Хыдо хәj быдә!”, “Хыдо мыборәк быкә!” вотеjдә. Ыме че вәjә ләзәт!
     Әмма есә веj дәгиш быә зәмонә. Ҹәмати веjни певыло быә бә дынjо һар тәрәф ҹылмәj нуни думо. Диjонымон тәj мандән. Вәjә беjдә, коjә беjдә, ов-авлоди веjни әjо беjдәни. Роон быән диjәро, гузорон быә гон, ғәзәнҹ быә кәсод, пул бешә бә ҹеjрани пешт, ше-омә огардә бә мышкул! Мәсеjдәмон ки, фылон авлодымон вәjә кардеjдә боштә зоә/кинә. Ки әпинише ки, бышу бә вәjә? Һәм вәjәсоjби дыли шо быкә, һәмән ов-авлоди сәj барз быкә! Вәjәсә чок чич бәбе ки? Бә вәjә шеjсә чок чич бәбе ки? Һичи! Интаси ше зынеjдәнимон, ым jавәjе!
     Әве, ыштә дими гәтеjдәмон бәштә авлодон, “Вәjәон мыборәк быбу!”, “Чәшипури бывиндышон!”, “Хыдо хәj быдә!” вотеjдәмон бәвон. Быбахшә әмәни, быбахшән ки, оме нызнәјмон…